Read Khumi Chin ROM 9 Bible Online

ROM 9 - Khumi Chin bible

ROM 9

¹Krista y ly leu meitang khypkhyp kathui nai ne, ka-chawi kathui y leang;

²kai i paleung y khrikhri pa-rei patang naira hawi paleung mawn naira y rym pajau y nai awm, nanai Phailo Kachai y ly kai i hawi nai hawi y nai pany naira my ly kai ai ang pany hai.

³Kai i amjo amnauchi, tlang mang i kai i chengchi i jeng y kai ly Krista teng i nai amprei vui iy, amsawi lawi nai pa-rei py kaawm iy khyly kangai kai ly.

⁴Nichi ly Isaelachi ne; chanau lawn naira py, tahm asang naira py, leu maikawm bawibawi py, Reita peinai py, Tameuh ai chiu ai nai py, leu adeu nai bawibawichi py mymychi i ne;

⁵amsi pajochi ly mymychi i ne teang, Krista ly tlang mang i molam y mymychi theung i theu nai ne teang; mymy ly atiti bawibawichi i tlang tleaung y peang nai ne i, deungtasarei palo ai ataing nai Tameuh ne. Amen.

⁶Na i py Tameuh i leu ly ati sai py ny y nai kamta awm vui nai ny y leang. Ati mana nai mo nabaly Israela kangpreangchi ly Israelachi ne bebe y leang.

⁷naibaly nichi ly Abraham i kangpreangchi ne u nai deaungkho y nichi bawibawi ly mymy i chanauchi ne bebe y leang: “Isaka y ly nang i kangpreangchi pathi ai,” napi nai teu.

⁸Huni ly mana mo nabaly, tlang i chanauchi ly Tameuh i chanauchi ny y leang; leu adeu nai chanauchi ly kangpreang y palawn nai teu.

⁹Adeu nai leu ly hini ne he, “Amlo y hini neng khala y ly kang jeu ai i, Sarai ly chapo tapen ai,” napi nai he.

¹⁰Huni khyh ny y leang; Rabeka py khumi leaungrei, amsi pajo Isaka hawi awm iy deaungdi aniu.

¹¹Naibaly deaungdi nini ai tapen y rai kha y, nini ly hawi nai hawi y nai so y i, atiti sa nai deaungkho y ny y naimy,

¹²palau nai keung i kangai deaungkho y Tameuh i leu khai rym nai ly vawi naira y khaw thai ai nai mymy teng y, “Amjo my ly amnau i anui y awm ai,” napi.

¹³“Jakob ai katamen i, Esaw ai ly kaniu ngai y,” nanai tajiu nai kamta.

¹⁴Hunaibaly achi ly mana thui ai mo? Tameuh ly hawi y naira awm a? Ny y leang.

¹⁵Mymy ly Mosi teng y, “Kai kapahen nai ngierei ai ly kaimy ngaingai kapahen ai, ami i tlang tleaung y neaung kahawi nai ngierei ai ly kaimy ngaingai neaung kahawi ai,” nanai thui.

¹⁶Hunaibaly huni ly ami i ngai nai hawi angpreng nai deaungkho y ne y leang, pahen nai keung Tameuh deaungkho y teu.

¹⁷Naibaly Tameuh i cha-iu ly Pharao teng y, “Nangmy y ly kai i sa thai naira kapatei thai ai nai hawi, khaileaung pri verei y kai i amyn amthang hai thai ai nai py nang ai kang khai yb khyp bo,” napi.

¹⁸Hunaibaly Tameuh ly mymy i ngai nai ngierei ai ly pahen iy, mymy i ngai nai ngierei ai py paleung tang hai ai.

¹⁹Hunaibaly nang ly kai teng y, “Ati mana nai ang padeng rai mo? Mymy i kangai paka nai keung ly ami mo?” napi ai ngaw khyh.

²⁰Ne, na i py nai awi, Tameuh ai ei nai keung nang ly ami kha? Atiti sa angchi nai my ly sa nai keung teng y, “Nang ly ati mana nai kai ai hinai kamta sa lawh?” tapi na a?

²¹Laawm sa nai keung my ly khaileaung akawirei hawi laawm harei ly tahm asang naira y teaung ai nai hawi, laawm takhra ly tahm anem naira y teaung ai nai sa ai nai py khaileaung alai ai aly peang y a?

²²Naibaly Tameuh ly pahen naira laawm, nang parai naira nga ai nai sa rym naichi i tlang tleaung y ly mymy i nang parai naira nawi nai sai patei thai ai nai,

²³kado theu naira laawm, tama ai ataing naichi i tlang tleaung y ly amnym tanga iy, mymy i kado theu nai hawi mymy i atiti sa thai naira amteng hai ai nai ngai teu iy py, mana sa ai mo?

²⁴Huni ly achi, pahen naira laawmchi ai ly Judachi theung i khyh ny y naimy, Cheng Takhrachi theung i nai py ang palau nai ne.

²⁵Naibaly mymy ly Hosea i cha-iu y py, “Kai i khumi ne vai y naichi ai ly kai i khumichi kapathi ai; Tamen vai y nai ai py tamen nai kapathi ai.

²⁶Naibaly hina nai ne ai; mymychi teng y, ‘Nangchi ly kai i khumi ny y leang,’ napi nai meingtym kypkyp y ly, Tameuh kangheng i chanauchi’ ang pathi ai.” napi.

²⁷Naibaly Isaia my py Israelachi i molam y aeu hai nai “Israela kangpreangchi ly pangli spryh jirei nawi iy py, nichi theung i nai phyreichi hengra nga ai khyh.

²⁸Areng ly khaileaung pri tleaung y mymy i tara chih nai leu angym pa-rei tym hai praw ai,” napi.

²⁹Naibaly Isaia my teang, Mipuichi i Areng my ly ti ampreng ai nai keung ai ang khai pi moh khyly, Achi ly Sodom avang kamta awm ai i, Komora avang kamta ang palawn veng lawh nai bo he,” nanai thui rym nai kamta.

³⁰Tumbaly achi ly mana thui ai mo? Hawi naira hui y nai Cheng Takhrachi ly hawi naira ai kai nai bo, huni ly ym nai deaungkho y hawi naira ne.

³¹Na i py hawi naira Reita ai hui nai Israelachi ly huni Reita ai kai pajau y leang bo.

³²Ati mana nai y mo? Nichi ly ym naira y ny y naimy atiti sa naira y hui lawh nai deaungkho y teu. Nichi ly atlym naira lengseaung y atlym lawh veng.

³³“Khen cham, Zion y ly atlym naira lengseaung hawi paka naira lengseaung pui kakhai i, Ami py mymy ai ym nai ngierei ly amtheaung leaung y ai,” nanai tajiu nai kamta.