Read Khumi Chin I KORINTH 1 Bible Online

I KORINTH 1 - Khumi Chin bible

I KORINTH 1

¹Pawla, Tameuh i kangai Isu Krista i amtaw thau nai khumi lawn ai nai palau nai hawi, achi i amjo amnau Sostheni ly:

²Korinth avang y Tameuh i palau takhra kamkawm awm nai, Krista Isu y khai takhra nai, khumi kachai lawn ai nai palau naichi teng y hawi, meingtym tleirei y achi i Areng Isu Krista i amyn palau nai bawibawichi teng y py (ni ly mymychi i hawi amychi i Areng ne),

³Tameuh achi i Ampo hawi Areng Isu Krista teng i dengdairei pahenra hawi awmnem naira py nangchi teng y awm sy.

⁴Krista Isu ly Tameuh i pahenra nangchi teng y ang pei nai deaungkho y kai ly nangchi i molam Tameuh teng y kawn nai leu kathui jojo;

⁵mymy ly ati cheaungkhang leu thui naira y hawi, pany naira cheaungkhangra y py nangchi ai ang nang hai nai ne;

⁶Krista i leu kang pany hai nai py nangchi ai ang khaw hai nai kamta ly;

⁷hunaibaly achi i Areng Isu Krista i amteng nai ai ajeng nai, atiti sa thai naira pei ryry naira y nangchi ly ngo y nai ny y leang;

⁸ni ly achi i Areng Isu Krista i kani y ly nangchi cheh naira by y pa-rei awm ai nai nangchi ai tem khala y khrairei ang khaw hai ai mang.

⁹Tameuh ly ka-ym awm nai ne; mymy ly nangchi ai mymy i Chapo Isu Krista achi i Areng hawi amkawm ai nai ang palau nai keung ne.

¹⁰Naibaly amjo amnauchi awi, nangchi bawibawi ly leu vanrei thui u i, nangchi theung y akhawi takhra naira den py awm y ai nai, paleung vanrei hawi dawn nai vanrei py amtawm u cheng ai nai, achi i Areng Isu Krista i amyn y kang takeng.

¹¹Ati mana nai mo nabaly kai i amjo amnauchi awi, nangchi theung y aei naira awm, nanai Klawichi dengtheung my nangchi i satang ly kai ai ang thui pi bo.

¹²Kai i kang napi nai ly hini he: khumi leaung leaungrei ly, “Kai ly Pawla i kamkawm teu,” “Kai ly Apolo i kamkawm teu,” “Kai ly Kipha i kamkawm teu,” “Kai ly Krista i kamkawm teu,’ na u akyh kyh lawh.

¹³Krista ly akhawi nai sai a? Pawla ai ly nangchi i jeng y kraws tleaung y tahen a? Ti y baly nangchi ly Pawla i amyn y baptisma nga a?

¹⁴Krispa nini Kaia ai ny y baly kai ly ami ai py baptis kaso y nai deaungkho y kai ly Tameuh teng y kawn nai leu kathui nai ne;

¹⁵ti y baly kai i amyn y baptisma nga u nai, nanai ami my thui lawh na.

¹⁶Kai ly Stephana i dengtheungchi ai py baptis kasa teang; huni ny y baly khumi takhra ai baptis kasa mo pany y.

¹⁷Krista my kai ai baptis sa ai nai pato y leang, Satang Kahawi thui pi ai nai ang pato nai teu; leu kakawp hawi leu kacheng y thui ai nai ny y, ti y baly Krista i kraws ly ati sai py ny y nai palawn lawh na.

¹⁸Ati mana nai mo nabaly kraws satang ly tama dudu naichi i vui pathu naira ne, na i py achi hengra nga dudu naichi i vui ly Tameuh i atiti sa thai naira ne lawh veng.

¹⁹“Khumi kacheng i cheng naira ly katama hai ai, Ka-vo dawn thai naichi i ka-vo dawn thai naira py kapaka vui ai,” nanai tajiu nai awm.

²⁰Khumi kacheng ly ma ma y mo? Reita patiu nai keung ly ma mang y mo? Hini khaileaung pri i cheng naira ai ly cheng y naira palawn nai ny y a?

²¹Khaileaung pri my amy i cheng naira teaung iy Tameuh ai pany y ai nai, Tameuh i cheng naira my sa; hunai deaungkho y Tameuh my ngai i ym naichi ai paheng ai nai cheng y nai leu thui naira y teaung.

²²Judachi ly ka-ma-rachi hnei, Krikchi ly cheng naira hau;

²³na i py achi ly kraws tleaung y tahen nai Krista i satang thui pi nai he; huni ly Judachi i vui ly atlym naira ne i,

²⁴Cheng Takhrachi i vui ly pathu naira ne teang; na i py Judachi py ne sy, Krikchi py ne sy, palau naichi i vui ly Krista, Tameuh i atiti sa thai naira hawi Tameuh i cheng naira py ne.

²⁵Ati mana nai mo nabaly Tameuh i cheng y naira ly khumichi tleaung y cheng keh, Tameuh i ham y naira py khumichi tleaung y ham keh lawh teang.

²⁶Amjo amnauchi awi, ang palau nai ly dawn u cham; tlang i khumi kacheng neangneangchi ai py ham parai nai khumi neangneangchi ai py, khumi kahawi neangneangchi ai py palau nai ny y leang.

²⁷Na i py Tameuh my khumi kachengchi ai ly tapheaung thai ai nai, khaileaung pri i atiti cheng y naichi ai vawi lawh veng; naibaly Tameuh my atiti ham naichi ai tapheaung thai ai nai, khaileaung pri i atiti ham y naichi ai vawi lawh veng;

²⁸naibaly Tameuh my atiti awm naichi ai ly ati sai py ny y nai palawn thai ai nai, khaileaung pri i atiti kapheaungchi hawi atiti tahm anem naichi, atiti by y naichi hawi raurei ai vawi lawh veng:

²⁹hunaibaly Tameuh i mo y ly ami py amlyh pajau y leang.

³⁰Na i py nangchi naini mymy i saho y Krista Isu y heng nai ne; ni ai ly Tameuh teng i dengdairei achi i vui cheng naira hawi, chai naira hawi, atleu naira hawi sa hai nai ne.

³¹hunaibaly tajiu nai kamta ly, “Amlyh nai ngierei ly Areng y amlyh u sy,” nanai ne.