Read Khumi Chin I KORINTH 11 Bible Online

I KORINTH 11 - Khumi Chin bible

I KORINTH 11

¹Kai ly Krista i amtiu nai keung lawn nai kamta ly nangchi ly kai i amtiu nai keung lawn u.

²Naibaly nangchi ly ati cheaungkhangra y kai ai pany u jo nai deaungkho y hawi, leu taviu nai kang thui pi nai kamta khyp pateung u cheng jojo nai deaungkho y py kang palo mang.

³Na i py neampacho leaung leaungrei i lu ly Krista ne, neampachy i lu ly neampacho ne, Krista i lu ly Tameuh ne, nanai ly nangchi pany ai nai kangai.

⁴Neampacho ly lu amym naimy chiu sa nai mo, leu thui pi nai mo ngierei ly mymy i lu ai amthang hai leaung nai ne.

⁵Na i py neampchy ly lu amym y naimy chiu sa nai mo, leu thui pi nai mo ngierei ly mymy i lu ai amthang hai leaung nai ne: mymy ly vau pyn nai hawi vanrei teang.

⁶Neampachy ly lu amym y naimy awm makho baly vau tlamtlam sy; na i py neampachy ly sam vau nai mo, vau pyn nai mo angji ngailai na makho baly lu amym sy.

⁷Neampacho naini Tameuh kamta atawm nai hawi, mymy i nang parai naira py ne nai deaungkho y lu amym ai nai pipi avo y; na i py neampachy ly neampacho i nang parai naira ne.

⁸Neampacho ly neampachy teng i dengdairei theu nai ny y leang; neampachy ly neampacho teng i dengdairei theu nai teu.

⁹Ati mana nai mo nabaly neampacho ly neampachy i vui y sa nai ny y leang; neampachy naini neampacho i vui y sa nai teu.

¹⁰Huna nai y neampachy ly kani pri i amtaw thau naichi ai tahm khai nai deaungkho y mymy i lu y aly peang nai ka-ma-ra amym ai nai tla.

¹¹Na i py Areng y ly neampachy ly neampacho ny y baly awm pajau y, neampacho py neampachy ny y baly awm pajau y leang teang.

¹²Neampachy ly neampacho teng i dengdairei theu nai kamta ly neampacho py neampachy teng i dengdairei tapen nai ne; na i py ati cheaungkhang ly Tameuh teng i dengdairei theu nai bebe.

¹³Nangmychi y adawn u cham, neampachy ly lu amym y naimy Tameuh teng y chiu sa nai ly apu a?

¹⁴Neampacho ly sam kasau khai baly mymy i vui angji ngailai nai ne, nanai nangmychi i tapen ahawi nai paleung my py nangchi ai pany hai y a?

¹⁵Neampachy naini sam kasau khai baly mymy i vui nang parai naira ne; mymy i sam ly mymy ai khiu ai naira pei nai ne.

¹⁶Ati py ne sy, ami py aei ai naira awm i khyly hunai ka-tawm reita nanai ly achi ly pipi by y, Tameuh i palau takhra kamkawmchi py by y.

¹⁷Na i py nangchi ly hawi ra hawi ra ai nai mang y ny y naimy, hawi y ra hawi y ra ai nai mang y achu u lawh nai deaungkho y, hini kai i leu kang pei ai naira y ly kang palo y leang.

¹⁸Angchei i naira y ly nangchi ly kamkawm kamta achu u iy, nangchi theung y akhawi takhra naira awm reng, nanai amichi i thui nai kathai; kai ly ym py kaym hup lawh.

¹⁹Meitang khyp naichi ai nangchi theung y amteng hai thai ai nai, nangchi theung y akhawi takhra naira py awm ai nai tla yb nai ne.

²⁰Hunaibaly nangchi ly achu u nai khala y ly Areng i biu cha ai nai vuilam ny y leang;

²¹nangchi ly khumi leaung leaungrei cha iy amy i biu cha man lawh veng; hunaibaly khumi leaungrei ly kajeu alam iy khumi leaungrei ly pavui lawh.

²²Ati mana nai sai mo? Nangchi ly cha ai nai nei ai nai yhm by y nai sai a? Ti y baly nangchi ly Tameuh i palau takhra kamkawm ai tahm khai u y nai, ati sai py by y naichi ai ly amthang hai u leaung lawh a? Nangchi teng y ati kang thui pi ai mo? Huni ra y ly kang palo ai a? Kang palo y leang.

²³Kai i leu kang thui pi pateang nai ly Tameuh teng i dengdairei kanga nai na a, huna nai Areng Isu ai patiu hai nai dym y ly mymy ly tako la i, kawn nai leu thui pajau iy theng baw theng bawi i,

²⁴“Hini ly kai i tlang, nangchi i vui kang pei nai; kai ai pany jo ai nai hini ly so u,” napi nai ly.

²⁵Hunai kamta teang dym biu cha pajau iy khau py la i, “Hini khau ly kai i thi y leu maikawm kangtha ne; nangchi nei nai tleirei kai ai pany jo ai nai hini ly so u,” napi nai ly.

²⁶Nangchi ly huni tako cha iy, khau py nei nai tleirei ly mymy ly ang jeu ali y ryrei ly Areng i dei naira pany jo nai ne.

²⁷Hunai deaungkho y ami py cha ai ataing y naimy tako cha nai mo, Areng i khau nei nai mo ngierei ly, Areng i tlang hawi thi y sum naira nga ai.

²⁸Hunaibaly khumi ami py amymy ai acham amang sy, huna iy tako cho sy, khau py nei sy.

²⁹Cha nai hawi nei nai keung ly Areng i tlang ai hawihai palai adawn y pasi lawh baly, amy i tlang tleaung y tara chih ai nai cha nei nai teu.

³⁰Hunai deaungkho y chy bo, nangchi theung y khumi neangneang ham y nai no angdo nai ly, i naichi py maidenrei khyh ny y leang.

³¹Na i py amychi ai hawihai palai adawn baly achi ai tara ang chih ai nai ny y ai.

³²Na i py achi ai tara ang chih ai nai awm lawh teu iy py, khaileaung pri hawi vanrei sum naira ngo y ai nai, achi ly Areng my ang parip naira y awm nai ne.

³³Hunai deaungkho y kai i amjo amnauchi awi, nangchi ly cha ai nai achu nai khala y ly leaung leaungrei aiajeng u.

³⁴Nangchi i achu nai ly tara chih naira y awm y ai nai, ami py kajeu alam baly amy i yhm y cho sy. Naibaly atiti takhra ly kai kang jeu nai khala y ka-vo kang dawn hai ai.