Read Khumi Chin I KORINTH 12 Bible Online

I KORINTH 12 - Khumi Chin bible

I KORINTH 12

¹Naibaly amjo amnauchi awi, phailo mang i atiti sa thai nairachi pei nai satang ly nangchi pany y ai nai kangai y leang.

²Nangchi ly Cheng Takhrachi ne nai thym khala y ly ati mana mo iy py ang pahawi nai ngierei ly, huni raawi by y nai mynchi mang y ang pahawi naira y awm u bo, nanai ly nangchi pany.

³Hunai deaungkho y ami py Tameuh i phailo mang i leu thui iy, Isu ly amsawi lawi nai ne, nanai tapi pajeu y; naibaly ami py Phailo Kachai y harei ny y baly Isu ly Areng ne, nanai tapi pajau y, nanai kang pany hai nai ne.

⁴Naibaly atiti sa thai naira pei nai takhra takhra awm; na i py Phailo ly vanrei khyh.

⁵Kry nai sai py takhra takhra awm, na i py Areng ly vanrei khyh.

⁶Kalop sa nai sai py takhra takhra awm na i py khumi bawibawichi ai ati cheaungkhang sa hai na keung Tameuh ly vanrei khyh.

⁷Na i py bawibawi chawn ahum ai nai Phailo amteng hai naira ly khumi leaung leaungrei teng y pei nai ne.

⁸Khumi leaungrei teng y ly Phailo i saho y cheng naira leu pei nai ne; khumi takhra teng y ly huni Phailo i saho y teang pany ai naira leu pei nai ne;

⁹naibaly khumi takhra teng y ly huni Phailo y teang ym naira pei nai ne; khumi takhra teng y ly Phailo vanrei y no hawi sa thai ai nai atiti sa thai naira pei nai ne;

¹⁰khumi takhra teng y ly atiti rengrang sa thai ai nairachi pei nai ne; khumi takhra teng y ly phailochi ai pany thai ai naira pei nai ne; naibaly khumi takhra teng y ly leu athai y nai takhra takhra thui thai ai naira pei nai ne; khumi takhra teng y ly leu athai y nai takhra takhra thui pi pachai thai ai naira pei nai ne;

¹¹na i py huni bawibawi ai ly Phailo vanrei teang nai my ly khumi leaung leaungrei teng y mymy i ngai nai kamta bawibawi paji iy sa nai ne.

¹²Tlang ly bomrei khyh, naibaly kangprei neangneang awm; naibaly tlang i kangpreichi bawibawi ly nawi iy py tlang ly bomrei khyh; Krista py hunai kamta ne teang.

¹³Achi bawibawi ly Judachi mo Krikchi mo, miseaung mo miseaung ny y nai mo, tlang bomrei y awm ai nai achi ly Phailo harei y baptisma nga bawibawi i, Phailo harei y ang nei hai bawibawi teang.

¹⁴Tlang ly kangprei harei khyh ny y leang, kangprei nawi parai veng.

¹⁵Kheu ly, “Kai ly kiu ny y nai deaungkho y kai ly tlang y abawi nai ny y leang,” ti khyly, huna nai deaungkho y tlang y abawi y lawh nai ny y leang.

¹⁶Naibaly kano ly, “Kai ly mei ny y nai deaungkho y kai ly tlang y abawi nai ny y leang,” ti khyly, huna nai deaungkho y tlang y abawi y lawh nai ny y leang.

¹⁷Tlang bom verei ly mei ne bebe iy khyly, tyn thai ai naira ly ma mang y awm ai mo? Bom verei tyn thai naira ne bebe iy khyly, mui thai ai naira ly ma mang y awm ai mo?

¹⁸Na i py vai ly Tameuh my mymy i ngai nai ngierei y kangprei ha harei ai ly tlang y khai bawibawi nai bo.

¹⁹Hunaibaly hunichi bawibawi ly kangprei harei chy ne khyh iy khyly, tlang ly ma mang y awm ai mo?

²⁰Ne mang ly kangprei nawi parai veng, na i py tlang ly bomrei khyh.

²¹Naibaly mei ly kiu teng y, “Kai ly nang ai aly by y leang,” tapi pajau y; lu py kheu teng y, “Kai ly nang ai aly by y leang,” tapi pajau y.

²²Ne, huna ai nai tleaung y ly tlang kangprei ham y kyh nai amny naichi ly khri pa-rei aly len keh nai ne;

²³naibaly tlang kangprei achi my tahm khai ai ataing y naichi, hunichi kypkyp ai ly achi ly tahm khai keh lawh; naibaly achi i kangprei apu y naichi ly khri pa-rei apu naira nga u lawh; na i py apu naichi ly hunai kamta nga ai nai aly ngai y leang.

²⁴Tlang y ly akhawi takhra naira awm y naimy, kangpreichi ly vanrei atawm khyp pa-rei my akry bawibawi ai nai,

²⁵Tameuh my apu naira by y nai kangprei ai ly tahm pasang keh lawh iy tlang ai ly padyh achu veng bo.

²⁶Hunaibaly kangprei harei my patang baly kangprei bawibawi my patang hai; kangprei harei ai tahm pasang baly kangprei bawibawi my kawn hai.

²⁷Hunaibaly nangchi ly Krista i tlang ne i, huni i kangpreichi ne bawibawi teang.

²⁸Naibaly Tameuh my phyreichi ai ly palau takhra kamkawm theung y khai i, harei naira y ly amtaw thau naichi, pa-nyh naira y ly leu thui nai keungchi, pa-thom naira y ly patiu nai keungchi, huni bo y ly atiti rengrang sa naichi, huni bo y ly no hawi sa thai ai nai atiti sa thai nairachi, sabawm nai keungchi, peang kawp naichi, leu thai y nai takhra takhra thui thai naichi, hunichi ai khai bo.

²⁹Bawi bawi ly amtaw thau nai ne bebe a? Bawibawi ly leu thui nai keung ne bebe a? Bawibawi ly patiu nai keung ne bebe a? Bawibawi ly rengrang sa thai nai keung ne bebe a? Bawibawi ly no hawi sa thai ai nai atiti sa thai naira awm naichi ne bebe a?

³⁰Bawibawi ly leu athai y nai thui bebe a? Bawibawi ly leu thui pi pachai bebe a?

³¹Na i py nangchi ly atiti pei naira len keh naichi ai phai khri pa-rei hui u. Naibaly kai ly nangchi ai hawi tleaung y hawi ra nai lam kang patei ai.