Read Khumi Chin I KORINTH 15 Bible Online

I KORINTH 15 - Khumi Chin bible

I KORINTH 15

¹Naibaly amjo amnauchi awi, Satang Kahawi kang thui pi nai ly kang pany hai bi ai; nangchi ly huni ai kawn u nai, hunira y ly angdo u iy,

²kai i leu kang thui pi nai ly nangchi ly ym u rumrang nai ny y iy hawihai patawm u cheng baly, hunira y nangchi ly hengra nga u dudu nai bo.

³Angchei i kai i kanga nai py kang thui pi pateang nai bo, huna nai Krista ly Tameuh i cha-iu leu kamta my achi i kamngo nai deaungkho y dei i up bo;

⁴naibaly Tameuh i cha-iu leu kamta mymy ai kani thomrei kani y pathau i, Kipha teng y amteng;

⁵huni bo y ly amjo amnau holai nyhreichi teng y amteng bi;

⁶huni bo y ly amjo amnau chungvai pangrei chang y naichi teng y py amteng bi, hunichi theung i khumi nawi keh naichi ly vai khrairei heng rai; na i py phyreichi ly i ngym veng bo;

⁷huni bo y ly mymy ly Jakob teng y amteng bi; huni bo y ly amtaw thau naichi bawibawi teng y amteng bi;

⁸naibaly kangkhym kangtem y kai ai ly neng y nai khala y ang tapen nai kamta kaimy teng y py amteng bo.

⁹Ati mana nai mo nabaly kai ly amtaw thau naichi theung y theang keh nai, Tameuh i palau takhra kamkawm ai ka-na nai deaungkho y kai ly amtaw thau nai khumi pathi ai nai py ataing y leang.

¹⁰Na i py Tameuh i pahen nai saho y ataing nai kalawn bo; naibaly pahenra ang pei nai ly jawm sum nai by y; huna nai tleaung y ly kai ly nichi bawibawi tleaung y sa nai akawm keh; na i py kai i sa nai ny y leang, Tameuh i pahenra kai teng y awm nai i sa nai teu.

¹¹Hunaibaly kai py ne sy, nichi py ne sy, kaichi ly huna nai leu thui iy nangchi py huna nai ym teang.

¹²Naibaly Krista ai kadeichi theung i nai pathau nai awm bo, nanai leu thui makho nai iy, ati mana nai nangchi theung y phyreichi ly kadeichi angthau bi ai nai ly pipi by y leang. na u lawh mo?

¹³Na i py kadeichi angthau bi ai nai ly pipi by y leang nabaly, Krista ai py pathau nai by y leang bo;

¹⁴naibaly Krista ai pathau nai by y baly, achi i leu thui nai ly ati sai py ny y i, nangchi i ym nai py ati sai py ny y leang.

¹⁵Tameuh my Krista ai pathau, nanai achi pany hai nai deaungkho y, achi ly Tameuh ai pany hai nai keung ka-chawi tla bo; kadeichi ai pathau nai by y baly, mymy ai py pathau y nai jau chy.

¹⁶Kadeichi ai pathau nai by y baly Krista ai py pathau nai by y leang bo;

¹⁷naibaly Krista ai ly pathau nai by y baly, nangchi i ym nai py ati sai py ny y i, nangchi ly nangchi i kamngo naira y awm u jojo rai.

¹⁸Huna nai ne baly Krista y i ngym naichi py tama pawn bo ngaw khyh.

¹⁹Achi ly hini heng nai sala chy y Krista ai athang khai naira awm khyh baly, khumi bawibawichi tleaung y ly achi ai pahen ai nai awm keh ai.

²⁰Na i py Krista ai ly kadeichi theung i dengdairei pathau nai awm khyp nai bo i, i ngym naichi theung i angthau man nai keung lawn bo.

²¹Khumi deaungkho y dei nai awm i, khumi deaungkho y kadeichi angthau bi nai py awm teang.

²²Adam y ly khumi bawibawichi dei nai kamta ly, Krista y ly khumi bawibawichi ai ang paheng teang ai.

²³Na i py leaung leaungrei ly amymy i ka-thui ka-thui awm ai, Krista ly angthau man nai keung, huni bo y ang jeu bi nai kha y ly Krista i ngiereichi.

²⁴Hunaibaly mymy ly peang naira bawibawi hawi, aly peang naira hawi, atiti sa thai naira bawibawichi ai tama hai iy, Tameuh teng y, Ampo kypkyp teng y ly peang naira ang pei nai bo y ly neng tem veng ai bo;

²⁵ati mana nai mo nabaly mymy ly mymy i paleung ka-e bawibawichi ai mymy i kheu anui y khai y ryrei ly, ni ly peang ai nai tla yb nai ne.

²⁶Kangkhym kangtem i tama hai ai nai paleung ka-e ai ly dei naira ne he.

²⁷Ni ly mymy i kheu anui y ati cheaungkhang ai khai veng. Na i py, “Mymy i anui y ati cheaungkhang ai khai veng,” nanai ly, anui y ati cheaungkhang khai pi nai keung ly abawi y leang, nanai amny bo.

²⁸Naibaly Tameuh ly cheaungkhangra y ati cheaungkhang ne thai ai nai, mymy i anui y ati cheaungkhang ai khai pi veng nai khala y ly, Chapo kypkyp ai py mymy i anui y ati cheaungkhang ai khai pi nai keung i anui y awm teang ai.

²⁹Hunai kamta ny y baly kadeichi i jeng y baptisma nga naichi ly mana sa ai mo? Kadeichi ai pipi pathau nai by y baly, nichi ly ati mana nai mymychi i jeng y baptisma nga u lawh mo?

³⁰Ati mana nai kaichi py neng tleirei y ka-jei awm naira y kaawm u lawh mo?

³¹Amjo amnauchi awi, kai ly kathui khyp nai bo, Krista Isu achi i Areng y kai i nangchi ai amlyh naira y ly kani tleirei kadei jojo kana nai ne.

³²Kai ly khumichi i sa nai kamta Ephesi avang i mawi kasichi hawi ani nai ne baly, kai i vui ati amran ai mo? Kadeichi ai pathau nai by y baly cho nei u sina bei, achi ly khawndam dei ai chy bo.

³³Tapawp naira y awm u moh. Ahawi hawi y naichi ly awm nai sai kahawi taphra reng.

³⁴Hawi ai naira y anglaw u jau, kamngo so u moh; phyreichi ly Tameuh ai pany naira pipi by y he; hini ly nangchi ai kaji hai ai nai kang thui pi nai ne.

³⁵Na i py ami mo ly, “Kadeichi ai ly mana pathau nai awm ai mo? Nichi i tlang ly mana nai ka-tawm apu nai ang jeu ai mo?” nanai na ngaw khyh.

³⁶Kamthu awi, nangmy kypkyp i tiu reng nai py dei vui y rai baly paheng y pui chy bo;

³⁷naibaly nang i tiu reng nai ly nang ly tlang awm ai nai ly tiu y i, amai my tlairei choh amai mo, amjy takhra amai mo ne pajau;

³⁸na i py Tameuh my mymy i ngai nai kamta huni teng y tlang pei bo, amai bawibawi teng y py mymychi i tlang pei bawibawi teang.

³⁹Ngan bawibawi ly ngan vanrei ny y leang; khumi i ngan ly takhra, mawi i ngan ly takhra, tavo i ngan ly takhra, ngo i ngan ly takhra.

⁴⁰Kani mang i tlangchi py awm, khaileaung mang i tlangchi py awm teang; na i py kani mang i tlang i nang parai nai sai ly takhra,

⁴¹khaileaung mang i py takhra; kanito i nang parai nai sai ly takhra, lo i nang parai nai sai py takhra, ka-sichi i nang parai nai sai py takhra; ka-si ri ri y py nang parai nai sai y ly atawm bawi y leang.

⁴²Kadeichi i angthau bi nai sai py huna nai kamta atawm teang, Veaung thai nai tiu nai awm; veaung thai y nai pathau nai awm;

⁴³tahm khai y nai tiu nai awm; nang parai nai pathau nai awm; ham y nai tiu nai awm; atiti sa thai naira awm nai pathau nai awm;

⁴⁴khumi i tlang mang y tiu nai awm; phailo mang i tlang y pathau nai awm. Khumi mang i tlang awm baly, phailo mang i tlang py awm teang.

⁴⁵Hunai kamta khyp teang, “Angchei i khumi Adam ly kangheng lawn,” nanai tajiu nai ne. Kangkhym kangtem i Adam ly hengra pei nai keung phailo lawn.

⁴⁶Na i py phailo mang i nai ly awm man y leang, khumi mang i nai ly awm man lawh veng; huni bo y ly phailo mang i nai ly awm.

⁴⁷Angchei i khumi ly khaileaung i khumi ne, khaileaung hawi sa nai ne; pa-nyh i khumi ly kani mang i ne.

⁴⁸Khaileaung hawi sa naichi ly khaileaung i khumi kypkyp ne; kani mang i sa naichi ly kani mang i khumi kypkyp ne.

⁴⁹Naibaly achi ly khaileaung hawi sa nai khumi atawm khyp naira nga nai kamta, achi ly kani mang i sa nai khumi atawm khyp naira nga teang ai nai tla.

⁵⁰Amjo amnauchi awi, ngan hawi thi ly Tameuh i pri amtym pajau y leang; veaung thai nai ly veaung thai y nai amtym pajau y leang, nanai kathui nai teu.

⁵¹Khen cham, nangchi ai leu kathiu kang thui pi nai he; achi bawibawi ly i ngym y ai, na i py achi bawibawi ai ly kangkhym kangtem i baw tyn nai khala y ly kra y nai sala chy y, mei amsymrei ny y nai sala y my ang takhra hai bebe ai;

⁵²ati mana nai mo nabaly baw ly tyn ai, hunai khala y ly kadeichi ai ly veaung thai y naimy pathau nai awm ai i, achi ai py ang takhra hai ai.

⁵³Ati mana nai mo nabaly hini veaung thai nai ly veaung thai y naira y akhiu ai nai tla, hini dei thai nai py dei thai y nai akhiu teang ai nai tla.

⁵⁴Hunaibaly hini veaung thai nai ly veaung thai y naira akhiu ai nai khala y hawi, hini dei thai nai ly dei thai y naira akhiu ai nai khala y py, huni neng khypkhyp y ly, “Pajau naira my deira ai pajawn be bo,” nanai tajiu nai ly tym khyp ai. Aw deinaira, nang i pajau naira ly ma mang y awm veng mo? Aw dei naira, nang i thailai ly ma mang y awm veng mo?

⁵⁵Aw dei naira, nang i pajau naira ly ma mang y awm veng mo? Aw dei naira, nang i thailai ly ma mang y awm veng mo?

⁵⁶Dei nai thailai ly kamngo ne, naibaly kamngo i sa thai naira ly Reita leu ne;

⁵⁷na i py achi i Areng Isu Krista i saho y pajau naira ang pei nai keung Tameuh teng y ly kawn nai leu tym sy.

⁵⁸Hunai deaungkho y kai i amjo amnau ngai parai naichi awi, khaw parai pa-rei, amchyh lei y pa-rei my Areng i kalop y ly sa ra sa ra jojo ai nai awm u, nangchi i sa akawm nai ly Areng y ly jawm sum vai y, nanai nangchi pany.