Read Khumi Chin I KORINTH 8 Bible Online

I KORINTH 8 - Khumi Chin bible

I KORINTH 8

¹Naibaly vai ly myn y atiti apathyp nai huni satang ly. Achi ly pany naira awm bawibawi, nanai apany. Pany naira my ly paleung len hai reng, na i py tamen naira my ly veang hai reng.

²Khumi ami py atiti mo pany, nanai athang akhai baly mymy ly mymy i pany ai nai ka-tawm pany y leang rai;

³na i py ami py Tameuh ai tamen baly mymy kypkyp ai ly ang pany.

⁴Hunaibaly myn y apathyp nai atiti cha nai leu ly pathang si. Khaileaung pri y myn, nanai ly ati sai py ny y nai sai hawi, leaungrei ny y baly Tameuh takhra ha py by y nai sai ly achi pany.

⁵Kani mang y mo, khaileaung y mo, tameuh nanai apu naichi neangneang awm iy py (hunai kamta tameuh neangneang hawi areng neangneang awm) achi i vui ly Tameuh harei awm khyh,

⁶huni ly Ampo ne; mymy teng i dengdairei ati cheaungkhang theu iy, achi py mymy i vui y awm nai ne; naibaly Areng leaungrei, Isu Krista ly awm teang, mymy deaungkho y ati cheaungkhang awm i, achi py mymy deaungkho y awm nai ne.

⁷Na i py huni pany naira ly khumi bawibawi y by y leang; phyreichi ly vai khrairei myn y dawn nai awm jo nai deaungkho y myn y apathyp nai pany nai iy cha u lawh; hunaibaly mymychi i hawi nai hawi y nai pany naira ly ham y nai deaungkho y chai y bo.

⁸Nai py cha ai nai ly Tameuh ai mei ang ngai hai y lawh nai ny y leang, cho y iy py achi hawi y lawh ai nai ny y leang, cha iy py achi hawi y lawh ai nai ny y leang.

⁹Na i py amkym u, ti y baly hini, nangchi i ngai nai sa nai my ly atiti ra y ham y naichi i vui atlym naira awm lawh na.

¹⁰Ami py nang, pany naira awm nai khumi ai myn y chiu nai yhm y biu o nai ang niu iy, mymy ly ham y nai khumi ne i khyly, mymy i hawi nai hawi y nai pany naira ly myn y atiti apathyp nai ly cha ai nai vam y ai a?

¹¹Hunaibaly nang i pany naira y ham y nai khumi ly tama ai bo; naibaly huni amjo amnau i jeng y Krista dei pi bo.

¹²Naibaly nangchi ly amjo amnauchi i tlang tleaung y hunai kamta hawi y naira sa iy, nichi i hawi nai hawi y nai pany naira ham y nai ai tamo nga hai nai ly, Krista i tlang tleaung y hawi y naira sa u nai ne.

¹³Hunai deaungkho y cha ai nai ly kai i amjo amnauchi ai atlym hai baly, kai i amjo amnau ai atlym hai y ai nai deungtasa khrairei den py mawi kacho y ai.