Read Khumi Chin II KORINTH 1 Bible Online

II KORINTH 1 - Khumi Chin bible

II KORINTH 1

¹Pawla, Tameuh i kangai y Krista Isu i amtaw thau nai hawi achi i amjo amnau Timothei ly, Korinth avang i Tameuh i palau takhra kamkawm teng y hawi, Akaia pri verei y khumi kachai awm nai bawibawichi teng y py:

²Tameuh achi i Ampo hawi Areng Isu Krista teng i dengdairei pahenra hawi awmnem naira py nangchi teng y awm sy.

³Achi i Areng Isu Krista i Tameuh hawi Ampo, pahen nai Ampo hawi awm hai nem nai Tameuh ai ly palo nai awm sy.

⁴Tameuh i kaichi ai awm hai nem naira kypkyp i saho y ly ami py atiti no patang naira awm iy py, kaichi ly nichi ai awm hai nem thai ai nai, mymy ly kaichi i patang naira bawibawi y ang awm hai nem reng.

⁵Naibaly Krista i patang nairachi ly kaichi i vui y aleu palai nai kamta ly, kaichi i awmnem naira py Krista i saho y aleu palai nai ne.

⁶Na i py kaichi patang naira awm baly, huni ly nangmychi i awmnem ai naira hawi paheng ai nai vui ne; kaichi awmnem naira awm baly, huni ly nangmychi i awmnem ai nai vui ne; huni my ly kaichi i ngari patang nai sai kamta nangchi py vanrei patang teang iy, pajau tanga pa-rei kham pajau ai nai ang sa hai nai ne:

⁷naibaly nangchi ly ngari patang naira phy nga u teang nai kamta ly, nangchi ly awmnem naira py phy nga u teang, nanai kaichi pany iy, nangchi ai athang kang khai naira khaw parai nai ne.

⁸Amjo amnauchi awi, Asia pri y kaichi i tlang tleaung y ngari patang naira tym nai molam y ly nangchi pany y ai nai kang ngai hai y leang, huna nai kaichi ly khrikhri pa-rei kham pajau y nai, heng ai nai py athang khai y nai pa-rei ang ti nai ne.

⁹Ne, amy ai py aym y nai, Tameuh, kadeichi ai pathau nai keung ai ly ym pajau ai nai, kaimychi y ly dei ai nai leu atlym bo.

¹⁰Mymy ly huna tanrei deira y kaichi ai khri pa-rei ama hai bo, ne ama hai bi ai rai; vai py ama hai veangveang ai, nanai kaichi ly mymy ai athang khai cheng bo;

¹¹naibaly khumi neangneangchi i saho y kaichi i tlang tleaung y sa thai naira ang pei nai deaungkho y, khumi neangneangchi ly kaichi i tlang tleaung y kawn nai leu thui u thai ai nai, nangchi py kaichi ai chiu sa pi naira y aso hai adyh preuh.

¹²Kaichi i amlyh naira ly hini ne he, naibaly kaichi i hawi nai hawi y nai pany naira ly pany hai bo; kaichi ly chai naira hawi Tameuh i meitang naira y (tlang i cheng naira y ny y naimy Tameuh i pahenra y), khaileaung pri y awm nai sai kahawi awm u bo, nangmychi i mo y py hawi tleaung hawi ra bo.

¹³Ati mana nai mo nabaly nangchi i phain reng nai pany thai nai ny y baly kaichi ly nangchi teng y sai py tajiu y leang;

¹⁴achi i Areng Isu Krista i kani y ly kaichi ly nangchi ai amlyh naira palawn nai kamta ly, kaichi py nangchi i amlyh naira lawn ai, nanai nangchi phyreichi ly kaichi ai pany thai teang nai kamta ly tem pa-rei kaichi i leu ly nangchi pany thai ai nai athang kakhai teang.

¹⁵Naibaly kai ly huni deaungkho y ym iy, nangchi ly tamen naira ly vai tlenrei nga u bi thai ai nai, nangchi teng y kang jeu manme iy khyly katau;

¹⁶naibaly nangmychi ai de nai tarawi y Makedonia pri y kachei veangveang nai, Makedonia pri i dengdairei nangchi teng y ali teang nai, Judai pri y kai i chei ai naira y nangmychi my kai ai pavum iy khyly kana kai ly.

¹⁷Hunaibaly kai i paleung hunai kamta awm nai thym khala y ly kai i paleung khaw y nai sai kamteang hai a? Ti y baly Ne Ne, nanai hawi, Ny y Ny y, nanai ly kai teng y awm mei ai nai kai i atiti sa ai tau reng nai ly tlang i sa nai kamta ly kasa ai tau nai a?

¹⁸Ati py ne sy, Tameuh my ka-ym awm nai kamta nangchi mang y kaichi i leu ly Ne, nanai hawi, Ny y, nanai ly ne mei y leang.

¹⁹Ati mana nai mo nabaly Tameuh i Chapo Isu Krista, mymy i satang kai hawi Silvana hawi Timothei py nangchi theung y kaichi my kang thui pi nai ly, Ne, nanai hawi, Ny y, nanai ly ne mei y leang, na i py mymy y ly Ne, nanai awm.

²⁰Tameuh i leu adeu naichi ly majirei py ne sy mymy y ly Ne, nanai awm; hunaibaly kaimychi deaungkho y Tameuh ai tahm pasang ai nai, mymy deaungkho y Amen, nanai ly awm nai ne.

²¹Naibaly Krista y nangmychi hawi vanrei kaichi ai khaw hai nai khai takhra nai keung my ly Tameuh ne;

²²mymy ly achi ai ang pajawp hai typ nai keung hawi, achi i paleung theung y achi ai Phailo ang pei yb nai keung py ne teang.

²³Na i py kai i phailo pany hai ai nai vui ly Tameuh ai kapalau nai teu, kai ly Korinth avang y chei y pasi lawh nai ly nangmychi ai patang hai y ai nai ne.

²⁴Kaichi ly nangchi i ym naira y peang ai naira nga kana nai ny y leang, kaichi ly nangchi i kawn ai naira y naini kang sabawm hai nai keung ne kang napi nai teu; nangchi ly ym naira y angdo u nai ne.