Read Khumi Chin II KORINTH 10 Bible Online

II KORINTH 10 - Khumi Chin bible

II KORINTH 10

¹Naibaly kai Pawla kypkyp, nangchi theung y awm khala ly nangchi i mei ka-niu y leu anui parai nai kaawm i, nangchi teng y awm y nai khala ly nangmychi ai vam nai ly, Krista i leu kanem hawi neaung hawi naira y kang takeng nai ne;

²ne, nangchi teng y kang awm nai khala y kaichi ai tlang y tako nai kamta ang palawn nai phyreichi i tlang tleaung y vam parai naimy awm ai katau vam nai kamta ly, nangchi ai kang vam ai nai tlo y ai nai kang takeng.

³Kaichi ly tlang y tako teu iy py tlang y atiu nai kamta atiu y leang

⁴(kaichi i tavai ateaungchi ly tlang y awm nai ny y leang, apai khaw parai naichi aphrei ai nai ly Tameuh i saho y atiti sa thai nairachi ne);

⁵aei nairachi hawi Tameuh ai pany naira paka ai nai tahm asang parai nairachi ai py aphrei iy, dawn naira cheaungkhang ai ly Krista i leu tangai nai miseaung y hawi nai ne;

⁶nangchi i leu tangai nai sai angym nai khala y ly, leu tangai y naira bawibawi pajeng ai nai kaichi ly tau rym teang ai.

⁷Nangchi ly nangchi i mei ka-niu y atiti awm naichi ai khen u lawh nai ne. Ami py, Kai ly Krista i ne, nanai aym baly, hini ly amymy adawn bi sy: mymy ly Krista i ne nai kamta ly kaichi py ne teang he.

⁸Kaichi i aly peang nai molam y khri pa-rei kamlyh ra i py (huni ly nangchi ai aphrei ai nai vui ny y leang, nangmychi ai khaw hai ai nai Areng my ang pei nai ly) kai ly amthang leaung lawh y ai.

⁹Kai i cha pa naichira y kang jei hai tau nai kamta kamteang y ai nai kangai.

¹⁰Ati mana nai mo nabaly nichi ly, “Mymy i cha pa naichi ly ji py ji, ho py ho; na i py mymy i mo ly tahm by y, mymy i leu katheu nai py kaneng by y,” napi.

¹¹Huna nai khumi ly hini ly dawn sy, kaichi ly nangchi teng y awm y nai thym khala y cha y kang pa nai leu y kaichi ly awm nai kamta, kaichi ly nangchi teng y awm nai khala y py atiti sa naira y awm teang.

¹²Phyrei amymy ai kahawi athui naichi theung y ly kaichi ly akati py akati tabawi vam y leang, mymychi hawi apata py apata vam y leang; na i py nichi ly amymy hawi amymy ai ane nai, amymy hawi amymy ai apata iy, pany thai naira by y.

¹³Kaichi ly kaichi i jyh hawi khyp nai bo y ly amlyh y leang, na i py Tameuh my kaichi ai ka-peang ang pei nai jyh kamta ly amlyh ai, nangchi ai py kup rau ai nai pa-rei jyh ly.

¹⁴Nangchi ai pho pajau y nai kamta kau ala nai angam nai ny y leang. Ati mana nai mo nabaly kaichi ly Krista i Satang Kahawi y nangchi teng y khrairei kang jeu manme nai ne.

¹⁵Kaichi ly jyh hawi khyp nai bo y ly khumi takhrachi i sa akawm naira y ly amlyh y leang; na i py khumi takhra i ka-peang y sa rym nai angchi molam y ly amlyh y naimy, nangchi palem i pri y tym pa-rei Satang Kahawi thui pi thai ai nai,

¹⁶nangchi i ym naira veang ryh veang ryh iy kaichi i ka-peang ryrei ly nangchi theung y kaichi ly khri pa-rei sa nai patlaw jo y naimy awm ai, nanai athang khai nai teu.

¹⁷Na i py amlyh nai ngierei ly Areng y amlyh sy. Amymy ai kahawi athui nai khumi ly palo naira ngo y leang;

¹⁸Areng my kahawi thui nai naini palo naira nga nai teu.