Read Khumi Chin II KORINTH 11 Bible Online

II KORINTH 11 - Khumi Chin bible

II KORINTH 11

¹Kai i pathu kyh naira y ly nangchi my kham pi pajau ai nai kangai y! Ne, kai ai kham py kham pi kyh.

²Tameuh i takho hai naira kamta nangchi ai kang takho hai nai ne; kai ly nangchi ai Krista teng y ly anglo kachai kamta kang pei thai ai nai, juvo leaungrei angam pi na a.

³Na i py pavui my cheng tapawp naira y Evi ai parawi nai kamta ly, Krista mang y meitang nai hawi chai naira i dengdairei nai ly ati mo sa iy nangchi i paleung taphra lawh na, nanai kajei pahui nai ne.

⁴Ami my ang jeu nai, kaichi my kang thui pi vai y nai Isu takhra ai ly ang thui pi iy, nangchi ly phailo takhra ngo u vai y nai hawi, Satang Kahawi takhra kawn u vai y nai kawn u lawh baly, nangchi ly mymy ai kham pi ai nai avo napi lo-oh?

⁵Kai ly huni amtaw thau nai len keh naichi ai ly atira y py pho y ai nai athang kakhai y.

⁶Kai ly leu thui naira y kaneng by y iy py, pany naira y ly kai ly hunai kamta ny y leang; ne, ati cheaungkhangra y huni ly khumi bawibawichi theung y nangmychi mang y kaichi my amteng hai bo.

⁷Ti y baly Tameuh i Satang Kahawi ly jawm naimy kang thui pi ryry i nangchi tahm asang thai ai nai ka-panem nai ly, kai ly kamngo kasa nai ne lawh a?

⁸Kai ly nangmychi ai kang kry thai ai nai, palau takhra kamkawm takhrachi ai kaheung pi i, nichi teng i dengdairei vang kala.

⁹Naibaly nangchi teng y kang awm nai kai avaw nai khala y py, ami ai py myn kaji kapatei vai y; Makedonia pri i dengdairei jeu nai amjo amnauchi ly kai i avaw nai ly ang sabawm bo; kai ly ati cheaungkhangra y nangmychi ai myn ji kapatei y naimy ka-typ bo, naibaly kai ly hunai kamta ka-typ jojo ai.

¹⁰Krista i leu meitang kaimy teng y awm nai kamta ly Akaia pri mang y hini kai i amlyh nai ly kai ai ami py anawn hai y ai.

¹¹Ati mana nai y mo? Kai ly nangchi ai kang tamen y nai deaungkho y a? Tameuh my pany.

¹²Hunaibaly nichi i amlyh naira y ly nichi ly kaimychi i awm nai kamta awm u thai ai nai, avo naira nga ai ngai naichi teng i dengdairei avo naira ka-teng baw ai nai, kai i sa reng nai ly kasa veangveang ai.

¹³Huna nai khumi ly Krista i amtaw thau nai amlawn amang iy, amtaw thau nai tapawp naichi, tapawp nai kalop sa nai keungchi ne.

¹⁴Huni ly rengrang tlai nai ny y leang; Setan malawn py kangvang i amtaw thau nai amlawn amang reng.

¹⁵Hunai deaungkho y mymy i kalop sa nai keungchi py hawi naira i kalop sa nai keung y amlawn amang teu i py, rengrang tlai nai ny y leang! Hunichi i tem naira ly mymychi i atiti sa nai kamta tym ai.

¹⁶Kai ly kang thui pi bi ai, ami py kai ai kamthu palawn moh sy; na i py nangchi ly kai ai palawn makho baly, kai py maidenrei chy i py kamlyh thai ai nai, kai ly pathu nai kamta kai ai kham pi u.

¹⁷kai i thui nai ly Areng i kamta kathui y leang, kai i amlyh nai ym naira ly pathu nai kamta khyp my kathui nai ne.

¹⁸Khumi neangneangchi ly tlang mang y asa nai kamta amlyh u nai deaungkho y kai py amlyh teang ai.

¹⁹Nangchi ly khumi kacheng ne nai deaungkho y kamthuchi ai ly paleung hawi parai naimy kham pi reng.

²⁰Ami my nangchi ai miseaung ang palawn khyly, ang cho khrai khyly, miseaung y ang hawi khyly, amymy ai apalo khyly, nangchi i meimai y ang tabeang khyly nangchi ly kham pi reng.

²¹Kaichi ly atho so y nai kamta ne nai deaungkho y jei kaji nai kathui nai ne. Na i py ami py atira y py vam nai ngierei (pathu parai naimy thui teu sy ly), kai py kavam teang.

²²Nichi ly Hebraichi ne a? Kai py ne teang. Nichi ly Israelachi ne a? Kai py ne teang. Nichi ly Abraham i kangpreangchi ne a? Kai py ne teang.

²³Nichi ly Krista i kalop sa nai keungchi ne a? (Khumi kamthu kamta thui teu sy ly), kai naini ne keh; sa akawm naira y py khri pa-rei ty nanai, theaung y tla naira y py khri pa-rei ty nanai, ang pakhau naira y py khri pa-rei nawi nanai, dei naira py neangneang avum bo.

²⁴Judachi teng y tlenreira y pakhau naira tlen vui palyhrei harei jaw nai tlen pangrei ka-vum;

²⁵cheaungvawi y pakhau nai tlen thomrei ka-vum; tlenrei ly lengseaung y atum nai ka-vum, paleaung kawi nai py tlen thomrei ka-vum, vum y vumrei, kani y kanirei pangli y kaawm;

²⁶khuleaung neangneang chei naira y py, tavo takhra takhra ka-jei awm naira y py, damrachi ka-jei awm naira y py, kai i chengchi teng y ka-jei awm naira y py, Cheng Takhrachi teng y ka-jei awm naira y py, avang pui y ka-jei awm naira y py, daichi ka-vym y ka-jei awm naira y py, pangli y ka-jei awm naira y py, amjo amnau tapawp naichi theung y ka-jei awm naira y py;

²⁷sa akawm nai hawi myn kaji pho naira y py, i thai y nai tlen neangneangra y py, kajeu alam nai hawi tui ahai naira y py, tlen neangneang biu hai naira y py, tlang ka-keu awm nai padeng naira y py kaawm.

²⁸Naibaly atiti takhra kathui y i py, palau takhra kamkawm bawibawichi ai ka-dawn ryhryh naira my kani tlenrei kai ai angti jojo.

²⁹Ami my ham y nai ne baly kai py ham y nai ny y a? Ami ai atlym hai nai ne baly kai ly angveaung nai ny y a?

³⁰Kai ly amlyh ai nai makho baly kai i ham y nai mang i atitichi molam y kamlyh ai.

³¹Areng Isu i Tameuh hawi Ampo, deungrasarei palo jojo nai my ly kai i ka-chawi thui y nai sai ly ang pany.

³²Damaska avang pui i areng Areta anui i peang nai keung my ly kai ai ang patiu ai nai Damaska avang pui typ hai bo;

³³na i py thaibeng pa-kho mang apai jyh y saipa mang pala kathiu bo, hunaibaly ni i kiu i nai ly katleaung veng bo.