Read Khumi Chin II KORINTH 12 Bible Online

II KORINTH 12 - Khumi Chin bible

II KORINTH 12

¹Avo y i py kai ly kamlyh tanga ai nai tla: na i py Areng teng i dengdairei amteng hai naira hawi pany hai naira leu kathui patawm veangveang ai.

²Kai ly Krista i khumi leaungrei ai kapany, vai ly saneng holai palyhrei awm bo: mymy kypkyp ai ly pa-thom nai kani pri y la kalau bo (tlang y awm nai mo kapany y, tlang y ny y naimy awm nai mo py kapany y leang; Tameuh my pany.)

³Naibaly kai ly huna nai kamta khumi ai kapany, mymy ai ly Paradais mang y la kalau bo (tlang y awm nai mo kapany y, tlang y ny y naimy awm nai mo py kapany y leang; Tameuuh my pany);

⁴naibaly mymy ly leu thui pajau y nai, khumi i thui ngau y nai saichi thai.

⁵Huna kamta khumi i vui ly kamlyh pi ai: na i py kai i ham y nai sai ny y baly amy i vui y kamlyh y ai.

⁶Kamlyh ai ngai teu i py kai ly kamthu ny y ai; kai ly leu meitang khyp kathui ai; na i py kai ly amkym ai, ti y baly ami py kai ai ang niu nai kamta hawi, kai teng i leu thai nai kamta tleaung y kai ai tahm khai ala lawh na.

⁷Naibaly amteng hai nairachi ly khri pa-rei ty nanai deaungkho y tahm ka-pasang ala y ai nai, tlang y patho sprym ang viu hai nai ne, huni ly Setan i amtaw thau nai kai ai tapheu piupa nai ne, ti y baly tahm ka-pasang ala lawh na.

⁸Huni molam y ly kai ai ang heng pi vui thai ai nai kai ly Areng teng y tlen thomrei hnei bo.

⁹Naibaly mymy ly kai teng y, “Kai i pahenra ly nang i vui hawi khyp bo; ham y naira y ly kai i atiti sa thai naira ly angym bo,” napi. Hunaibaly Krista i atiti sa thai naira ly kai i tlang tleaung y awm thai ai nai, khrikhri pa-rei kakawn naimy kai i ham y naichi ra y ly kamlyh lawh ai.

¹⁰Hunai deaungkho y Krista i molam y ham y naira y py, kangji pei naira y py, rai naira y py, ana hai naira y py, dawn amchei naira y py kakawn lawh nai ne; kai i ham y naira tleirei y kaham lawh nai ne.

¹¹Kai ly pathu nai bo he: na i py nangchi my kai ai sa hai nai teu; kai ai ly nangmychi my palo ai nai chy bo; ati mana nai mo nabaly kai ly ati sai py ny y nai teu i py, ati mo ra y py huni amtaw thau nai len keh naichi ai kapho y nai ny y leang.

¹²Amtaw thau nai lawn nai ka-ma-rachi ly kham pajau naira cheaungkhangra y, ka-ma-rachi hawi, atiti rengrangchi hawi, atiti sa tha nairachi py nangchi theung y sa tatang nai bo.

¹³Kaimy kypkyp ly nangchi ai myn ji kang patei nai molam y ny y baly, nangchi ai palau takhra kamkawmchi tleaung y anui keh naira y sa hai nai ly ati awm mo? Huni teng y naira y ly kai ai pahen u kyh.

¹⁴Khen cham, hini ly nangchi teng y kang jeu ai nai tlen thomrei angveirym nai ne: naibaly kai ly nangchi ai myn ji kang patei y leang mang; ati mana nai mo nabaly nangmychi teng i nga ai nai kang hau nai ny y leang, nangmychi ai kang hau nai teu: chanauchi my ly amhm ampo i vui pateung pi achu ai nai tlo y leang, amhm ampo my naini chanauchi i vui pateung pi achu ai nai tla.

¹⁵Naibaly kai ly nangchi i phailo i vui khrikhri pa-rei kawn naimy kateaung be iy, kaimy ai kateaung be naimy awm ai. Kai ly nangchi ai khri pa-rei kang tamen nai deaungkho y, nangchi i kai ai tamen nai ly di kyh lo-oh? Ne.

¹⁶Na i py kaimy kypkyp ly nangchi ai myn ji kang patei y. Na i py kai ly tapawp nai khumi ryry ne iy, cheng tapawp naira y kang patiu bo napi.

¹⁷Nangchi teng y kang pato naichi theung y ly ami ai mo leaungrei teaung iy kai ly nangchi teng y kamran nga lawh a?

¹⁸Tita ai ly kapachei iy, mymy hawi vanrei huni amjo amnau ai pato bo. Tita ly nangchi teng y kamran nga nai sai a? Kaini ly paleung vanrei awm ahawi nai hawi, lawi vanrei khypkhyp y pavai ahawi nai ny y a?

¹⁹Kaichi ly nangchi teng y kaichi i eaung nai leu kang thui nanai, nangchi ly vai huni sala ryrei ly athang khai u ngaw khyh. Kaichi ly Tameuh i mei ka-niu y Krista y leu thui nai ne. Na i py ngai parai naichi awi, ati cheaungkhang ly nangmychi ai khaw hai ai nai ne.

²⁰Kai kang jeu nai khala y atiti mo ra y py, kai i ngai nai kamta kang niu y iy, kai ai py nangchi i ngai nai kamtaniu u y lawh na, nanai kajei chy bo; ti y baly atiti mo ra y py ajo naichi, akeng naichi, kado theu naichi, atakai naichi, apreaung naichi, arum paviu atyhtyh naichi, tahm apasang ala naichi, khrukhra naichi awm lawh na;

²¹ti y baly kai kang jeu bi nai khala y kai i Tameuh my nangchi i mo y kai ai tahm panem lawh na, naibaly angchei i atiti kamngo sa nai keungchi theung y atiti chai y nai py, angai nai py, paleaung nai py sa reng nai uikhei ngai y nai khumi neangneangchi ai kai ly vo hai lawh na.