Read Khumi Chin II KORINTH 13 Bible Online

II KORINTH 13 - Khumi Chin bible

II KORINTH 13

¹Hini ly kai nangchi teng y tlen thomrei kang jeu nai ne. Pany nai keung leaung nyhrei mo leaung thomrei mo i labeaung y leu ang khaw hai bawibawi ai.

²Kai ly angchei kha y kamngo sa nai keungchi ai hawi, khumi takhra bawibawichi teng y py kathuipi rym bo, naibaly tlen nyhrei kaawm nai thym khala y nichi ai kathuipi rym nai kamta ly, vai py nangchi teng y kang awm y naimy nichi ai kathuipi rym bi;

³Krista ly kaimy ai leu thui hai reng nai keung ne, nanai nangchi ly cham naira hau nai deaungkho y, kai ly jeu bi i khyly kang khai y leang; mymy ly nangchi teng y ham y nai ny y leang, nangchi theung y khri pa-rei atiti sa thai naira ne lawh veng.

⁴Ni ly ham y nai deaungkho y tahen naimy awm veng, na i py ni ly Tameuh i atiti sa thai naira deaungkho y heng nai ne. Kaichi py mymy y ly ham y nai ne, na i py nangmychi mang y Tameuh i atiti sa thai naira deaungkho y kaichi ly mymy teng y heng teang ai.

⁵Nangchi ly ym naira y awm u na mo, nanai nangmychi kypkyp my akaneu ly, nangmychi kypkyp my acham u. Ti y baly Isu Krista ly nangmychi teng y awm, nanai nangmychi kypkyp my hawihai palai pany u y nai sai a? Cham naira y eaung nai ne u y makho baly.

⁶Kaichi naini cham naira y eaung y naimy awm y leang, nanai nangchi ly pany u ai nai athang kakhai.

⁷Naibaly nangchi ly atiti hawi y nai ly den py so u y ai nai kaichi ly Tameuh teng y chiu sa; huni ly kaimychi i hawi naira amteng hai thai ai nai ny y i, nangchi ly apu nai ngierei sa u thai ai nai teu, kaichi ly cham naira y eaung y nai kamta awm lawh teu iy py.

⁸Leu meitang i vui y ny y baly kaichi ly leu meitang ai paka ai nai ati sai py so thai y nai ne.

⁹Kaichi ly ham y nai thym khala y ly nangchi i ham naira deaungkho y kaichi ly kawn chy bo; huni py nangmychi i hawi angym ai naira awm ai nai chiu kang sa pi.

¹⁰Hunai deaungkho y taphra hai ai nai ny y i, khaw hai ai nai kai ai Areng i aly peang naira ang pei nai kamta ly, kai ly nangchi teng y kang awm nai khala y nangchi ai ryh patyh pa-rei kang parip y ai nai, kai ly nangchi teng y awm y rai khala y ly hini leu katajiu nai ne.

¹¹Kangkhym i naira y ly amjo amnauchi awi, noso kahawi awm u. Kahawi sa angym naimy awm u, paleung awmnem naimy awm u, paleung vanrei awm u, adyh parai naimy awm u ly; hunaibaly tamen nai hawi aly nai Tameuh ly nangchi teng y ang awm hai ai.

¹²Apachawm nai kachai y akawn u.

¹³Khumi kachai bawibawichi ly nangchi ai kawn nai leu ang thui pi.

¹⁴Areng Isu Krista i pahenra hawi, Tameuh i tamen naira hawi, phailo kachai i amkawm naira py nangchi bawibawi teng y awm sy.