Read Khumi Chin KALATIA 5 Bible Online

KALATIA 5 - Khumi Chin bible

KALATIA 5

¹Krista my ly miseaung ny y ai nai ang patheu jau chy bo; hunaibaly khaw pa-rei angdo u ly, miseaung i langvui savan y ly atang u reng moh jau.

²Khen cham, kai Pawla nangchi teng y leu thui pi nai ly, lengkhym takip hai u baly Krista ly nangchi i vui ati sai py kamran by y ai.

³Ne, Reita i leu bawibawi patawm ai nai awm nai keung ne, nanai lengkhym takip hai nai ngierei teng y kang pany hai bi nai he.

⁴Nangchi Reita y eaung ai nai tau nai keungchi awi, nangchi ly Krista hawi amprei u bo: nangchi ly pahenra ai ly atlym pi u veng bo.

⁵Achi ly Phailo i saho y ym naira deaungkho y hawi naira i athang khai naira ajeng nai ne.

⁶Krista Isu y ly lengkhym takip nai py, takip y nai py ati sai py kamran by y leang; ym naira y ly tamen naira deaungkho y atiti sa nai naini kamran awm nai teu.

⁷Nangchi ly hawihai palai angpreng u veng chy bo; nangchi ai ly leu meitang patawm y ai nai ami my ang paka mo?

⁸Hini parawi naira ly nangchi ai ang palau nai keung teng i dengdairei ny y leang.

⁹Angbo maidenrei chy naimy tako phi verei num be veng.

¹⁰Nangchi i dawn nai ly takhra lawh y leang, nanai kai ly nangchi ai Areng y ly kang ym nai ne; na i py nangchi ai khrukhra hai nai keung ly ami py ne sy, mymy i tlang tleaung y leu atlym nai ly patang ai.

¹¹Na i py amjo amnauchi awi, kai ly lengkhym takip nai leu kathuipi jojo makho baly ati mana nai kai ai ly ana jojo mo? Hunai kamta ne baly kraws i paka nai sai tama hai bo.

¹²Nangchi ai khrukhra hai nai keungchi ly ataphra u tlam tlam i khyly kangai nai ne.

¹³Amjo amnauchi awi, nangchi ai ly miseaung ny y ai nai ang palau u nai ne; na i py nangchi i miseaung ny y naira ly tlang i vui ka-vo teaung u reng moh ly, tamen naira y phai asabawm u leungtang.

¹⁴Ati mana nai mo nabaly, “Nangmy ai atamen nai kamta ly nang i saleaungchi ai py tamen ai nai tla,” napi nai leu sairei naira y ly Reita bawibawi ly angym be veng bo.

¹⁵Na i py nangchi ly akei u iy acha u leungtang makho baly, atamo hai u leungtang y ai nai amkym u.

¹⁶Hunaibaly kai ly kang napi; Phailo y tako u, hunaibaly nangchi ly tlang i ngai phi teng y nai patawm u y ai.

¹⁷Tlang my ly Phailo ai tiu iy amymy ngaingai sa ai nai ngai: phailo py tlang ai tiu iy amymy ngaingai sa ai nai ngai; hunaibaly nangchi ly nangchi i atiti sa ai tau naichi ly so u thai y; hunini ly aawi hawi cheng vui veng.

¹⁸Na i py Phailo my nangchi ai pahawi baly, nangchi ly Reita i anui y awm u y leang mang.

¹⁹Naibaly tlang i atiti sa naichi ly hawihai amny; huni ly hinichi ne he;

²⁰angai naichi, chai y naichi, paleaung naichi, myn y chiu naichi, dawi sa naichi, aniu ngai y naichi, ajo naichi, atakho naichi, kado theu naichi, atakai naichi, amy ngaingai sa naichi, ym takhra naichi, akeng naichi,

²¹pavui naichi, mhm pawi y amo theu naichi, hunichi ka-tawm ly; huni sa reng naichi ly Tameuh i peang naira amtym u y ai, nanai jangni y kang thui pi rym nai kamta vai py kang thui pi rym nai he.

²²Na i py Phailo i athai ly tamen naira hawi, amo theu naira hawi, awmnem naira hawi, amnym naira hawi, neaung hawi naira hawi, hawi naira hawi, ka-ym awm naira hawi, leu anui naira hawi, amkym thai naira hawi ne;

²³hunai kamta aawi cheng y ai nai Reita leu pei nai ha py by y leang.

²⁴Naibaly Isu Krista i khumichi ly tlang hawi mymy i kamngo dawn naira hawi, ngai phi teng y naira hawi raurei tahen u veng bo.

²⁵Achi ly Phailo y heng nai ne baly, Phailo y tako u teang sina.

²⁶Apacheang leungtang iy, paleung ano nai tahm apasang u moh sina.