Read Khumi Chin EPHESI 5 Bible Online

EPHESI 5 - Khumi Chin bible

EPHESI 5

¹Hunaibaly mymy i chanau ngai parai naichi kamta Tameuh i amtiu nai khumichi lawn u.

²Naibaly Krista my ang tamen nai hawi, Tameuh teng y miu katui lawn ai nai atiti talam naira hawi apathyp naira y achi i jeng y ang pei nai kamta ly tamen naira y tako u.

³Naibaly khumi kachaichi nanai apu ai nai, angai nai hawi, chai y nai bawibawi hawi, atakaw nai hawi nangchi theung y thui py thui u reng moh;

⁴taheaung thui nai hawi, thui atyhtyh nai hawi, krawp nai py; hunichi ly apu y nai ne; hunichi thui nai tleaung y ly kawn nai leu phai thui u.

⁵Na i py angai nai khumi hawi, khumi chai y nai hawi, atakaw nai khumi ly (mymy ly myn y chiu nai keung ne), Krista hawi Tameuh i peang naira y ly amtym ai naira sai py ngo y leang, nanai nangchi pany u khypkhyp.

⁶Ami py leu ta chawm y naira y ly nangchi ai tapawp moh sy; huni atitichi deaungkho y Tameuh i kado theu nai ly leu tangai y nai chanauchi i tlang tleaung y tym reng.

⁷Hunai deaungkho y nichi hawi so u hum moh;

⁸ati mana nai mo nabaly nangchi ly jangni y kaveng ne, na i py vai ly Areng y ly kangvang lawn u bo:

⁹Areng i kawn nai ly ati mo, nanai cham iy, kangvang i chanauchi kamta tako u;

¹⁰ati mana nai mo nabaly kangvang i athai ly hawi naira hawi atiti kahawi sa naira hawi, leu meitang bawi bawi y py awm.

¹¹Naibaly kaveng i ti ti sa nai athai awm vai y naichi ai ly den py abawi u moh ly, huni tleaung y ly mymychi ai phai parip;

¹²mymychi i kangviu y atiti sa reng naichi ly thui ai nai py angji ngailai veng.

¹³Na i py parip naira y ly ati cheaungkhang ai kangvang my amteng hai nai ne: amny hai naira y awm nai ngierei ly kangvang ne.

¹⁴Hunai deaungkho y mymy ly, “I nai khumi awi, anglaw ly! Kadeichi theung i dengdairei angthau, Hunaibaly Krista my ly angvang hai ai mang,” napi.

¹⁵Hunaibaly nangchi ly khumi cheng y naichi kamta awm u y naimy, khumi kachengchi kamta awm u iy, nangchi i tako nai sai amkym u;

¹⁶neng hawi y nai deaungkho y ka-vo sa pi nai ai ly pasum moh.

¹⁷Huni deaungkho y nangchi ly chengra by y nai awm u moh ly, Areng i kangai ly ati mo, nanai phai pany u.

¹⁸Naibaly kreip athai hang pavui u moh, hunira y ly amkym pajau y naira awm lawh veng; Phailo kawi nai phai awm u;

¹⁹samchi hawi, khulymchi hawi, phailo ai kawn hai nai khulymchi py thui u ahawi iy, Areng ai ly nangchi i paleung y khulym thui pi nai taro beu pi u;

²⁰achi i Areng Isu Krista i amyn y Tameuh, Ampo kypkyp teng y ly ati cheaungkhangra y kawn nai leu thui u jojo.

²¹Krista ai tahm khai nai tarawi y nangmychi tengtawi aau u leungtang.

²²Ajuchi awi, Areng teng y aau nai kamta ly nangmychi i juvochi teng y aau u.

²³Krista mymy kypkyp ly tlang ai paheng keung ne iy, palau takhra kamkawm i lu ne nai kamta ly,. juvo ly aju i lu ne.

²⁴Hunaibaly palau takhra kamkawm ly Krista teng y aau nai kamta ly ajuchi ly ati cheaungkhangra y mymychi i juvochi teng y aau u sy.

²⁵Juvochi awi, nangchi i ajuchi ai tamen u; hunai kamta teang Krista ly palau takhra kamkawm ai tamen i,

²⁶tui y paju naira y hawi leu thui naira y py khai takhra iy chai hai thai ai nai hawi,

²⁷mymy ly palau takhra kamkawm ly anyng akau y nai hawi, aneaung y nai hawi, hunai kamta atitichi den py awm y naimy, chai nai hawi meimai cheh ai by y nai awm iy, amymy ai palau takhra kamkawm tahm asang parai nai apei amang thai ai nai py, huni i jeng y apei nai bo.

²⁸Hunai kamta khyp teang juvochi ly amymychi i tlang ai atamen nai kamta, amymychi i aju ai tamen ai nai tla. Amy i aju ai tamen nai keung ly amy ai atamen nai ne;

²⁹ati mana nai mo nabaly ami py amy i ngan ai aniu nga y nai awm vai y leang, na i py apacho py apacho i ako py ako; Krista py palau takhra kamkawm i tlang tleaung y hunai kamta sa teang;

³⁰achi ly mymy i tlang kangpreichi ne nai deaungkho y sa nai ne.

³¹Huni deaungkho y neampcho ly amhm ampo ai khai su iy mymy i aju ai amkhaw ai, naibaly nini leaung nyhrei ly ngan bomrei lawn ai.

³²Huni ly leu thiu parai; na i py kai ly Krista hawi palau takhra kamkawm i satang kathui nai teu.

³³Ati py ne sy nangmychi theung i leaung leaungrei ly amy ai atamen nai kamta ly amy i aju ai tamen bawibawi sy; aju py amy i juvo ai ly tahm khai ai nai amkhym sy.