Read Khumi Chin EPHESI 6 Bible Online

EPHESI 6 - Khumi Chin bible

EPHESI 6

¹Deaungdichi awi, Areng y ly ngamhm ngampo i leu tangai u; huni ly reita kateng ne.

²Ngamhm ngampo ai tahm khai, hunaibaly nangchi i vui hawi ai i, khaileaung y py heng sau u ai;

³(huni ly leu sai horei pei naichi theung y atiti adeu manme nai ne).

⁴Naibaly nangchi ampochi awi, nangchi i chanauchi ai kado patheu u reng moh; Areng i thui rip naira hawi parip naira y phai kry u.

⁵Miseaungchi awi, Krista i leu tangai nai kamta tahm khai nai hawi kaso theu naimy, sairei dawn nai paleung harei awm iy, nangchi i tlang i yhmkeungchi i leu tangai u;

⁶khumi ai kawn hai atyhtyh nai kamta salo y khumichi i mei ka-niu y sa nai ny y naimy, Krista i miseaung kamta paleung theung i nai Tameuh i kangai sa u iy,

⁷khumichi i mei ka-niu y ny y naimy, Areng i kalop sa nai kamta ngai parai nai tarawi y kalop so u;

⁸hunaibaly miseaung ne iy py miseaung ny y iy py, khumi leaung leaungrei mymy i atiti kahawi sa nai ngierei ly Areng teng i dengdairei nga teang ai, nanai pany u pajau.

⁹Naibaly nangchi yhmkeungchi awi, mymychi i hawi nangmychi i yhmkeung ly kani mang y awm, nanai hawi, mymy ly patle takhra nai by y nanai py pany u iy, ram y naimy nichi i tlang tleaung y so u teang.

¹⁰Kangkhym i naira y ly Areng y hawi mymy i atho y ly ham parai naimy awm u.

¹¹Diabola i parawi paryp naira y ly nangchi angdo u pajau ai nai, Tameuh i tavai ateaung kangym amthyp u.

¹²Ati mana nai mo nabaly achi i ani nai ly thi hawi ngan hawi ny y leang, na i py areng naira hawi, aly peang naira hawi, hini veng nai tleaung y khaileaung pri peang nai keungchi hawi, kani laileaung y awm nai vawinamchi hawi ani nai teu.

¹³Hunai deaungkho y nangchi ly kani hawi y nai khala y atiu u pajau ai nai hawi, nangchi sa u pajau bebe nai bo y angdo u pajau ai nai py, Tameuh i tavai ateaung kangym lo u.

¹⁴Hunaibaly akeng y leu meitang akawm u nai, hawi naira tangta ang i khupui py adang u iy,

¹⁵aly nai Satang Kahawi angvei rym naira ai ly kheu y pachu iy angdo u;

¹⁶huni ny y nai py ym naira khupui lo u ly, huni hawi ly kamngo sa reng nai keung i thai kangveaung bawibawi ai padei u pajau ai.

¹⁷Naibaly heng naira lukhym lo u ly, Phailo i haisau py lo u,

¹⁸huni ly Tameuh i leu ne; chiu sa nai hawi atiti takeng nai cheaungkhangra y mani neng khala y py Phailo y chiu so u; hunira y ly khumi kachai bawibawichi i vui hawihai palai chiu sa pi nai patlaw y naimy atyp u.

¹⁹Naibaly Satang Kahawi leu kathiu ly vam parai naimy pany hai ai nai, kai i labeaung kapeaung iy leu ang thui hai thai ai nai hawi,

²⁰hunira y ly kai i thui ai avo nai kamta vam parai naimy kathui thai ai nai hawi, kai i vui py hnei pi u kyh; kai ly huni Satang Kahawi deaungkho y sengkry pachu nai savai ne.

²¹Na i py nangchi py kai ly mana awm mo, nanai kai i satang pany u thai ai nai, Areng y amjo amnau ngai parai nai hawi, kalop sa nai keung ka-ym awm parai nai Tukika my ly, nangchi ai ly ati cheaungkhang ang pany hai ai mang;

²²hini deaungkho y nangchi ly kaichi i satang pany thai ai nai hawi, mymy ly nangchi i paleung ang awm hai nem thai ai nai py, mymy ai ly nangchi teng y kang pato nai ne.

²³Ampo Tameuh hawi Areng Isu Krista teng i dengdairei awmnem naira hawi ym naira abawi nai tamen naira py amjo amnauchi teng y awm sy.

²⁴Achi i Areng Isu Krista ai tamen nai rawm y nai bawibawichi teng y pahenra awm sy.