Read Khumi Chin PHILIPI 1 Bible Online

PHILIPI 1 - Khumi Chin bible

PHILIPI 1

¹Pawla nini Timothei Krista Isu i miseaung nini my ly, Krista Isu y khumi kachai Philipi avang i awm nai bawibawichi teng y hawi, palau takhra kamkawm peang naichi hawi, dikonchi teng y py pa nai:

²Tameuh achi i Ampo hawi Areng Isu Krista teng i dengdairei pahenra hawi awmnem naira ly nangchi teng y awm sy.

³Angchei i kani dengdairei vai khrairei Satang Kahawi ahei naira y nangchi ly abawi teang nai deaungkho y,

⁴kai i nangchi ai dawn vau nai tleirei y kai i Tameuh teng y ly kawn nai leu kathui reng,

⁵nangchi bawibawi ai chiu kang sa pi naira tleirei y amo theu parai naimy kahnei pi jojo.

⁶Ati mana nai mo nabaly nangmychi i paleung theung y atiti kahawi sa amteaung hai nai keung ly Isu Krista i kani tym pa-rei sa angym hai jojo ai, nanai, kai ly huni kypkyp ly ym cheng cheng veng.

⁷Naibaly nangchi ai ly kai i paleung y kang khai nai deaungkho y, nangchi bawibawi mang y kai hunai kamta paleung awm nai kai i vui avo nai ne; ati mana nai mo nabaly kai ai kawm naira y py Satang Kahawi ai eaung hai nai leu kathui naira y hawi, khaw hai naira y py nangchi bawibawi ly kai hawi vanrei pahenra nga ahawi naichi ne.

⁸Naibaly Isu Krista i paleung verei y pahen nai kamta nangchi bawibawi ai khri pa-rei kang ngai nai sai ly, Tameuh ly kai ai ang pany hai nai keung ne.

⁹Naibaly kai ly nangchi i tamen naira my pany angym naira hawi dawn pata kawp naira cheaungkhangra y awm nai tleaung y awm ra ai nai chiu kasa reng;

¹⁰hunaibaly nangchi ly atiti hawi keh naichi ai ly hawi, napi u thai ai nai hawi, Krista i kani i vui ly meitang hawi cheh ai nai by y nai py lawn u thai ai nai,

¹¹Tameuh ai tahm pasang ai nai hawi palo ai nai py, Isu Krista i saho y hawi naira athai nai ly kawi nai awm u.

¹²Naibaly amjo amnauchi awi, kai i tlang tleaung y atiti tym naichi ly Satang Kahawi ahei naira ne lawh, nanai nangchi pany ai nai kangai;

¹³Hunaibaly kai ai kawm nairachi ly Krista y ne, nanai praitorion tavaimi kamkawm bawibawichi theung y hawi khumi takhra bawibawichi teng y py amteng bo.

¹⁴Naibaly Areng y amjo amnau nawi kyh naichi py kai ai kawm nairachi deaungkho y ym cheng iy, jei y naimy Tameuh i leu thui pi naira y ly khri pa-rei vam nai tleaung y vam ra nai ne.

¹⁵Phyreichi ly paleung ano nai hawi aei nai deaungkho y py Krista i satang thui pi u lawh veng; phyreichi ly kawn nai deaungkho y thui pi u lawh teang:

¹⁶kamkawm harei ly kai ai ly Satang Kahawi eaung hai nai leu thui ai nai ang khai rym nai ne, nanai pany iy, tamen nai deaungkho y thui pi:

¹⁷na i py kamkawm takhra ly kai ai kawm naira y paleung mawn naira ang panawi ai tau nai, sa tatang nai paleung ny y naimy aei nai deaungkho y Krista i satang thui pi lawh teang.

¹⁸Hawi mang. Ati py ne sy ati cheaungkhangra y, tapawp ai tau nai mo, meitang nai mo, Krista i satang thui pi nai ne;

¹⁹hunira y ly kai kawn, ne, kakawn jojo ai. Huni ly kai ai nangchi my chiu sa pi u nai deaungkho y hawi, Isu Krista my Phailo ang pei rawm nai deaungkho y py, kai i vui heng naira lawn ai, nanai kapany;

²⁰kai i athang khai naira hawi kai i ngai parai nai kamta ly, ati ra y py amthang hai leaung nai kaawm y ai i, vam parai naimy kawm reng nai kamta vai py hengra deaungkho y mo, deira deaungkho y, kai i tlang y ly Krista ai palo naira lawn lawh ai.

²¹Ati mana nai mo nabaly kai i vui heng nai ly Krista ne, naibaly dei nai ly kamran ne.

²²Na i py tlang y heng nai ly kai i phy nga ai nai ne iy, huni ly kai i sa nai athai ne iy khyly, hunaibaly mani nai kavawi ai mo, nanai kapany y leang.

²³Na i py kai ly sala khaw y lawkhang naira y dawn nai pany y naimy kaawm jo jau nai teu, katako vui iy Krista teng y awm ai nai kangai parai naira awm nai deaungkho y; huni ly khi pa-rei hawi keh veng.

²⁴Na i py nangmychi deaungkho y kai ly tlang ai awm jojo ai nai ly khri pa-rei aly aeang keh nai ne.

²⁵Naibaly huni ly kai ly ym cheng nai deaungkho y kaawm jojo ai, nanai kapany; hunaibaly kai ly nangchi teng y kang awm bi ai nai deaungkho y nangci i kaimy deaungkho y amlyh naira ly Krista Isu y khri pa-rei ty ra ty ra thai ai nai,

²⁶nangchi ly ym naira y veang ai nai hawi kawn ai nai py kai ly nangchi bawibawi teng y kang awm jojo ai, nanai kapany.

²⁷Ati py ne sy nangchi i amhi amtlau nai sai ly Krista i Satang Kahawi hawi amlau sy; hunaibaly kai ly nangchi ai kang de iy py, nangchi teng y kang awm y teu iy py, nangchi ly phailo y vanrei kakhaw angdo u iy, paleung vanrei my Satang Kahawi ym nai leu y sa ahawi nai, tiu nai keungchi ai ly ati ra y py jei y naimy awm u, nanai nangchi i satang kapany pajau ai;

²⁸huni ly mymychi i vui tama ai naira ne, nanai hawi, nangchi i vui naini heng ai naira ne, nanai py pany hai naira chai pyn nai ne lawh veng, huni py Tameuh teng i nai ne.

²⁹Ati mana nai mo nabaly nangchi ly Krista deaungkho y mymy ai ym nai harei khyh ny y naimy, mymy deaungkho y nangchi ai ly patang u ai nai py ang pei nai ne;

³⁰nangchi ly kai i atiu ra awm nai ly niu u reng bo, vai py awm bi bo, nanai nangchi ly thai; nangchi ly huni kypkyp nga u teang nai bo.