Read Khumi Chin PHILIPI 4 Bible Online

PHILIPI 4 - Khumi Chin bible

PHILIPI 4

¹Hunai deaungkho y amjo amnau ngai parai nai hawi adawn parai naichi, kai i kawn nai hawi kai i areng lukhymchi awi; kai i ngai parai naichi awi, hunai kamta Areng y khaw pa-rei angdo u.

²Areng y ly paleung vanrei awm ai nai Euodia ai kang takeng i, Suntuki ai py kang takeng teang.

³Ne, nang, kai i paleang savan apatli ahawi tatang nai ai py kang takeng, tuni neampachy nini ai ly sabawm ba; nini ly Satang Kahawi y kai hawi sa ahawi reng, Klementa hawi, kai i sa ahawi nai takhra, hengra cha-iu y amyn awm naichi py.

⁴Areng y ly kawn u jojo; kang napi bi ai kawn u.

⁵Nangchi i kham pajau nai sai ly khumi bawibawichi my pany u sy. Areng ly kasa bo.

⁶Ati sai py paleung bi u moh; ati cheaungkhangra y chiu sa nai hawi hnei nai ly kawn nai leu thui nai abawi iy, nangchi i ngai nairachi ly Tameuh teng y pany hai nai awm sy.

⁷Hunaibaly Tameuh teng i awmnem naira, den py pany bawi pajau y nai my ly, nangchi i paleung hawi dawn nairachi py Isu Krista y ang typ pi ai mang.

⁸Kangkhym i naira y ly amjo amnauchi awi, meitang naira ngierei hawi, tahm khai naira ngierei hawi, hawi naira ngierei hawi, chai naira ngierei hawi, apu nai ngierei hawi, hawi sa nai amthang nai ngierei hawi, hawi naira awm iy palo naira awm baly hunichi ai dawn u.

⁹Kaimy y nangchi i atiti amtiu nai hawi, tangai nai hawi, thai nai hawi niu nai py hunichi kamta so u; hunaibaly awmnem nai Tameuh my ly nangchi ai ang awm hai ai mang.

¹⁰Na i py nangchi i kai ai dawn pi nai ly vai ly dawn u ali teang nai deaungkho y kai ly Areng y khri pa-rei kakawn nai ne; nangchi ly huna nai kamta dawn u naira y ly dawn u tatang nai bo, avo naira naini ngo u y nai teu.

¹¹Kai ly avaw nai leu kathui nai ny y leang; ati mana nai mo nabaly kai ly mana mo awm iy py paleung hawi jojo nai awm ai nai amtiu bo.

¹²Tahm anem parai nai awm nai reita py kakawp, nang nai awm nai reita py kakawp teang; ati cheaungkhangra y hawi, atiti bawibawira y py kajeu kawi nai hawi, kajeu alam nai awm nai reita py, nang nai hawi avaw nai awm nai reita awm nai sai kathiu py amtiu bo.

¹³Kai ly kai ai ham hai nai keung i saho y ati cheaungkhang kasa thai nai ne.

¹⁴Na i py kai i patang naira y ly nangchi ly patang hai u teang nai ly nangchi i sa nai ly hawi.

¹⁵Naibaly nangchi Philipi avang i khumichi awi, Satang Kahawi tym angchei nai thym khala y kai Makedonia pri i dengdairei theu nai khala y ly, nangchi ny y baly palau takhra kamkawm ha py atiti pei nai hawi nga naira y ly kai hawi sa ahum nai by y, nanai nangchi kypkyp py pany teang mang.

¹⁶Thesalonika avang y kaawm nai thym khala y py kai i avaw nai sabawm ai nai tlenrei khyh ny y i, nangchi ly tlen nyhrei pa u bo.

¹⁷Kai ly atiti pei sy, nanai kahau nai ny y leang; nangmychi mang y athai peung ai nai kahau nai teu.

¹⁸Na i py kai ly ati cheaungkhang awm i, awm mamang bo; Epaphrodita i kiu y kai ai nangchi i atiti pa naichi ly kanga i, angym bo. Huni ly atiti mui katui, apathyp naira kawn ai ataing nai, Tameuh i ka-kawn ne.

¹⁹Naibaly kai i Tameuh ly Krista Isu y mymy i nang parai naira i nang nai sai kamta nangchi i avaw naira cheaungkhangra y py ang nga hai ai mang.

²⁰Naibaly achi i Tameuh hawi Ampo teng y ly deungtasa khrairei nang parai naira awm sy. Amen.

²¹Krista Isu y khumi kachai bawibawichi teng y kai i kawn nai leu thui pi kyh. Kai teng y awm nai amjo amnauchi my ly nangchi ai kawn nai leu ang thui pi mang.

²²Khumi kachai bawibawichi my nangchi ai kawn nai leu ang thui pi mang, Kaisara dengtheungchi theung i my ang thui pi nai ty keh.

²³Areng Isu Krista i pahenra ly nangchi i phailo teng y awm sy.