Read Khumi Chin KOLOSA 3 Bible Online

KOLOSA 3 - Khumi Chin bible

KOLOSA 3

¹Hunaibaly nangchi ly Krista hawi vanrei pathau nai awm u chum bo nabaly, salo mang i, Tameuh i lamtang mang y ateh nai Krista i awm naira i atiti awm naichi ai hau u.

²Nangchi i paleung y ly khaileaung i atiti awm naichi ai dawn u cheng y naimy, salo mang i atiti awm naichi ai dawn u cheng.

³Ati mana nai mo nabaly nangchi ly dei bo, naibaly nangchi i hengra ly Tameuh y Krista teng y heu veng bo.

⁴Krista, achi i heng naira ly amteng nai neng khala y ly nangchi py mymy hawi nang parai nai theung y amteng u teang ai.

⁵Hunai deaungkho y nangchi i tlang kangprei khaileaung pri y awm naichi ai padei u; angai naichi, chai y naichi, paleaung naichi, hawi y naira ai ngai phi naichi, atakaw naichi (huni ly myn y chiu nai ne);

⁶huni atitichi deaungkho y Tameuh i kado theu nai ly leu tangai y nai chanauchi i tlang tleaung y tym nai ne;

⁷nangchi py jangni y huni atitichira y heng u nai khala y ly, nangchi py huni atitichira y tako u reng nai teang.

⁸Vai naini nangchi py hini bawibawi, kado theu naichi, amaran naichi, niu ngai y naichi, thui tamawn naichi, nangchi i labeaung i theu nai taheaung thui naichi ly patlaw u vui nai;

⁹nangchi ly khumi kangngym hawi mymy i atiti sa naichi hawi raurei leng vui iy khumi kangtha amthypu veng nai deaungkho y, ka-chawi athui u leungtang moh;

¹⁰huni khumi kangtha ai ly pany angym naira nga hai ai nai, ni ai sa nai keung atawm khyp nai kangtha sa hai dudu nai ne;

¹¹hunira y ly Krik hawi Juda hawi, lengkhym takip nai hawi, lengkhym takip y nai hawi, cheng takhra hawi, Skuthia khumi hawi, miseaung hawi, miseaung ny y naichi py awm thai y leang; Krista naini cheaungkhang ne lawh iy, cheaungkhang theung y awm teang nai ne.

¹²Hunaibaly khumi kachai hawi ngai parai naichi awi, Tameuh i vawi nai khumichi kamta paleung verei pahen naira hawi, neaung hawi naira hawi, tahm apanem naira hawi, leu anui naira hawi, amnym naira py amthyp u;

¹³ami py ami i tlang tleaung y leu hawi y naira awm iy py mang mang amnym u leungtang nai apahen u; Areng my ang pahen nai kamta khyp my apahen u teang;

¹⁴naibaly hunichi bawibawi tleaung y py tamen naira amthyp u, huni ly hawi angym naira i kawmra ne.

¹⁵Naibaly Krista i awmnem naira my ly nangchi i paleung ai peang sy, hunai kamta lawn ai nai nangchi ai ly tlang bomrei y ang palau nai chy bo; naibaly kawn u.

¹⁶Krista i leu ly cheng naira bawibawi y nangmychi y awm mamang sy; samchi hawi, khulymchi hawi, phailo ai kawn hai nai khulymchi py teaung nai apatiu u iy, mang mang aparip u leungtang ly, paleung y pahenra awm u iy Tameuh ai ly khulym thui pi u.

¹⁷Naibaly nangchi i sa nai ngierei ly leu thui naira y mo, atiti sa naira y mo, mymy i saho y Ngaai Tameuh teng y kawn nai leu thui nai tarawi y, Areng Isu i amyn y so u bebe.

¹⁸Ajuchi awi, Areng y avo nai kamta nangchi i juvochi teng y aau u.

¹⁹Juvochi awi, nangchi i ajuchi ai tamen u ly, nichi teng y paleung hawi y nai awm u reng moh.

²⁰Deaungdichi awi, cheaungkhangra y nangchi i ngamhm ngampo i leu tangai u, huni ly Areng y ly kawn ai awm nai ne.

²¹Ampochi awi, nangchi i chanauchi ai kado patheu u reng moh, ti y baly nichi ly atho angai y lawh na.

²²Miseaungchi awi, tlang y nangchi i yhmkeungchi i leu ly ati cheaungkhangra y tangai u; khumichi ai kawn hai rumrang nai keungchi i kamta ly mo y so khyh y naimy paleung harei dawn khyh, Areng ai tahm khai nai tarawi y tangai u.

²³Mymy i tavawi tha nai, yhmtheaung amtym ai nai ly Areng teng i dengdairei nga ai nai pany u iy, nangchi i sa nai ngierei ly khumi i vui kamta so y naimy,

²⁴Areng i vui kamta sa iy, ham parai naimy so u; nangchi ly Areng Krista i kalop sa u nai chy bo.

²⁵Ati mana nai mo nabaly atiti teng y nai sa nai keung ly mymy i atiti teng y nai sa nai vang ly nga teang ai; khumi ai patle takhra naira ha py awm lawh y leang.