Read Khumi Chin KOLOSA 4 Bible Online

KOLOSA 4 - Khumi Chin bible

KOLOSA 4

¹Yhmkeungchi awi, nangchi py kani pri mang y nangchi i yhmkeung awm, nanai pany iy, nangchi i miseaungchi i tlang tleaung y avo nai hawi amlau nai ryrei so u.

²Chiu sa ai nai patlaw u moh ly, hunira y ly kawn nai leu thui u nai tarawi y atyp u;

³kai ai ang kawm nai aly ly Krista i leu kathiu thui pi ai nai, Tameuh my leu i vui kaichi ai katheu ang paeaung pi ai nai hawi,

⁴kai i thui ai avo nai kamta kamteang hai thai ai nai py kaichi i vui py chiu so pi u.

⁵Ka-vo sa pi nai ly pasum u y iy, angam mang i khumichi teng y ly cheng parai naimy awm u.

⁶Nangchi ly khumi leaung leaungrei ai mana pathang bawibawi ai nai tla mo, nanai pany u thai ai nai, nangchi i leu thui nai ly palawi thiu nai, pahenra abawi nai ne jojo sy.

⁷Areng y amjo amnau ngai parai nai, krykeung ka-ym awm nai hawi kalop sa ahawi nai Tukika my ly nangchi ai kai i satang bawibawi ang pany hai ai mang:

⁸hini khypkhyp nai deaungkho y nangchi ly kaichi i satang pany u thai ai nai hawi, mymy ly nangchi i paleung awm hai nem thai ai nai py,

⁹ni ai ly Onesima, amjo amnau ka-ym awm nai hawi ngai parai nai nangmychi theung i khumi hawi nangchi teng y kang pato nai ne. Nini my ly hini mang i atiti awm nai sai bawibawi ly ang pany hai ai mang.

¹⁰Aristarka, kai hawi theaung tla ahawi nai hawi, Marka, Barnaba i meaungcha my py nangchi ai kawn nai leu thui pi mang (mymy i molam y nangchi ly leu pei naichi nga u bo; nangchi teng y ang jeu baly mymy ai kawn u ba);

¹¹naibaly Isu, Justa napi nai my ly nangchi ai kawn nai leu ang thui pi mang. Hunichi ly lengkhym takip nai khumi ne; hunichi khyh Tameuh i peang nai satang y ly kai hawi sa ahawi nai, kai ai awm hai nem nai keungchi ne.

¹²Epaphra, nangmychi theung i khumi leaungrei, Krista Isu i miseaung my ly nangchi ai kawn nai leu ang thui pi mang; nangchi ly Tameuh i kangai ngierei y cheang nai hawi ym cheng cheng nai angdo u thai ai nai, ni i chiu sa naichira y ly nangmychi i vui hawihai palai chiu ang sa pi patyp jojo nai ne.

¹³Mymy ly nangchi i vui py, Leiodikeia avang y awm naichi i vui py, Haierapoli avang y awm naichi i vui py mymy ly khrikhri pa-rei sa, nanai kapany hai chy bo.

¹⁴Luka, daitang ngai parai nai hawi Dema nini ly nangchi ai kawn nai leu ang thui pi mang.

¹⁵Leiodikeia avang y awm nai amjo amnauchi teng y hawi, Numpha hawi mymy i yhm y palau takhra kamkawm achu naichi teng y py kai i kawn nai leu thui pi kyh ba.

¹⁶Naibaly hini cha pa nai ly nangchi theung y phain u pajau nai bo y ly Leiodikeia palau takhra kamkawmchi theung y py phain hai u teang; nangchi py Leiodikeia avang y pa nai cha ly phain u teang ba.

¹⁷Naibaly Arikipa teng y ly, “Areng y nang i krykeung kalop nga nai ly sa angym ai nai hawihai palai dawn,” tapi u ba.

¹⁸Kai Pawla, kaimy i kiu kypkyp y kawn nai leu kang tajiu nai ne. Kai ai kawm nairachi ly pany u jojo ba. Pahenra ly nangchi teng y awm sy.