Read Khumi Chin I THESALONIKA 2 Bible Online

I THESALONIKA 2 - Khumi Chin bible

I THESALONIKA 2

¹Amjo amnauchi awi, kaichi i nangchi theung y kun nai ly jawm sum y leang, nanai ly nangmychi kypkyp my pany u veng bo.

²Ne, nangchi my pany u chum nai kamta ly kaichi ly Philipi avang y ngari patang nai hawi angji ngailai parai pa-rei ang sa iy py, kaichi ly achi i Tameuh y ly khri pa-rei vam iy khrukhrala nai tarawi y py nangchi teng y Tameuh i Satang Kahawi kang thui pi bo.

³Naibaly kaichi i leu thui nai ly tamang naira i mo, chai y naira i mo, tapawp ai tau naira i mo theu nai ny y leang;

⁴na i py Tameuh my kaichi ai avo, napi iy Satang Kahawi ang kry hai nai kamta khyp my khumi ai kawn hai nai kamta ny y naimy, achi i paleung ai ang cham nai keung Tameuh ai kawn hai nai leu thui nai teu.

⁵Naibaly nangchi my pany u chum nai kamta ly kaichi ly palo hawp nai leu mo, heu nai paleung ano naira mo tlen py teaung vai y; Tameuh my pany hai nai keung lawn bo;

⁶naibaly kaichi ly Krista i amtaw thau nai ne nai deaungkho y nangchi ai myn pho hai ai nai avo y i py, nangchi teng y py kalangchi teng y py palo naira kang hau y leang bo.

⁷Amhm ly mymy i chanauchi ai ko nai kamta ly kaichi py nangchi theung y neaung hawi parai naimy kang awm u lawh nai ly;

⁸hunai kamta khyp teang, nangchi ly kaichi i ngai parai nai lawn u vui nai deaungkho y, kaichi ly nangchi ai khri pa-rei kang ngai i, Tameuh i Satang Kahawi harei khyh ny y naimy kaimychi i hengra py kang pei vui ai nai ngai nai ly.

⁹Amjo amnauchi awi, kaichi i sa akawm nai sai hawi, khri pa-rei kalop sa nai sai ly nangchi ly pany jo mang; kaichi ly Tameuh i Satang Kahawi thui pi nai tarawi y nangmychi theung y ami ai py myn pho hai y ai nai vum kanithun kalop sa reng.

¹⁰Nangchi ym nai khumichi i tlang tleaung y kaichi ly chai parai nai hawi, hawi parai nai hawi, cheh ai by y nai pa-rei awm nai sai ly nangchi hawi Tameuh py pany hai nai keung ne;

¹¹naibaly nangchi ly mymy i pri hawi nang parai naira y ang palau nai keung Tameuh i khumi lawn ai ataing nai awm u thai ai nai, ampo my mymy i chanauchi i tlang tleaung y sa nai kamta ly,

¹²nangchi leaung leaungrei ai pachei py kang pachei, awm py kang awm hai nem, leu py hawihai palai kang pany hai, nanai nangchi ly pany u veng bo.

¹³Nangchi ly kaichi teng i dengdairei Tameuh i leu thai nai patawm nai thym khala y ly, khumi i leu kamta ny y naimy Tameuh i leu kamta patawm lawh nai deaungkho y, kaichi ly Tameuh teng y kawn nai leu thui reng nai ne; huni ly Tameuh i leu ne khyp iy nangchi ym naichi theung y sa reng nai ne.

¹⁴Amjo amnauchi awi, nangchi ly Krista Isu y awm nai Judai pri i palau takhra kamkawmchi i amtiu nai keungchi lawn u lawh; nichi ly Judachi teng y patang nai kamta ly nangchi py nangmychi pri i khumichi teng y patang u teang bo;

¹⁵huni Judachi ly Areng Isu ai hawi amochi ai py padei iy, kaichi ai py ang patheu; nichi ly Tameuh i ka-kawn py so y, khumi bawibawichi ai aawi hai ngang lawh;

¹⁶Cheng Takhrachi ly hengra nga u thai ai nai nichi teng y leu thui ai nai ang paka lawh veng; huni ly mymychi i kamngo ne naira kawi hai jojo ai nai chy bo; na i py kado theu naira ly angym pa-rei mymychi i tlang tleaung y tym bo.

¹⁷Na i py amjo amnauchi awi, kaichi ly kra y nai sala chy i vui nangmychi hawi paleung y ny y naimy, meimai y amprei naira awm rai nai deaungkho y, ham parai nai tarawi y nangchi i meimai niu ai nai sa nai tleaung y sa ra nai bo.

¹⁸Kaichi ly nangchi teng y kang jeu tanga ai nai tau cheng i, kai Pawla kypkyp py tlen tlen nyhrei chang y nai tau bo, na i py Setan my ang paka reng.

¹⁹Achi i Areng Isu ang jeu nai khala y ly mymy i mo y kaichi i athang khai naira mo, amo theu naira mo, areng lukhym amlyh naira mo ati awm mo?

²⁰Nangmychi kypkyp ny y a? Ati mana nai mo nabaly kaichi i palo naira hawi amo theu naira py nangchi ne na a.