Read Khumi Chin I THESALONIKA 3 Bible Online

I THESALONIKA 3 - Khumi Chin bible

I THESALONIKA 3

¹Hunaibaly kaichi ly kham pajau y nai kha y kaimychi my tlairei Atheni avang y daw jo baly hawi ai, nanai dawn;

²naibaly ami py hini patang nairachi deaungkho y paleung phra y ai nai, nangchi ai khaw hai ai nai hawi, nangchi i ym naira molam awm hai nem ai nai py kaichi i amjo amnau Timothei, Krista i Satang Kahawi y Tameuh i kalop sa ahawi nai keung ai ly kang pato bo.

³Achi ly hinichi patang ai nai ang sa rym nai ne, nanai nangmychi kypkyp my pany u veng bo.

⁴Kaichi ly nangchi teng y awm nai thym khala y py achi ly ngari patang nai ly avum ai nai tla, nanai kang thui pi rym khypkhyp chy bo; hunai kamta khypkhyp ly tym bo, nanai nangchi ly pany u bo.

⁵Hunai deaungkho y kham pajau y nai kha y ly parawi nai keung my nangchi ai parawi vui lawh iy, achi i sa akawm nai ly jawm jawm sum lawh na, nanai nangchi i ym nai sai kapany thai ai nai kang pato nai ne.

⁶Na i py Timothei ly nangchi teng i dengdairei vai kaichi teng y tym iy, nangchi i ym naira hawi tamen nai satang kawn ai awm parai nai hawi, nangchi ai kang niu ai ngai nai kamta nangchi py kaichi ai niu ai nai khrikhri pa-rei ngai i, kaichi ai pany jojo, nanai leu py ang tym hai bo;

⁷huni deaungkho y amjo amnauchi awi, kaichi i kamtang hawi kamnga awm nai bawibawira y ly nangchi i tlang tleaung y khri pa-rei awmnem naira nga bo.

⁸Vai ly nangchi ly Areng y phai khaw pa-rei angdo baly kaichi ly heng nai bo.

⁹Achi i Tameuh i mo y nangmychi i molam y kaichi i amo theu naira bawibawi deaungkho y, kaichi ly nangmychi i molam Tameuh teng y ati kawn nai leu thui thai ai mo?

¹⁰Kaichi ly nangchi i meimai niu thai ai nai hawi, nangchi i ym naira mang y avaw nai angym hai thai ai nai py, vum kanithun y khri pa-rei chiu kasa reng.

¹¹Hunaibaly achi i Tameuh hawi Ampo kypkyp hawi, achi i Areng py kaichi ai nangmychi mang y pahawi sy.

¹²Naibaly achi i Areng Isu Krista ly mymy i khumi kachai bawibawichi hawi ang jeu nai khala y ly, achi i Tameuh hawi Ampo i mo y ly nangchi i paleung ai ly chai naira y cheh ai nai by y pa-rei my ang khaw hai thai ai nai,

¹³nangmychi mang y kaichi i tamen nai kamta ly, Areng ly nangmychi mang y atamen leungtang naira hawi, khumi bawibawi mang y tamen naira ly peung hai sy, panawi py panawi sy.