Read Khumi Chin JOSUA 1 Bible Online

JOSUA 1 - Khumi Chin bible

JOSUA 1

¹ARENG i miseaung Mosi dei nai bo y ARENG my Mosi i bangtang Nun i chapo Josua teng y,

²“Kai i miseaung Mosi ly dei bo. Nang hawi Israela cheng bawibawichi ly Jordan tavo angpeang u iy, kaimy kang pei ai nai pri theung y kun ai nai vaimy angvei u rym.

³Mosi teng y kaimy adeu yb nai kamta, nangchi tiu ai nai khu ka-peang bawibawi ly nangchi teng y kaimy kang pei ai.

⁴Nangchi i pri ly tokalawi mang daichi ka-vym dengdairei, tosyh mang Lebanon mawi tym pa-rei; nisi mang Euphrat tavo dengdairei, Hiti pri katlen iy nidym mang Mrethe pangli tym pa-rei kau ai.

⁵Josua awi, nang heng nai ryrei ly ami py nang ai tiu pajau ai ny y. Kai ly Mosi hawi vanrei awm nai kamta, nang hawi py vanrei awm ai, nang ai mana khala py kangkhai su ai ny y. Nang hawi vanrei kang awm jojo ai.

⁶Nang ly atho sa iy vam parai naimy awm ba. Nang ly hini khumichi ai lu sa iy, nichi i amsi pajochi teng y kaimy pei ai adeu nai pri y kun iy tiu vui ai nai tla.

⁷Atho sa iy vam parai naimy awm ba. Kai i miseaung Mosi my pei nai reita bawibawichi ai takhawi y naimy kry ba. Reita leu pei nai ngierei ai ati sai py takhawi y naimy kry baly, nang ly nangmy dawn nai kamta eaung ai.

⁸Nang i chiu sa naira tleirei y Reita leu tajiu nai cha-iu avawrei phain ai nai tla. Huni cha-iu ai vum, kanithun phain amtiu iy, huni theung y abawi nai reitachi kry ai nai tla. Huna nai sa baly nang ly eaung naira nga ai.

⁹Hunai deaungkho y kai i leu pei nai kamta vam parai naimy awm ba. Jei nai awm moh. Paleung phra moh. Nang i ARENG Tameuh ly nang i chei naira tleirei y nang hawi vanrei awm nai ne,” nanai leu pei bo.

¹⁰Naibaly Josua ly lu sa naichi ai palau i, Tai tleirei y awm nai khumichi teng y chei hai iy,

¹¹“Kani thomrei sala y nangchi i ARENG Tameuh my ang pei ai nai pri y tiu vui ai nai Jordan tavo angpeang ai nai tla ai i, aly ngai nai cha-nei vawnsaichi angvei u rym,” nanai satang thai hai bo.

¹²Naibaly Josua ly Ruben theaung, Kad theaung hawi Manase theaung ka-hyhreichi teng y,

¹³“Jordan tavo nisi mang i khu ka-peang y nangchi awm ai nai, nangchi i ARENG Tameuh my pei ai, nanai ARENG i miseaung Mosi my leu pei nai pany u.

¹⁴Nangchi i aju chanauchi, beram, si, mi-i napi nai tawnbawichi ai ly hini meingtym y daw jo iy, nichi theung i tavai ateaung syn pajau nai neampacho ka-cheang ngiereichi ly takhra Israela chengchi i mo mang tavo angpeang u kaliki ai nai tla.

¹⁵Nangchi i ARENG Tameuh my pei nai Jordan tavo nidym mang i pri tiu u pajau ai nai pa-rei, nichi ai sabawm ai nai tla. Israela chengchi tlamsa naimy awm u nai khala, nangchi ly ARENG i miseaung Mosi my pei nai Jordan tavo nisi mang i pri y vawi u pajau ai,” napi.

¹⁶Nichi my Josua teng y, “Kaichi ly nang i leu pei nai ngierei tangai iy, nang i pato nai meingtym y kachei u ai.

¹⁷Mosi i leu tangai nai kamta, nang i leu py tangai ai. ARENG Tameuh ly Mosi hawi vanrei awm nai kamta, nang hawi py vanrei awm hai sy.

¹⁸Nang i peang nai akhi vui iy, leu pei nai ngai y nai khumi ly dei naira avum ai. Hunai deaungkho y atho sa iy vam parai naimy awm ba,” nanai pathang u bo.