Read Khumi Chin JOSUA 10 Bible Online

JOSUA 10 - Khumi Chin bible

JOSUA 10

¹Jerusalem mary i samrang Adonizedek ly Josua my Jeriko mary tiu vui iy samrang ai padei nai kamta, A-i mary ai tiu vui iy samrang ai py, padei vui nai satang thai nai ne. Huni bo y Kibeon mary i khumichi ly Israela chengchi hawi ka-dyh ka-dawi leu sumneang asa iy, vanrei awm u nai satang py thai nai ne.

²Jerusalem mary i khumichi ly khri pa-rei jei u na bo. Ati mana nai mo na baly Kibeon mary ly samrang awm nai mary puichi kamta, apu parai nai mary ne nai deaungkho y py, A-i mary tleaung y len iy, mary i khumichi ly tavai atiu kawp parai nai deaungkho y py ne.

³Hunai deaungkho y Jerusalem mary i samrang Adonizedek ly Hebron samrang Hoham, Jamuth samrang Piram, Lakhisa samrang Japhia, Ekalon samrang Debirachi teng y savaichi pato iy,

⁴“Kibeon mary i khumichi ly Josua, Israela chengchi hawi ka-dyh ka-dawi leu sumneang akhai u nai deaungkho y, Kibeon mary ai tiu ai nai kai ai sabawm u,” nanai thui hai bo.

⁵Hunaibaly Jerusalem mary, Hebron mary, Jamuth mary, Lakhisa mary hawi Ekalon mary i Amori chengchi ai peang nai samrang leaung pangreichi ly amkawm u iy, mychi i tavaimi kanghuchi hawi amsa u i, Kibeon mary ai tiu u bo.

⁶Huna nai khala Kibeon mary i khumichi ly Kilakala meingtym y awm nai Josua teng y khumi pato i, “Nang i miseaungchi ai khai su moh; jeu kaliki ly kaichi ai atleu kyh ba. Mawi tleaung mang i Amori samrang bawibawichi ly amkawm iy kaichi ai tiu u bo,” nanai satang thai hai bo.

⁷Naibaly Josua ly vawi patyp nai risachi abawi nai Israela tavaimi kamkawm verei hawi, Kilakala mary i dengdairei amsa u bo.

⁸ARENG my Josua teng y, “Nichi ai jei moh. Kai ly nichi ai nang i kiu y kang au bo. Ami py nang ai amtang pajau y leang,” napi.

⁹Josua ly Kilakala mary i dengdairei, Kibeon mary mang y vumtorei tavai amsa i, Amori tavaimichi ai tiu tamangtang nai ne.

¹⁰ARENG ly paleung ka-echi ai ahei phro iy preang hai bo. Huna nai khala Israela risachi ly Kibeon mary theung y, paleung ka-e neangneangchi ai tleh iy, Bethoron mawi aleaung palem i, tokalawi mang Azeka mary hawi Mekeda marychi khrairei tiu u nai ne.

¹¹Israela risachi my tiu nai deaungkho y, Amori risachi ly mawi aleaung lam mang y preang u nai khala, Azeka mary tym pa-rei, lam jeungrei kani mang i ji amai kalen puichi, nichi i tlang tleaung y ARENG my tla hai bo. Ji amai tla hai nai deaungkho y dei naichi ly Israela chengchi my padei iy dei nai tleaung y nawi keh nai ne.

¹²Amori tavaimichi ai Israela chengchi kiu y, ARENG my au nai kani y Josua ly “Aw kanito awi, Kibeon mary salo y anawn ba; aw lo awi, Akalon mary leaunghawira y anawn ba,” nanai Israela chengchi i mo y thui bo.

¹³Israela chengchi my paleung ka-echi ai tiu nai pajau y ryrei ly kanito hawi lo ly asyh y naimy anawn jo nai ne. Huni satang ly Jasa i cha-iu theung y tajiu typ bo. Kani khengrei kanito ly avah y naimy, kani laileaung y anawn jo nai ne.

¹⁴ARENG ly khumicho leaungrei i leu ai, huni kani y tangai pi nai ne. Huna nai kamta tlenrei py awm vai y, mo mang py awm ai ny y. ARENG ly Israela chengchi mang y sabawm iy, tavai tiu pi lawh ly!

¹⁵Huni bo baly Josua hawi Israela chengchi ly Kilakala Tai naira mang y vawi u ali teang bo.

¹⁶Amori samrang leaung pangreichi ly tleaung u i, Mekeda tapiu theung y aheu u nai ne.

¹⁷Khumi leaungrei ly huni samrangchi aheu nai niu i, Josua teng y thai hai bo.

¹⁸Josua my, “Tapiu pa-kho y lengseaung pui pali tawp ly tamcheaung py khai.

¹⁹Nangchi ly huni meingtym y awm u moh. Paleung ka-echi ai hui u iy, nithun mang tiu u. Marychi theung y kun vui moh sy! Nangchi i ARENG Tameuh ly paleung ka-echi ai nangchi i kiu y ang au bo,” nanai Israela chengchi teng y thui pi bo.

²⁰Josua hawi Israela chengchi ly paleung ka-e neangneangchi ai tleh u bo. Na i py paleung ka-e phyreichi ly tleaung iy, lengseaung apai tapang nai theung y aheu u nai deaungkho y tleaung u nai ne.

²¹Naibaly Israela tavaimi bawibawichi ly phrumai by y naimy, Josua awm nai Mekada Tai naira y vawi u ali teang bo. Huni pri y ami py Israela chengchi ai kado theu hai nai leu malawn py, katheu u vam y nai ne.

²²Naibaly Josua my, “Tapiu pa-kho paeaung iy, samrang leaung pangreichi ai kai teng y jeu hai u,” nanai leu pei bo.

²³Nichi ly Jerusalem samrang, Hebron samrang, Jamuth samrang, Lakhisa samrang hawi Ekalon samrangchi ai tapiu theung i nai patheu iy,

²⁴Josua teng y hawi u nai ne. Huna nai khala Josua ly Israela cheng bawibawichi hawi, mymy hawi vanrei tavai tiu nai luchi ai mymy teng y palau bo. Tavai luchi teng y, “Huni samrangchi i kaneaung y kheu hawi chiu u,” nanai leu pei nai kamta, nichi ly kheu hawi chiu u bo.

²⁵Josua my tavai luchi teng y, ‘ARENG ly nangchi i paleung ka-e ngiereichi ai, hina nai kamta sa nai deaungkho y jei u moh; paleung phra u moh; atho sa iy paleung sorai naimy awm u,” napi.

²⁶Hunaibaly Josua ly samrang leaung pangreichi ai haisau hawi tleh iy, veuchi ai dengkeaung keung pangrei salo y, kani dym nai ryrei bang hau bo.

²⁷Kani avah nai khala Josua my, veuchi ai dengkeaung keung tleaung i nai pala iy, nichi i aheu nai tapiu theung y aphi su ai nai leu pei bo. Naibaly tapiu ai lengseaung puichi hawi pali hai tawp i, vaini khrairei huni lengseaung puichi ai niu pajau nai ne.

²⁸Huni kani y my Josua ly Makedah mary ai tiu pajau iy, Makedah samrang ai patiu vui bo. Mary i khumichi ai py, leaungrei py takhawi y naimy tleh chauchau nai ne. Jeriko samrang ai padei nai kamta, Makedah samrang ai py padei teang bo.

²⁹Naibaly Josua hawi Israela tavaimichi ly Makedah mary i dengdairei, Libana mary mang y tavai thau u bo.

³⁰ARENG huni mary hawi huni mary i samrang ai py, Israela chengchi i kiu y au bo. Nichi ly mary i khumichi ai, leaungrei py tleaung y pa-rei tleh pawn nai ne. Jeriko samrang ai padei vui nai kamta, Libana samrang ai py padei vui bo.

³¹Naibaly Josua hawi ni i risachi ly Libana mary i dengdairei, Lakhisa mary mang y amsa i, mary ai katanmeuh iy tiu u bo.

³²ARENG ly atiu nai pa-nyh kani y, Lakhisa mary ai Israela chengchi i kiu y au bo. Nichi ly Libana mary i khumichi ai sa nai kamta, Lakhisa mary i khumi bawibawichi ai py, leaungrei py tleaung y na pa-rei tamyh pawn bo.

³³Kizar samrang Horam ly Lakhisa samrang mang y asa hai nai tavai atiu i py, Josua ly ni hawi ni i tavaimi kamkawm ai tiu nai pajau i, leaungrei py tleaung y pa-rei tamyh bo.

³⁴Huni bo y Josua hawi Israela risachi ly Lakhisa mary i dengdairei, Ekalon mary mang y amsa i, mary ai katanmeuh iy tiu u bo.

³⁵Nichi ly huni kani y my, mary ai tiu nai pajau i, Lakhisa mary i khumichi ai sa nai kamta, Ekalon mary i khumichi ai py, leaungrei py tleaung y pa-rei padei pawn teang.

³⁶Huni bo y Josua hawi Israela risachi ly Ekalon mary i dengdairei, mawi aheungra awm nai Hebron mary mang y amsa u i huni mary ai tiu iy,

³⁷pajau u vui nai ne. Nichi ly Hebron samrang hawi mary i khumi bawibawichi ai py, sahawi y awm nai marychi ra i khumi bawibawichi ai py, tleh u pawn nai ne. Josua ly Ekalon mary ai taphra kamlang nai kamta, Hebron mary ai py taphra pawn teang. Ami py kangheng tleaung nai by y.

³⁸Hunaibaly Josua hawi Israela risachi ly Debira mary y ali teang i, huni mary ai tiu u bo.

³⁹Nichi ly samrang hawi vanrei mary ai py, tengpang sahawi y awm nai mary ngierei ai py tiu vui iy, huni marychira y awm nai khumi bawibawichi ai tamyh u pawn bo. Josua ly Hebron mary, Libana mary hawi, hunichi i samrangchi ai sa nai kamta, Debira mary hawi huni i samrang ai py sa teang nai ne.

⁴⁰Josua ly pri verei ai tiu nai eaung bo. Ni ly mawi tleaung pri i samrangchi, nisi mang mawi aheung hawi, nidym mang mawi kheutangra y awm nai samrangchi hawi, tokalawi mang i khutaha meingtymra y awm nai samrang bawibawichi ai py tiu i eaung nai ne. Huni pri i khumi bawibawichi ai leaungrei py tleaung y pa-rei tamyh pawn bo. Israela chengchi i ARENG Tameuh my leu pei nai saho y hina nai sa nai ne.

⁴¹Josua ly tokalawi mang i Kadesabana mary dengdairei, pangli peang sahawi y awm nai Kaza mary y tym pa-rei py, Kosen pri dengdairei tosyh mang i Kibeon mary tym pa-rei py, tavai thau u bo.

⁴²Israela chengchi i ARENG Tameuh ly Israela chengchi mang y asa hai nai deaungkho y, Josua ly huni samrang bawibawichi hawi, nichi i prichi ai tiu i eaung veangveang nai ne.

⁴³Huni bo y Josua hawi Israela risa bawibawichi ly Kilakala Tai naira mang y vawi u teang bo.