Read Khumi Chin JOSUA 17 Bible Online

JOSUA 17 - Khumi Chin bible

JOSUA 17

¹Josepha i chapo chalu Manase i kangpreang dengtheung phyreichi py, Jordan tavo nidym mang i khu ka-peang phyrei amtym u nai ne. Kilead i ampo Makhira ly Manase i chapo chalu ne; tavaimi sorai risa py ne. Hunai deaungkho y ni ly Jordan tavo nisi mang i Kilead khu hawi Basen khuchi ai nga bo.

²Jordan tavo nidym mang i khu ka-peang ai ly Manase kangpreang phyrei dengtheungchi nga u. Huni dengtheungchi ly; Sejhem dengtheung, Hepha dengtheungchi hawi Shemida dengtheungchi ne.

³Manase i katu pa-thom, Makhira i katu palyh, Kilead i katu, Hepha i chapo Zalopheh ly chapo by y, chaniuchi naini awm khyh. Huni chaniuchi i amyn ly; Malah, Noah, Hokalah, Milaka hawi Tirzahchi ne.

⁴Nichi ly pathyp pi nai keung Elaza, Nun i chapo Josua hawi lu sa naichi teng y ahihawi iy, “Kaichi ai py, kaichi i amjo amnau ka-bi cheng theaungchi ai py, amtym ai nai khaileaung pei ai nai tla, nanai ARENG my Mosi teng y leu pei nai awm,” nanai takeng nai deaungkho y, ARENG my leu pei nai kamta, nichi ly mychi i amjo amnau ka-bi chengchi kamta, khaileaung nga u nai ne.

⁵Hunai deaungkho y Manase theaung ly Jordan tavo nisi mang y Kilead khu hawi Bashan khuchi bo y, phy horei nga.

⁶Manase theaung neampachy hawi neampachochi ly khu ka-peang nga u nai deaungkho y, awm asai nai takhra Manase kangpreangchi ly Kilead khu nga u.

⁷Manase khu ka-peang i khujyh ly Asha i khu ka-peang dengdai Sejhem mary nisi mang y awm nai Michmetha mary ryrei ne. Huni bo i khujyh ly tokalawi mang y takoleu iy, Entapuah mary y awm naichi py abawi.

⁸Entapuah mary ly Manase i khu ka-peang theng y abawi i py, mary tengpang y awm nai khaileaung ly Ephraim khu ka-peang theng y awm.

⁹Huni bo i khujyh ly Kanah micheaung mang y ang vum kathiu nai ne. Huni micheaung tokalawi mang i marychi ly Manase i khu ka-peang theung y awm teu i py, Ephraim theaung my peang. Manase khu ka-peang khujyh ly Kanah micheaung jeungrei tako baly, Mrethe pangli y tem.

¹⁰Ephraim khu ka-peang ly micheaung tokalawi mang y awm iy, Manase khu ka-peang ly micheaung tosyh mang y awm. Mrithe pangli ly huni khu ka-peang nyhrei i nidym khujyh ne. Nidym tosyh ngan y Asha khu ka-peang awm iy, nisi tosyh ngan mang y, Isakha khu ka-peang awm nai ne.

¹¹Manase theaung ly Isakha hawi Asha khu ka-peangchi theung y awm nai Beth Shan mary, Ibalam mary hawi tengpang y awm nai marychi bo y, Dora mary (pangli peang y awm nai ne), Adora mary, Taanch mary, Mekido mary hawi, tengpang sahawi y awm nai marychi ai peang bo.

¹²Manase theaung ly huni marychira y awm nai, Kanan chengchi ai patheu pajau y nai deaungkho y, nichi ly huni meingtymchira y awm u jojo.

¹³Israela chengchi ly naira awmryh awmryh teu i py, Kanan chengchi ai patheu y naimy, mymychi teng y miseaung kalop sa hai bo.

¹⁴Josepha i kangpreangchi my Josua teng y, ‘ARENG ly kaichi ai amtheaung naira pei nai deaungkho y, khumi khri pa-rei peung nai ne. Nang ly ati mana nai kaichi ai khaileaung phy harei pei khyh lawh mo?” nanai deng u bo.

¹⁵Josua my, “Nangchi ly khumi neangneang peung nai deaungkho y, Ephraim i vui pei nai mawi aheung meingtym theang lawh baly, Perizi hawi Riphaim chengchi awm nai meingtymra i, daichichi tapyh iy awm u,” nanai pathang.

¹⁶Huna nai khala nichi my, “Mawi aheung ly kaichi awm ai nai theang ala nai ne. Beth Shan hawi deaungpa marychi sahawi i adymra py, Jezarela leaunghawira py awm nai khala, Kanan chengchi ly tamo tavai ka-richi awm u nai ne,” napi u.

¹⁷Josua my Ephraim hawi nidym Manase theaungchi teng y, “Nangchi ly meitang khyp, khumi vuikanai nawi iy atho awm u bo. Hunai deaungkho y nangchi ai ly phy harei nga hai panawi bi ai.

¹⁸Mawi aheung meingtym nangchi teng y kang pei ai. Huni meingtym ly daichi thengreung ne i py, nangchi ly daichi pachai iy awm u. Kanan chengchi teng y tavai tamo ka-richi awm iy haiho hawi teu i py, nangchi ly nichi ai patheu u pajau ai,” napi.