Read Khumi Chin JOSUA 18 Bible Online

JOSUA 18 - Khumi Chin bible

JOSUA 18

¹Pri verei tavai tiu pajau nai bo y Israela chengchi ly Siloh mary y tym angym u i, ARENG i awm nai Tabynako sa u bo.

²Israela theaung saryhreichi ai, khu ka-peang phy pi y leang rai.

³Hunai deaungkho y Josua my Israela chengchi teng y, “Nangchi i amsi pajochi i ARENG Tameuh my, nangchi ai pei nai pri theung y kun u y naimy, mana tanrei ajeng u jo ai mo?

⁴Nangchi i theaung harei y leaung thomrei vawi takhra ly kai teng y jeu hai u. Huni khumichi ly mychi i vui ngai nai khu ka-peang phy takhra pi ai nai, nichi ai pri verei y kaimy pato ai. Nichi ly huna nai khu ka-peangchi phy pi takhra chum baly, kai teng y vawi u ali teang ai nai tla.

⁵Huni pri ai phy saryhrei phy ai. Juda theaungchi ly mychi i tokalawi mang khu ka-peang y py, Josepha theaungchi ly mychi i tosyh mang khu ka-peangra y py, awm ai nai nga u ai.

⁶Khu ka-peang phy saryhreichi ai kamtleh tahyh iy, kai teng y jeu hai u. Huni bo y kai ly achi i ARENG Tameuh i kangai lawm ai nai, tambe va iy phy pi ai.

⁷Levi theaungchi ly ARENG i pathyp pi nai kalopchi sa ai nai deaungkho y, nangchi kamta khu ka-peang phy nga u ai ny y. Kad theaung, Ruben theaung hawi nisi Manase theaungchi ly ARENG i miseaung Mosi my phy pi nai kamta, Jordan tavo nisi mang i khu ka-peang nga u bo,” napi

⁸Josua my pato nai kamta nichi ly khu ka-peang patleh takhra ai nai chei u bo. Josua my, “Nangchi ly pri verei y chei u iy, khu ka-peangchi patleh takhra u. Naibaly kai teng y vawi teang ai nai tla. Huna nai khala kai ly hini Siloh mary y nangchi nga ai nai khu ka-peangchi, ARENG i kangai lawm ai nai tambe va iy, kang phy pi ai,” nanai leu taviu bo.

⁹Hunai deaungkho y nichi ly pri verei y chei iy, abawi nai marychi vuikanai hawi vanrei, khu ka-peang saryhrei patleh takhra iy, Siloh mary taira y awm nai Josua teng y vawi u teang bo.

¹⁰Josua py ARENG i kangai lawm ai nai tambe va iy, Israela theaungchi ai khu ka-peangchi phy pi nai ne.

¹¹Benjamin theaung yhm dengtheungchi nga ai nai khu ka-peang phy pi manme nai ne. Nichi i vui khu ka-peang ly Juda theaung hawi Josepha theaungchi i khu ka-peangchi sala y awm.

¹²Nichi i khu ka-peang tosyh mang khujyh ly Jordan tavo dengdairei amteaung iy, Jeriko mary tosyh mang i mawi aheung mang y lyn kalau baly, nidym mang Bethavan daichi ka-vym ryrei, mawi aheung y tako prei nai ne.

¹³Huni bo y Luza mary (Bethela mary, nanai py palau), tokalawi mang i mawi aheung mang y lyn iy, Tlawi Beth Horon mary tokalawi mang, mawi salo i Ataroth Addar mary y tym.

¹⁴Huni bo i khujyh ly huni mawi nidym mang dengdairei, Juda theaungchi i Kiria Bala mary (ti y baly Kiriajarim mary) tym pa-rei, tokalawi mang y ang vum kathiu nai ne.

¹⁵Tokalawi mang khujyh ly Kiriajarim mary katem dengdairei amteaung iy, Nipha daichi tuikhochi mang y tym.

¹⁶Hunaibaly Riphaiah leaunghawi tosyh mang i Hinnom leaunghawi sahawi i mawi kheutang mang y tym. Huni bo y Jebusi mawi tokalawi mang i Hinnom leaunghawi tako prei iy, tokalawi mang Enrokela avang y tym.

¹⁷Huni bo baly tosyh mang i Ensimai avang mang y amhi iy, Adumim mawi aleaung phei mang y awm nai, Kelilut avang y tym. Huni bo y Bohan i lengseaung (Bohan ly Ruben i chapo ne) mang y satla kathiu baly,

¹⁸Jordan tavo leaunghawi sahawi i mawi aheung ban tosyh mang dengdairei en tako prei bo. Huni bo y,

¹⁹Beth Hokalah mawi aheung ban dengdairei tako prei iy, tavo leaunghawi mang satla kathiu baly, pangli kadei tosyh mang Jordan tavo vumra tem nai ne. Hini ly tokalawi mang i khujyh ne.

²⁰Jordan tavo ly huni khu ka-peang i nisi mang khujyh ne. Salo mang i khujyh ly Benjamin theaung yhm dengtheungchi amtym nai khu ka-peang khujyh ne.

²¹Benjamin theaung yhm dengtheungchi i khujyh theung y awm nai marychi ly; Jeriko mary, Beth Hokalah mary, Emek Kezi mary,

²²Beth Arabah mary, Zemaraim mary, Bethela mary,

²³Avim mary, Parah mary, Ophara mary,

²⁴Khepharammoni mary, Ophani mary hawi Keba mary napi nai mary kalen holai nyhrei hawi, hunichi i tengpang y awm nai mary katheang kalenchi ne.

²⁵Huni bo y Kibeon mary, Ramah mary, Beroth mary,

²⁶Mizapa mary, Khephirah mary, Moza mary,

²⁷Rekem mary, Irapela mary, Taralah mary,

²⁸Zela mary, Elet mary, Jebusi mary (ti y baly Jerusalem mary), Kibeah mary, Kiriajarim mary napi nai mary kalen holai palyhrei hawi, hunichi i tengpang y awm nai marychi py abawi. Huni khu ka-peang ly Benjamin theaung yhm dengtheungchi i khu ka-peang ne.