Read Khumi Chin JOSUA 19 Bible Online

JOSUA 19 - Khumi Chin bible

JOSUA 19

¹Tlen pa-nyh tambe va iy phy pi nai khala, Semeon theaung yhm dengtheungchi khu ka-peang nga u nai ne. Huni khu ka-peang ly Juda theaungchi teng y phy pi nai khu ka-peang theung y awm.

²Huni khu ka-peangra y Beraseba mary, Seba mary, Molada mary,

³Hazashuala mary, Balah mary, Ezem mary,

⁴Elatolad mary, Bethula mary, Homah mary,

⁵Zikalet mary, Beth Makaboth mary, Hazar Susah mary,

⁶Beth Lebaoth mary hawi Saruhen mary napi nai mary kalen holai thomrei hawi, hunichi teng pang i marychi abawi nai ne.

⁷Huni bo y En mary, Rimon mary, Ether mary hawi Asnah mary napi nai mary kalen palyhrei hawi, tengpang i marychi py abawi.

⁸Huni mary kalen tengpang i marychi ly tokalawi mang Baletbera mary (Ramah mary) ryrei awm nai, mary bawibawichi abawi. Hini khu ka-peang ly Semeon theaung yhm dengtheungchi i khu ka-peang ne.

⁹Juda theaung i vui phy ly ngai nai tleaung y kau nai deaungkho y, Simeon theaung ai huni khu ka-peang theung i phy paji pi nai ne.

¹⁰Tlen pa-thom tambe va iy phy paji pi nai khala, Zebulon theaung yhm dengtheungchi khu ka-peang nga u bo. Nichi i nga nai khu ka-peang ly Sarid mary tym pa-rei kau.

¹¹Khujyh ly huni mary i dengdairei, Dabeseth mary hawi Jokanem mary nisi mang i micheaung takoleu iy, nidym mang i Marala mary ryrei tym.

¹²Khujyh ly Sarid mary dengdairei, nisi mang Khisloth Tabor mary khujyh tym pa-rei ne.

¹³Hu i nai nisi mang Kith Hepha mary hawi Itakazin mary y tym iy, Rimon mary mang tako nai lam i, Neah mary mang y amhi vui nai ne.

¹⁴Tosyh mang khujyh ly Hanathon mary mang y amhi iy, Jiphasela leaunghawi ra patem.

¹⁵Huni khu ka-peangra y Katath mary, Nahala mary, Shimron mary, Idala mary, Bethlehem mary napi nai mary kalen holai nyhrei hawi, huni tengpang i marychi abawi.

¹⁶Hini mary kalenchi hawi tengpang i marychi ly Zebulon theaung yhm dengtheungchi i khu ka-peang theung y awm nai ne.

¹⁷Tlen palyhrei tambe va iy phy paji pi nai khala, Isakhar theaung yhm dengtheungchi khu ka-peang nga u nai ne.

¹⁸Huni khu ka-peang theung y Jezarela mary, Khesulot mary, Shunem mary,

¹⁹Hapharaim mary, Sihon mary, Anaharath mary,

²⁰Rabith mary, Kishion mary, Abeth mary,

²¹Remeth mary, Akanim mary, hawi Bethpaze marychi abawi.

²²Khujyh ly Tabor mary, Shahazumah mary hawi Beth Semesh marychi ai takoleu iy, Jordan tavora tem nai ne. Hini khu ka-peang theung y, mary kalen holai tariurei hawi, hunichi tengpang i marychi abawi.

²³Huni marychi hawi tengpang i marychi ly Isakhar theaung yhm dengtheungchi nga nai khu ka-peang theung y awm nai ne.

²⁴Tlen pa-ngo tambe va iy phy paji pi nai khala, Asher theaung yhm dengtheungchi ly khu ka-peang nga u.

²⁵Huni khu ka-peang theung y Hilkath mary, Hali mary, Bitin mary, Akashap mary,

²⁶Alam Meleh mary, Amad mary, hawi Mishal marychi abawi. Nidym khujyh ly Karamela mary hawi Shihor Libnath marychi ai takoleu bo.

²⁷Hunaibaly nisi mang y ami iy Bethdakon mary y tym baly, Zebulon khu ka-peang hawi Jiphathela leaunghawi takoleu i, tosyh mang Bethemi mary hawi Naiela mary mang y tym. Huni bo y tosyh mang ang vum iy Kabula mary,

²⁸Ebron mary, Rihob mary, Hammon mary, Kanah marychi dengdairei, Sidon mary ryrei tym.

²⁹Hu i nai bi baly Ramah mary mang y ami iy, khaw parai nai apai awm nai Turu mary y tym. Naibaly Hosah mary mang y amhi iy, Mrithe pangli y tem. Khu ka-peang theung y Mahalab mary, Akhazi mary,

³⁰Ummah mary, Aphek mary, Rihob mary napi nai mary kalen apom phai nyhrei hawi, hunichi i tengpang y awm nai marychi abawi.

³¹Hini mary kalenchi hawi tengpang i marychi ly Asher theaung yhm dengtheungchi i khu ka-peang theung y awm nai ne.

³²Tlen tariu tambe va iy phy paji pi nai khala, Naphtali theaung yhm dengtheungchi khu ka-peang nga u nai ne.

³³Huni khu ka-peang i khujyh ly Hileh mary, Zaananim mary meingtym i Taru keung dengdairei amteaung iy, Adaminikeh mary, Jabanila mary hawi Lakum marychi ai takoleu i, Jordan tavora tem nai ne.

³⁴Khujyh ly nidym mang Azanoth Tabor mary mang y amhi iy, Hukkok mary y tym. Tokalawi khujyh ra y Zebulon khu ka-peang, Nidym mang khujyhra y Asher khu ka-peang, nisi mang khujyh ra y Jordan tavo napi naichi awm nai ne.

³⁵Khaw parai nai apai awm nai mary kalenchi ly; Zidim mary, Zerah mary, Hamath mary, Rakath mary, Kenesari mary,

³⁶Adamah mary, Ramah mary, Hazor mary,

³⁷Kadesa mary, Edrei mary, Enhazor mary,

³⁸Iron mary, Mikadalel mary, Horim mary, Bethanath mary hawi Beth Shemesh mary napi nai mary kalen holai takawrei hawi, hunichi i tengpang y awm nai marychi ne.

³⁹Huni mary kalenchi hawi tengpang i marychi ly Naphtali theaung yhm dengtheungchi i khu ka-peang theung y awm nai ne.

⁴⁰Tlen saryhrei tambe va iy phy paji pi nai khala, Dan theaung yhm dengtheungchi ly khu ka-peang nga u nai ne.

⁴¹Huni khu ka-peang theung y Zorah mary, Esatola mary, Irasamih mary,

⁴²Salabim mary, Aijalon mary, Jesala mary,

⁴³Elon mary, Timnah mary, Ekron mary,

⁴⁴Eltikeh mary, Kibathon mary, Baalath mary,

⁴⁵Jehud mary, Beneberak mary, Karthmon mary,

⁴⁶Mijakon mary hawi Rakon marychi hawi vanrei, Joppa mary tengpang y awm nai meingtymchi abawi.

⁴⁷Dan theaungchi ly mychi i khu ka-peang tama vui nai khala, Laish mary ai tavai tiu iy, mary i khumichi ai tleh pawn chum baly, huni mary y awm u bo. Lesa nanai mary amyn ai, cheng theaung i ampo Dan amyn mang y pathi palai u.

⁴⁸Hini marychi hawi tengpang i marychi ly Dan theaung yhm dengtheungchi i khu ka-peang theung y awm nai ne.

⁴⁹Israela chengchi ly pri verei ai phy amji u nai khala, Nun i chapo Josua i vui khaileaung meingtym khai pi takhra bo.

⁵⁰ARENG my leu pei nai kamta, Josua i hnei nai Ephraim mawi aheung meingtym i Timanath Serah mary ai, ni teng y pei pi u. Ni ly mary palum teang i, huni mary y awm bo.

⁵¹Pathyp pi nai keung Elijazar, Nun i chapo Josua hawi Israela cheng theaung yhm dengtheungchi i miteaung kehchi ly Siloh mary i ARENG awm nai Tabynako mo y, khu ka-peangchi ai tambe va iy, ARENG i kangai y phy paji pi bo. Hina nai kamta, pri phy pi nai kalop ly pajau nai ne.