Read Khumi Chin JOSUA 22 Bible Online

JOSUA 22 - Khumi Chin bible

JOSUA 22

¹Naibaly Josua ly Ruben, Kad hawi nisi Manase theaungchi ai palau iy,

²“Nangchi ly ARENG i miseaung Mosi my leu pei nai ngierei sa u iy, kai i leu pei nai bawibawi py tangai u bo.

³Nangchi ly vaini khrairei, Israela cheng theaung amjo amnau tengtawi, ka-ym awm parai nai hawimy asabawm u bo. Nangchi i ARENG Tameuh my leu pei nai kamta, ati sai py takhawi y naimy tangai u.

⁴Vai ly nangchi i ARENG Tameuh my adeu nai kamta, nangchi i chengchi ly tlamsa naimy awm u bo. Hunai deaungkho y nangchi ly ARENG i miseaung Mosi my khai takhra pi nai, Jordan tavo nisi mang y awm nai, nangmychi i khu ka-peang mang y vawi u.

⁵Nangchi i ARENG Tameuh ai tamen u; mymy i Reita leuchi kry u. Mymy i ngai nai kamta sa iy, ka-ym awm u. Mymy i kalop ai tlang, paleung ham nai ryrei so u, nanai Mosi my leu pei nai kamta, sa patyp u ai nai adawn u patyp ba,” napi.

⁶Hunaibaly Josua my, “Nangchi ly si, beram, muku, tangka, kheupaja, tamo, ateaung alang neangneangchi ai, paleung ka-echi teng i nai la pi u pawn bo. Nangmychi awm naira y tym u teang nai khala y, huni vawnsaichi ai nangmychi i amjo amnauchi teng y paji pi u,” nanai thui iy amtheaung hai i, nichi ai vawi hai bo. Naibaly nichi ly mychi i awm naira mang y vawi u nai ne. Mosi ly Manase theaung ka-hyhreichi teng y, Jordan tavo nisi mang khu ka-peang phy paji pi nai ne. Na i py Josua ly awm asai nai Manase theaung ka-hyhreichi teng y, takhra Israela theaungchi hawi vanrei awm ai nai, Jordan tavo nidym mang khu ka-peang phy pi bo.

⁹Hunai deaungkho y Ruben theaung, Kad theaung hawi nisi Manase theaungchi ly Kanan pri Siloh mary y awm nai takhra Israela chengchi teng i dengdairei theu iy, Mosi dengdairei ARENG my leu pei nai kamta, nichi my peang vui nai Kilead pri mang y vawi u nai ne.

¹⁰Ruben theaung, Kad theaung hawi nisi Manase theaungchi ly Jordan tavo nidym mang i Keliloth meingtym mang y tym u nai khala, khri pa-rei apu parai nai maicham sa u.

¹¹Takhra Israela chengchi ly “Tangai u! achi i khu ka-peang Jordan tavo nidym mang Keliloth meingtym y Ruben theaung, Kad theaung hawi nisi Manase theaungchi ly maicham sa u lawh! " napi.

¹²Naibaly Israela chengchi ly nisi mang y awm nai cheng theaungchi ai tiu ai nai Siloh mary y akachu u bo.

¹³Naibaly nichi ly pathyp pi nai keung Elaza i chapo Phineha ai, Kilead pri y awm nai Ruben theaung, Kad theaung hawi nisi Manase theaungchi mang y pato u.

¹⁴Theaung ha harei ra i yhm dengtheung lu sa nai leaung leaungrei, bawibawi miteaung keh leaung horeichi ly Phineha hawi vanrei chei u bo.

¹⁵Nichi ly Ruben theaung, Kad theaung hawi nisi Manase theaungchi awm nai Kilead pri y tym u i,

¹⁶ARENG i khumi mipuichi jeng y nichi teng y thui nai ly “Nangchi ly ati mana nai deaungkho y Israela chengchi i Tameuh ai tiu iy, hini hawi y nai kalop sa u lawh mo? Nangchi ly hini maicham sa u nai molam y, ARENG ai tiu u nai bo. Mymy ai khai u su lawh ly!

¹⁷peor meingtym y achi i sa tamang nai kamngo molam y, ARENG ly mymy i khumichi tlang tleaung y, no mi tym hai nai ny y lawh a? Huni kamngo vang ly achi avum jojo rai nai ny y a? Huni kamngo nairachi sa u bi ai a?

¹⁸Mymy ai vai, khai u su ai bo a? Nangchi ly ARENG ai vaini tiu u baly, khawndam mymy ly Israela cheng verei ai kado theu ai.

¹⁹Hunai deaungkho y nangchi i pri ly ARENG ai chiu ai nai amlau y na baly, Tabynako awm nai pri mang y angpeang iy, nangchi awm ai nai khu ka-peang kai teng y hnei u. Na i py kaichi i ARENG Tameuh i maicham ny y naimy, takhra maicham sa nai molam y mymy ai tiu u moh. Huna nai tiu naira y kaichi abawi moh sy.

²⁰Zerah i chapo Akhan ly taphra pawn ai nai vawnsaichi molam y, leu pei nai tangai y nai deaungkho y, Israela cheng verei pajeng naira avum nai ny y a? Akhan i kamngo molam y, mymy leaungrei deira avum nai khyh ny y,” napi u.

²¹Huna nai khala Ruben theaung, Kad theaung hawi nisi Manase theaungchi my nidym theaungchi i lu sa nai teng y,

²²“Sa thai naira len parai nai keung ly Tameuh ne! Mymy ly ARENG ne. Sa thai naira len nai keung ly Tameuh ne! Mymy ly ARENG ne. Achi i maicham ai ati mana nai y sa ai nai tla mo, nanai mymy ly pany. Nangchi ai py pany hai ai nai ngai. Kaichi ly ARENG ai tiu iy, ka-ym by y baly tlang heng ai nai pei moh!

²³Kaichi ly ARENG i leu pei nai ai tangai y pui naimy leng patlum nai kapathypra, teicha teinei talam nai kapathypra, amkawm nai kapathyprachi talam ai nai maicham sa u lawh baly, ARENG mymy naimy kaichi ai pajeng na sy.

²⁴Khawnvai kani y nangchi i kangpreangchi my kaichi i kangpreangchi teng y, ‘Nangchi ly Israela chengchi i ARENG Tameuh hawi ati amtawn u sai a?

²⁵Mymy ly Ruben theaung, Kad theaungchi napi nai nangchi hawi kaichi ai Jordan tavo my patleh takhra bo. Nangchi ly ARENG hawi ati sai py amtawn y,’ nanai thui nai deaungkho y nangchi i kangpreangchi ly kaichi i kangpreangchi ai ARENG ai chiu y naimy awm ai nai paka lawh na, nanai mawn nai deaungkho y, maicham kasa u nai ne.

²⁶Kaichi maicham sa nai ly kapathypra hawi katalamrachi leng patlum ai nai ny y.

²⁷Kaichi i khumichi i vui py, nangchi i khumichi hawi mo mang deung kangthauchi i vui py, pany hawi nai ka-ma-ra lawm ai nai sa nai ne. Kaichi ly kapathypra hawi katalamrachi ai leng patlum nai katalamra dengdairei, katalamra cheaungkhang hawi Tabynako mo y naini ARENG ai chiu ai, nanai hini maicham my pany hai ai. Hini molam y nangchi i kangpreangchi my, kaichi i kangpreangchi teng y, ‘Nangchi ly ARENG hawi amtawn abi y leang,’ nanai thui u pajau ai ny y.

²⁸Leu kabeaung y thui lawh baly. kaichi i kangpreangchi my, ‘khen cham, kaichi i amsi pajochi ly ARENG i maicham kamta, maicham harei sa u bo. Huni maicham ly leng patlum nai napi nai kapathyprachi talam ai nai ny y. Nangchi i khumichi hawi kaichi i khumichi i vui, pany nai ka-ma-ra naini ne,’ nanai thui pajau ai nai athang khai.

²⁹Kaichi ly leng patlum nai kapathypra, teicha teinei talam nai kapathypra, napi nai kapathyprachi talam ai nai maicham harei sa iy, AENG ai tiu naimy, mymy ai khai su ai ny y. Kaichi ly kaichi i ARENG Tameuh i awm naira Tabynako mo y awm nai maicham ny y baly, takhra mani maicham ai py sa ai ny y,” nanai thui u bo.

³⁰Pathyp pi nai keung Phineha hawi vanrei, Israela cheng theaung miteaung kehchi napi nai, nupai lu sa nai leaung horeichi ly Ruben theaung, Kad theaung, nisi Manase theaungchi i thui nai ngierei thai nai khala amo theu u bo.

³¹Huna nai khala pathyp pi nai keung Elaza i chapo Phineha my, “ARENG ly kaichi hawi vanrei awm, nanai kaichi vai, kapany u bo. Mymy ai tiu y nai deaungkho y, Israela chengchi ly ARENG my pajeng naira i nai lawi naira nga u bo,” nanai nichi teng y thui pi.

³²Hunaibaly Phineha hawi miteaung kehchi ly Ruben theaung hawi Kad theaungchi awm nai Kilead pri i dengdairei, Kanan pri y tym teng chum baly, Israela chengchi teng y mychi i sa nai ngierei amti pi nai ne.

³³Huna nai khala Israela chengchi ly amo theu naimy Tameuh ai palo u bo. Nichi ly Ruben theaung, Kad theaungchi awm nai pri y tavai tiu iy taphra ai nai dawn u y leang bo.

³⁴Ruben theaung, Kad theaungchi my, “ARENG ly Tameuh ne, nanai hini maicham ly kaichi i pany hai nai ne sy,” nanai thui naimy huni maicham ai “Pany hai nai” nanai amyn pathi u bo.