Read Khumi Chin JOSUA 24 Bible Online

JOSUA 24 - Khumi Chin bible

JOSUA 24

¹Josua ly Israela cheng theaung bawibawichi ai Sekhem mary y angym hai bo. Ni ly Israela miteaung kehchi, lu sa naichi, tara chih nai keungchi, bangtangchi ai palau i nichi ly Tameuh i mo y tym u bo.

²Huna nai khala Josua my khumi bawibawichi teng y, “Israela chengchi i ARENG Tameuh my hina nai leu ang pei bo. ‘jangni y nangchi i amsi pajo napi nai Terah, ni i chapo Abraham hawi Nahorchi ly Euphrat tavo vai mang y awm iy, tameuh takhrachi ai chiu u nai ne.

³Kai ly nangchi i amsi pajo Abraham ai Euphrat tavo vai mang y awm nai meingtym i dengdairei kapalau iy, Kanan pri meingtym tleirei y kapahawi i, ni i kangpreangchi ai peung hai bo. Ni ai chapo Isaka thawn hai bo.

⁴Isaka teng y chapo Jakob hawi Esaw ai thawn hai. Kai ly Esaw ai Edom mawitleaung meingtym kapei pi; Jakob hawi ni i chapochi ly Aikupta pri mang y chei iy awm u bo.

⁵Hunaibaly kai ly Mosi hawi Aron ai pato iy, Aikupta pri y ka-jei awm parai naichi katym hai chum baly, nangchi ai kang pahawi bo.

⁶Kai ly nangchi i amsi pajochi ai Aikupta pri i dengdairei patheu nai khala, Aikupta chengchi ly nichi nithun keaungngo ka-richi, keaungngo risachi hawi hui iy tiu u. Nichi ly pangli kamsenra tym u nai khala,

⁷kai teng y vo naimy kasabawmra hnei u bo. Huna nai khala kai ly nichi hawi Aikupta tavaimichi sala y khuveng theu hai. Paleung ka-echi i tlang tleaung y pangli tui um hai meuh i, nichi ly tui y dei u chauchau bo. Kai ly Aikupta pri ai mana pajeng mo, nanai nangchi pany u nai ne. Nangchi ly daichi ka-vym y krarawm pa-rei awm u.

⁸Naibaly kai ly nangchi ai Amori chengchi awm nai Jordan tavo nisi mang y kapahawi bo. Nichi my nangchi ai ang tiu teu i py, kai ly nangchi ai eaung hai. Nangchi ly nichi i pri ai tiu pajau nai khala, kai ly nichi ai katamyh pawn nai ne.

⁹Hunaibaly Zepho i chapo Moba pri samrang Balek ly Israela chengchi ai tiu. Ni ly nangchi ai pasawi patau ai nai Bora i chapo Balam ai palau hai bo.

¹⁰Na i py kai ly Balam i hnei takeng nai sai tangai pi y i, ni ly nangchi ai amtheaung hai bo. Hina nai khala, kai ly nangchi ai Balek kiu i nai atleu pi bo.

¹¹Hunaibaly nangchi ly Jordan tavo angpeang iy, Jeriko mary mang y tym u. Jeriko mary i khumi Amori cheng, Perizi cheng, Kanan chengchi ai tiu u. Na i py kai ly nangchi teng y, nichi bawibawi ai tiu i eaung hai bo.

¹²Nangchi tavai amsa u nai khala, kai ly nichi ai ahei hai phro iy, Amori samrang leaung nyhrei ai patheu veng bo. Nangchi i haisau hawi thailiho ateaungchi deaungkho y, eaung u nai ny y leang.

¹³Nangchi my thawn vai y, so vai y nai khaileaung meingtym hawi, so vai y nai marychi ai nangchi teng y kang pei bo. Vai ly nangchi huni khaileaung y awm iy, nangchi ui y nai kreip akho hawi, Olive akhochi ra i dengdairei, athai cha u nai ne,” napi.

¹⁴Josua my thui bi i, “Vai nangchi ly ARENG ai jei kaji naimy tahm khai iy, mymy i kalop ai paleung hawi verei, ka-ym awm naimy so u. Mesopotamia pri hawi Aikupta pri y nangchi i amsi pajochi my chiu nai tameuhchi ai khai su iy, ARENG ai naini chiu u.

¹⁵Leu kabeaung y nangchi ly ARENG ai chiu y lawh baly, Mesopotamia pri y nangchi i amsi pajochi my chiu nai tameuhchi mo, ti y baly vai, nangchi awm nai Amori chengchi my chiu nai tameuhchi ai mo, chiu ai nai vaini my vawi takhra u. Kai hawi kai i yhm dengtheungchi ne teu khyly ARENG ai naini chiu ai khyh,” nanai thui pi bo.

¹⁶Huna nai khala khumi bawibawichi my, “Kaichi ly mani neng khala py, ARENG ai khai su iy, tameuh takhrachi ai chiu ai ny y!

¹⁷Kaichi i ARENG Tameuh ly kaichi i ampochi hawi kaichi ai miseaung achei nai, Aikupta pri i dengdairei atleu pi bo. Mymy i sa pi nai lyh ai hawi parai naichi kaichi niu u bo. Pri neangneangchi tako prei nai khuleaung jeungrei, mymy ly kaichi ai ama hai iy, ang kry nai ne.

¹⁸Kaichi ly hini pri theung y kun u nai khala, mymy ly hini meingtym y awm nai Amori cheng bawibawichi ai patheu pi pawn bo. Hunai deaungkho y kaichi ly ARENG ai naini chiu u ai. Mymy ly kaichi i Tameuh ne,” nanai pathang u bo.

¹⁹Huna nai khala Josua my khumichi teng y, “Nangchi ly ARENG ai chiu vam ai ny y. Mymy ly chai parai nai Tameuh ne i, nangchi i kamngo pahen pi ai ny y; mymy ly takhosi parai nai ne.

²⁰Nangchi ly ARENG ai khai su iy, tameuh takhrachi ai chiu u lawh baly, nangchi ai pahen nai Tameuh ly nangchi ai paleung ka-e khai iy, myh kang nai pa-rei pajeng ai,” napi.

²¹Khumichi my, “Kaichi ly ARENG ai naini chiu u ai,” nanai Josua teng y pany hai u bo.

²²Josua my nichi teng y, “Nangchi ly ARENG ai naini chiu u ai, nanai thui u nai ly nangmychi naimy pany hai nai keung lawm u bo,” napi. Huna nai khala nichi my, “Kaichi ly kaimychi naimy pany hai nai keungchi ne khypkhyp bo,” napi u.

²³Josua my, “Hunaibaly nangchi teng y awm nai tameuh takhrachi ai khai su iy, Israela chengchi i ARENG Tameuh teng y ahihawi iy chiu u,” napi.

²⁴Huna nai khala khumichi my Josua teng y, “Kaichi ly kaimychi i ARENG Tameuh ai chiu iy, mymy i leu tangai ai,” nanai adeu u bo.

²⁵Hunai deaungkho y Josua ly huni kani y, khumichi hawi Leu Maikawm asa chum baly, Sekhem mary y nichi sa patawm ai nai reitachi khai pi bo.

²⁶Josua ly hini reitachi ai Tameuh i Reita cha-iu theung y tajiu typ nai ne. Hunaibaly ni ly lengseaung pui harei la iy, ARENG i meingtym kachai awm nai Taru keung anui y leng bo.

²⁷Josua my khumi bawibawichi teng y, “Hini lengseaung ly achi i vui pany hai naira lawm ai. Achi teng y ARENG my leu pei nai ngiereichi ai, hini lengseaung ly thai ai. Hunai deaungkho y nangchi ly nangchi i Tameuh ai tiu lawh baly, hini lengseaung ly pany hai naira lawm ai,” nanai leu pei bo.

²⁸Hunaibaly Josua ly khumi bawibawichi ai vawi ai nai pei i, nichi ly mychi i awm naira mang y vawi u bo.

²⁹Hunaibaly ARENG i miseaung, Nun i chapo Josua ly saneng chungvai atlo horei awm i dei bo.

³⁰Nichi ly Kaasa mawi tosyh mang Ephraim mawi aheungra i, Timnah Serah mary y awm nai, my i peang nai khaileaung y ni i veu up bo.

³¹Josua heng nai sala ryrei Israela chengchi ly ARENG ai chiu u. Josua dei nai bo y Israela chengchi i vui ARENG i sa pi nai ngiereichi ai niu nai lu sa naichi heng nai sala ryrei py nichi ly ARENG ai chiu u nai ne.

³²Israela chengchi ly Aikupta pri i dengdairei syn u nai, Josepha i hiuchi ai Sekhem i ampo, Hamor i chapochi teng y Jakob my tangkacho chungvairei hawi van nai, Sekhem mary i khaileaung y up u bo. Huni khaileaung ly Josepha i kangpreangchi amtym nai khaileaung ne.

³³Aron i chapo Elaza py dei nai deaungkho y, ni i veu ai ni i chapo Phineha teng y pei nai, Ephraim mawi aheung i Kibeah mary y up u bo.