Read Khumi Chin JOSUA 3 Bible Online

JOSUA 3 - Khumi Chin bible

JOSUA 3

¹Huni bo i kani khawn angthodyh y Josua hawi Israela cheng bawibawichi ly Akasia Taira i dengdairei Jordan tavo mang y theu u bo. Tavo angpeang y rai khala, tavo peang y tai u.

²Kani thomrei bo y lu sa naichi ly Tai mang y amki i,

³khumichi teng y, “Nangchi i ARENG Tameuh i Leu Maikawm Pawm ai, pathyp pi nai keungchi my angjeaung nai niu nai khala, nangchi ly Tai vym iy, nichi nithun abang u ai nai tla.

⁴Nangchi ly hini lam y tlenrei py tako u vai y nai deaungkho y, nichi my lam ang patei pi ai. Na i py nangchi ly Leu Maikawm Pawm sahawi y chei u moh. Pawm nithun mang miu sangnyhrei ka-khan y abang u ai nai tla,” nanai thui pi bo.

⁵Naibaly Josua my khumichi teng y, “Khawndam ly ARENG my nangchi teng y lyh ai awm nai ka-ma-ra patei ai i, nangchi ngan tlang apachai u,” napi.

⁶Naibaly ni my pathyp pi nai keungchi teng y Leu Maikawm Pawm angjeaung iy mipuichi mo mang tako hai nai kamta, nichi ly tako u nai ne.

⁷ARENG ly Josua teng y, “Israela chengchi i mo y vaini dengdairei, nang ai kaimy tahm kang pasang ai. Kai ly Mosi hawi vanrei awm nai kamta, nang hawi py vanrei awm, nanai nichi pany u ai.

⁸Leu Maikawm Pawm angjeaung u nai pathyp pi nai keungchi ly tavo peang y tym u nai khala, nichi ly tui theung y angdo u ai nai thui pi,” nanai leu pei bo.

⁹Naibaly Josua ly mipuichi teng y, “Jeu u, nangchi i ARENG Tameuh my leu pei nai ngierei tangai u.

¹⁰Nangchi amsa u nai khala, Tameuh ly Kanan cheng, Hiti cheng, Hivit cheng, Perizi cheng, Kirakashi cheng, Amori cheng hawi Jebusi chengchi ai patheu takengkei ai.

¹¹Khaileaung pri verei ai peang nai ARENG i Leu Maikawm Pawm ly nangchi ai lu sa iy, Jordan tavo angpeang nai khala, Tameuh kangheng ly nangchi theung y awm, nanai nangchi pany u ai.

¹²Vai ly Israela cheng theaung harei y khumi leaung leaungrei, khumi leaung holai nyhreichi ai vawi u takhra.

¹³Khaileaung pri verei ai peang nai keung ARENG i Leu Maikawm Pawm angjeaung nai pathyp pi nai keungchi, tavo tui ai chiu phai chiu baly tavo syh mang leaung kathiu nai tui ly anawn iy, meingtymrei y am-eng cheng vui ai,” napi.

¹⁴Huni neng ly choh katui neng ne i, tavo tui len nai neng py ne. Khumichi ly Jordan tavo angpeang ai nai Taira i dengdairei theu u nai khala, pathyp pi nai keungchi ly nichi mo mang Leu Maikawm Pawm ajeaung naimy tako u bo. Pathyp pi ai keungchi ly tavo theung y satla u nai dengdairei,

¹⁶tui leaung nai anawn vui i, tavo syh mang palo kyh naira y awm nai Zarethan mary ahawi i Adam mary y tui am-eng cheng nai ne. Pangli kadei tym pa-rei leaung nai tavo tui ly kang vui nai deaungkho y, khumi bawibawichi ly Jeriko mary sahawi i tavo vai mang y angpeang u thai nai ne.

¹⁷Khumi bawibawichi tako u nai pajau pa-rei, ARENG i Leu Maikawm Pawm angjeaung nai pathyp pi nai keungchi ly Jordan tavo umtang phuirawm naira y angdo u bo.