Read Khumi Chin JOSUA 4 Bible Online

JOSUA 4 - Khumi Chin bible

JOSUA 4

¹Israela cheng theaung vereichi Jordan tavo angpeang u chum nai khala, ARENG ly Josua teng y,

²“Israela cheng theung ha harei y leaungrei, khumi leaung holai nyhrei vawi takhra iy,

³Jordan tavo umtang, pathyp pi nai keungchi angdo nai Jordan tavo umtang i, lengseaung holai nyhrei akhui u; nangchi vaini Tai sa ai nai meingtymra y huni lengseaungchi khai u,” nanai leu pei bo.

⁴Naibaly Josua ly my i vawi yb nai khumi leaung holai nyhreichi ai palau i,

⁵nichi teng y, “Nangchi ly ARENG Tameuh i Leu Maikawm Pawm mo i, Jordan tavo theung y satlo u; Israela cheng theaung ha harei i vui, leaungrei y lengseaung ha harei syn kryh ai nai tla.

⁶Hini lengseaungchi ly ARENG i sa pi nai leaungsai khumichi pany jo ai nai ka-ma-ra ne. Vai mo mang y nangchi i cho chanauchi my, ‘hini lengseaungchi ly ati mana nai sai mo?’ nanai angdeang lawh baly,

⁷nangchi my ARENG i Leu Maikawm Pawm Jordan tavo angpeang hai nai thym khala y, tavo tui leaung nai anawn vui nai sai thui pi ai nai tla; hini lengseaungchi hini meingtym y awm lawh nai sai ly Israela chengchi ai avawrei pany hai jo ai,” napi.

⁸Huni khumichi ly Josua i leu pei nai kamta sa u bo. ARENG my Josua teng y leu pei nai kamta, nichi ly Israela cheng theaung harei y lengseaung ha harei, lengseaung holai nyhrei Jordan tavo umtang i la iy Tai naira y khai u bo.

⁹Josua ly pathyp pi nai keungchi Leu Maikawm Pawm angjeaung naimy angdo nai Jordan tavo umtangra y py, lengseaung holai nyhrei leng bo. (Huni lengseaungchi ly huni meingtym y, vaini khrairei awm jo nai ne.)

¹⁰Josua i dengdairei ARENG my leu pei nai ngierei, khumi bawibawichi sa pajau nai ryrei, pathyp pi nai keungchi ly Jordan tavo umtang y angdo u jo. Hina nai sa ai nai ly Mosi my leu pei yb nai ne. Naibaly khumi mipuichi py, tavo angpeang u kaliki bo.

¹¹Nichi bawibawi tavo vai mang y tym u angym nai khala, pathyp pi nai keungchi ly ARENG i Leu Maikawm Pawm angjeaung iy, khumichi i mo mang tako u nai ne.

¹²Ruben theaung, Kad theaung hawi Manase theaung ka-hyhreichi ly Mosi my leu pei yb nai kamta, takhra Israela chengchi i mo mang tavai ateaung syn naimy amsa u bo.

¹³Nichi ly khumi kanghu leaung meaungkateaung palyhrei tahm awm i, tavai thau ai nai ARENG i mo y tavo angpeang naimy, Jeriko mary sahawi i angdym mang y tapai u.

¹⁴Huni kani y ARENG i atiti sa pi nai molam y Israela chengchi ly Josua ai lu sa pi nai keung kalen keh, nanai tahm khai u bo. Nichi ly Mosi ai tahm khai nai kamta, Josua ai py mymy heng nai ryrei tahm khai u nai ne.

¹⁵Naibaly ARENG ly Leu Maikawm Pawm angjeaung nai pathyp pi nai keungchi Jordan tavo theung i dengdairei, lyn kalau ai nai Josua ai leu pei hai bo.

¹⁷ARENG my leu pei nai kamta Josua ly thui pi bo.

¹⁸Pathyp pi nai keungchi tavo peang y tym phai thym u baly tavo tui ly leaung ali teang i, tavo jeungrei tui kawi teang.

¹⁹Khumi bawibawichi ly angchei lo kani horei kani y, Jordan tavo angpeang u chum baly, Jeriko mary nisi mang i Kilakala meingtym y Tai u nai ne.

²⁰Josua ly Jordan tavo theung i la nai lengseaung holai nyhrei ai, huni meingtym y leng bo.

²¹Naibaly ni ly Israela chengchi teng y, “Vai mo mang y nangchi i cho chanauchi my, hini lengseaungchi ly ati mana nai sai mo, nanai angdeang u lawh baly,

²²nangchi my nichi teng y, Israela chengchi ly Jordan tavo khaileaung kaphui tleaung mang angpeang nai satangchi amti pi u.

²³Nangchi i ARENG Tameuh ly pangli kamsen ai tui kang hai vui nai kamta, Jordan tavo nangchi angpeang u nai sala ryrei ly tui kang hai vui nai satang amti pi u.

²⁴Hini lyh ai hawi nai ka-ma-ra molam y, khaileaung pri y awm nai khumi bawibawichi ly ARENG i nang parai nai sai pany u ai. Nangchi py nangmychi i ARENG Tameuh ai jei kaji naimy tahm khai u jojo ai,” napi nai ne.