Read Khumi Chin JOSUA 6 Bible Online

JOSUA 6 - Khumi Chin bible

JOSUA 6

¹Israela chengchi Jeriko mary theung y kun pajau y ai nai apai katheu pa-khochi kho typ iy, tamcheaung typ nai ne. Khumi ami py mary theung y kun nai theu nai so pajau y.

²ARENG ly Josua teng y, “Kai ly Jeriko mary hawi vanrei, mary ai peang nai samrang py, sorai paleung awm nai tavaimi risa bawibawichi py, nang i kiu y kang au ai.

³Nang hawi nang i tavaimichi ly kanirei y tlen tlenrei, kani tariu tym pa-rei mary taki ai nai tla.

⁴Pathyp pi nai keung leaung saryhreichi ly baw ha harei syn iy, Leu Maikawm Pawm mo mang tako ai nai tla. Saryh kani y pathyp pi nai keungchi ly baw eng naimy lu sa iy, nang hawi nang i tavaimichi ly mary ai tlen saryhrei taki ai nai tla.

⁵Naibaly pathyp pi nai keungchi ly baw raawi pajeng parai naimy tlenrei eng u ai nai tla. Huni baw katyn thai nai khumi bawibawichi ly tao pajeng parai naimy aeu u ai nai tla. Huna nai khala mary apai anawi ai i, tavaimi risa bawibawichi ly mychi awmra dengdairei, rai y nai my mary theung y kun ai nai nga u ai,” nanai leu pei bo.

⁶Josua ly pathyp pi nai keungchi ai palau iy nichi teng y, “Leu Maikawm Pawm angjeaung u ly nangchi theung i leaung saryhreichi ly bawchi syn naimy, Leu Maikawm Pawm i mo mang tako u,” napi.

⁷Naibaly kangman keh y tavaimi risachi, huni bo y ARENG i Leu Maikawm Pawm, kangkhym keh y khumichi abang iy mary taki ai nai Josua my leu pei nai ne.

⁸Josua my leu pei nai kamta, baw eng nai pathyp pi nai keungchi i mo y, tavai ateaung amthyp nai risachi tako u amteaung bo. Nichi i nithun y Leu Maikawm Pawm angjeaung nai pathyp pi nai keungchi, nichi nithun y risachi tako u bo. Nichi tako u nai thym khala, pathyp pi nai keungchi ly bawchi eng u nai ne.

¹⁰Josua my khumi bawibawichi teng y, “Kaimy leu pei y rai khala, amimi py aeu moh, leu py katheu moh,” nanai thui pi yp bo.

¹¹Hunaibaly Josua ly ARENG i Leu Maikawm Pawm angjeaung naichi ai, mary kamki tlenrei taki hai. Naibaly nichi ly Taira y vawi u ali teang i, vumrei anawn u bo.

¹²Kani pa-nyh khawn angthodyh, Josua ly i ang thau bo. Pathyp pi nai keungchi hawi tavaimi risachi ly jangdyh i kamta, tlen pa-nyh mary taki u bo. Ka-man keh y risachi, huni bo y baw saryhrei eng nai pathyp pi nai keung leaung saryhreichi, nichi nithun y ARENG i Leu Maikawm Pawm angjeaung nai pathyp pi nai keungchi hawi, kangkhym keh y risachi abang u nai ne. Nichi amki u nai thym khala, pathyp pi nai keungchi my bawchi eng u.

¹⁴Pa-nyh kani y nichi ly mary ai tlenrei taki u bi i, Tai mang y vawi u ali teang bo. Nichi ly huna nai kamta, kani tariurei mary taki u nai ne.

¹⁵Saryh kani khawn mang kani achaw deaung nai neng khala nichi, i ang thau u i, mary taki reng nai kamta, tlen saryhrei taki u.

¹⁶Mary ai tlen saryhrei taki thym nai, pathyp pi nai keungchi baw eng ai yh yh nai khala, Josua ly khumi bawibawichi teng y, “Tao pajeng parai naimy aeu u; ARENG my nangchi teng y mary ang pei nai bo!

¹⁷Mary hawi vanrei, mary theung y awm nai ngierei vawnsaichi ly ARENG i vui talam nai palawn iy, taphra pawn ai nai tla. Neampachy Bima Rahabi hawi, ni i yhm dengtheungchi ai naini patleaung u. Ati mana nai mo na baly, achi i khen paviu nai khumini ai heu pi vui nai deaungkho y ne.

¹⁸Na i py nangchi ly taphra pawn ai naira i, ati sai py lo u moh; taphra pawn ai nai tla. Leu kabeaung y la lawh baly, Israela Tai theung y patang naira avum ai.

¹⁹Muku, tangka, kheupaja, tamochi hawi sa nai ateaung alang ngiereichi ai ly ARENG i vui khai takhra iy, ARENG i ateaungchi kry nai theung y khai ai nai tla ai,” nanai leu pei bo.

²⁰Naibaly pathyp pi nai keungchi my baw eng phai eng baly, khumi bawibawichi ly tao pajeng parai pa-rei aeu u i, mary apaichi anawi seaungkhrang na bo. Israela cheng bawibawichi ly mary theung y rai y naimy kun u i, mary ai vym vui bo.

²¹Nichi ly mary theung y awm nai neampacho, neampachy, miteaung deaungdichi ai py, si, beram, keaungngo kano kasauchi ai py, haisau hawi tleh u pawn bo.

²²Huni bo y Josua ly huni pri khen paviu nai khumi leaung nyhrei teng y, “Nangni ly neampachy bima teng y leu adeu hawi nai kamta, ni i yhm dengtheungchi ai palau ly hawi ba,” nanai pato bo.

²³Naibaly nini ly Rahabi hawi vanrei, ni i amhm ampo, ni i amprochi hawi yhm dengtheungchi ai py hawi nai ne. Miseaungchi ai py takhawi y naimy, nichi bawibawi ai Israela chengchi i Tai sahawi chymme nai meingtymra y khai bo.

²⁴Naibaly nichi ly mary hawi vanrei, mary theung y awm nai cheaungkhangchi ai, mai hawi leng pawn bo. Na i py nichi ly muku, tangka, kheupaja kamsen, tamochi hawi sa nai ateaungchi ai la iy, ARENG i ateaung kry nai theung y khai u bo.

²⁵Na i py Josua my neampachy bima Rahabi hawi amjo amnau bawibawichi ai ly lawi hai bo. Ati mana nai mo na baly, Jeriko mary khen paviu ai nai, my i pato nai khumi leaung nyhrei ai heu pi nai deaungkho y ne. (Vaini khrairei ni i kangpreangchi ly Israela cheng theung y awm.)

²⁶Huna nai khala Josua my, “Jeriko mary palum teang nai khumi ly ARENG i amsawi lawi kalei sy; mary palum teang ai nai langdeng sa nai khumi ly chapo chalu dei sy; mary katheu pa-kho sa nai khumi ly chapo sawi dei sy,” nanai pasawi kheih bo.

²⁷ARENG ly Josua hawi vanrei awm nai deaungkho y, ni i amyn ly pri verei y amthang nai ne.