Read Khumi Chin JOSUA 8 Bible Online

JOSUA 8 - Khumi Chin bible

JOSUA 8

¹ARENG my Josua teng y, “Nang ly tavaimi risachi hawi vanrei, A-i mary mang y tavai thau ba. Jei moh, paleung phra moh. Kai ly nang i kiu y A-i samrang hawi vanrei, mipuichi, ni i mary, ni i khu ka-peang kang pei ai.

²Nang ly Jeriko mary hawi Samrang ai tamyh vui nai kamta, A-i mary hawi samrang ai py tamyh ai nai tla. Na i py vawnsai hawi tawnbawichi ly la pajau mang. Mary nithun mang kun pajau ai nai lampawm atheng hai ba,” nanai leu pei bo.

³Hunaibaly Josua ly tavaimi risa bawibawichi hawi, A-i mary mang y tavai amsa ai nai angvei u rym bo. Ni ly vawi patyp nai tavaimi risa leaung meaungkateaung thomrei pato iy,

⁴“Nangchi ly mary nithun kang sa kyh mang meingtym lo u. Mary tiu ai nai angvei u rym.

⁵Kai hawi kai i risachi ly mary sahawi y katapai u ai. A-i mary i khumichi ly kaichi mang y theu iy ang tiu u nai khala, kaichi ly jangvai i kamta, anaw naimy angpreng u ai.

⁶Huna nai khala nichi ly mary hawi palo nai meingtym mang y tym pa-rei, kaichi nithun ang hui u ai. Kaichi ly vaichi khala i kamta preang u nai bo, nanai nichi athang khai u ai.

⁷Hunaibaly nangchi ly abyhra i nai theu u iy, mary tiu vui ai nai tla. Nangchi i ARENG Tameuh ly nangchi i kiu tleaung y mary ang au ai.

⁸Nangchi mary ai tiu vui chum baly, ARENG my leu pei nai kamta, mary mai leng vui ai nai tla. Hini leu pei nai kamta so u,” nanai leu pei.

⁹Naibaly Josua ly vawi patyp nai risachi ai pato i, nichi ly A-i mary nidym ngan mang hawi Bethela mary sahawi y abyh iy ajeng u bo.

¹⁰Khawn angthodyh Josua ly Israela cheng miteaungkehchi hawi vanrei, tavaimi risachi ai lu sa iy, A-i mary mang y amsa u bo.

¹¹Ni hawi vanrei abang nai tavaimi risachi ly mary katheu pa-kho mang lyn iy, tosyh mang y meingtym la u bo. Nichi i Tai naira hawi mary sala y leaunghawi awm.

¹²Ni ly tavaimi risa leaung sangpangrei tahm ai, mary nidym i mang A-i mary hawi Bethela mary sala y abyh hai bo.

¹³Tavaimi kamkawm pui ai mary i nidym mang y meingtym la hai. Huni vum Josua ly leaunghawi theung mang y satla jo nai ne.

¹⁴A-i mary i samrang ly Josua i tavaimi risachi ai niu baly, my i tavaimi risa bawibawichi ai pangym kaliki iy, Israela risachi ai tiu ai nai Jordan tavo leaunghawi, jangvai atiu nai meingtym mang y amsa u bo. Na i py ni ly mary nidym mang y Israela tavaimichi amo yb nai ly pany y.

¹⁵Josua hawi ni i tavaimi risachi ly tavai sum nai amlawn iy, mary angam mang y angpreng u bo.

¹⁶A-i mary i samrang ly mary theung y awm nai neampacho bawibawichi ai palau iy, Josua i tavaimi nithun hui hai i, nichi ly mary hawi palo naira y tym u bo.

¹⁷A-i mary[2]i khumi bawibawichi ly Israela chengchi nithun hui u nai y, mary typ ai nai khumi leaungrei py by y na bo.

¹⁸Huna nai khala ARENG ly Josua teng y, “Nang i tivi ly A-i mary mang y patyp; nang i kiu y mary kang au ai,” napi. ARENG i leu pei nai kamta,

¹⁹Josua ly tivi amkhaw iy mary mang y patyp nai khala, tavaimichi ly abyhra i nai theu u kaliki iy, mary theung y kun u i, mary ai mai hawi leng praw ryp bo.

²⁰A-i mary i khumichi ly nithun mang y khen alengli nai khala, mary mang i maikhyh theu tokalo nai niu u. Huna nai khala mary angam mang y angpreng u nai Israela risachi ly ali teang i, A-i mary i khumichi ai tiu u nai deaungkho y, nichi tleaungra by y na bo.

²¹Josua hawi ni i risachi ly mychi i amo yb nai tavaimi risachi my mary vym vui nai py, mary ai mai my kang nai ai py, niu baly alengli teang iy, A-i mary i khumichi ai tleh u bo.

²²Mary theung y awm nai tavaimi risachi my py theu iy tiu u i, A-i mary i khumichi ly katanmeuh naira avum nai deaungkho y, nichi bawibawi dei u be nai ne. A-i samrang ny y baly ami py kangheng tleaung y.

²³Israela risachi ly A-i samrang ai patiu iy. Josua teng y pahawi u bo.

²⁴Israela risachi ly adymra y paleung ka-echi ai leaungrei py tleaung y pa-rei padei chum baly, A-i mary theung y kun teang iy, awm rai nai khumi ngiereichi ai tamyh u pawn nai ne.

²⁵Mary i khumichi ai padei be nai pa-rei Josua ly my i tivi patlaw y naimy, A-i mary mang y patyp jo nai ne. Huni kani y leaung meaungkateaung atlo sangnyhrei awm nai mary i khumi bawibawichi ai padei u bo.

²⁷Josua teng y ARENG my leu pei nai kamta, Israela chengchi ly si, beram tawnbawichi hawi, vawnsaichi ai mychi i vui la u bo.

²⁸Josua ly A-i mary ai mai hawi taphra nai deaungkho y, vaini khrairei mary ka-nawi awm jo nai ne.

²⁹A-i mary i samrang ai py, dengkeaung tleaung y akaeu hai chum baly bang hau iy, kani dym pa-rei khai bo. Kani avah nai khala veu la i, mary katheu pa-khora y aphi su ai nai Josua my leu pei bo. Naibaly nichi ly veu tleaung y lengseaungchi pakheng u achu i, huni ly vaini khrairei awm jo nai ne.

³⁰Naibaly Josua ly Ebala mawi salo y Israela chengchi i ARENG Tameuh teng y apathyp ai nai maicham sa.

³¹ARENG i miseaung Mosi i reitara y, “Tamo ateaung alangchi hawi, sih y nai lengseaungchi hawi maicham sa ai nai tla,” nanai leu pei nai kamta, huni maicham ai sa. Nichi ly leng patlum nai kapathypra hawi, amkawm nai kapathyprachi maicham tleaung y ARENG teng y talam u bo.

³²Josua ly lengseaungchi ra y Mosi my tajiu pi nai Reita leu ai, Israela chengchi i mei ka-niu y tapeang bi nai ne.

³³Lu sa naichi, miteaungkehchi, tara chih nai keungchi dengdairei, Israela cheng bawibawichi ly nichi hawi vanrei awm nai cheng takhrachi py, ARENG i Leu Maikawm Pawm angjeaung nai Levi theaung pathyp pi nai keungchi i hi mang hu mang, Pawm i langvawi lamtang aphy iy angdo u. Khumi phy ka-hyhreichi ly Kerazin mawi ai nithun thun iy vai, phy ka-hyhreichi ly Ebala mawi ai nithun thun naimy angdo u bo. Nichi ly amtheaung naira nga u ai nai khala y, huna nai sa u ai nai tla, nanai ARENG i miseaung Mosi my leu pei nai ne.

³⁴Naibaly Josua ly Reita leu pei nai cha-iu theung y tajiu pi typ nai amtheaung naira hawi, amsawi lawi nairachi abawi nai leusai bawibawichi ai, tao pajeng parai naimy phain pi.

³⁵Josua ly neampachy hawi deaungdichi, nichi hawi vanrei awm nai cheng takhrachi raurei, Israela cheng bawibawichi i mo y, Mosi my pei nai Reita ngiereichi phain pi nai ne.