Read Khumi Chin JOSUA 9 Bible Online

JOSUA 9 - Khumi Chin bible

JOSUA 9

¹Jordan tavo nidym mang y awm nai mawi aheung, mawi kheutang, tosyh mang Lebanon mawi ryrei sau nai, Mrethe pangli peang meingtymchi ai peang nai samrang bawibawichi ly Israela chengchi i, eaung pawi sa nai satang thai u bo. Huni samrangchi ly Hiti cheng, Amori cheng, Kanan cheng, Perizi cheng, Hivit cheng, Jebusi cheng i samrangchi ne.

²Nichi ly amkawm iy, Josua hawi Israela chengchi ai tiu ai nai paleung adyh u bo.

³Hivit chengchi napi nai Kibeon mary i khumichi ly Jeriko mary hawi A-i mary ai mana tiu iy eaung nai mo, nanai thai u nai khala,

⁴nichi ly Josua ai li-tapawp ai nai dawn u bo. Nichi ly cha-nei vawn pavei nai paisiu kangngymchi, kreip hang tleng nai mawipeih adym bau naichi ai keaungngo kano kasau tlang tleaung y tang u.

⁵Nichi ly baichu ka-seichi amchiu iy, phainai kamawnchi amchiu u. Jeikha iy angtapo thau nai teicha teineichi syn u.

⁶Naibaly nichi ly Kilakala meingtym y tai u nai Josua hawi Israela chengchi teng y tym u i, “Kaichi ly nangchi hawi ka-dyh ka-dawi leu sumneang asa ai nai, kamlo dengdairei kang jeu u nai ne,” napi.

⁷Huna nai khala Israela chengchi my, “Nangchi ly kaichi sahawi y awm u nai ne lym ai. Huna nai ne baly nangchi hawi ati mana nai ka-dyh ka-dawi sumneang asa lawh ai mo?” napi u.”

⁸Nichi my Josua teng y, Kaichi ly nang teng y miseaung achei ai,” napi u. Josua my nichi teng, “Nangchi ly amichi mo? Mani dengdairei jeu u nai mo? nanai deng.

⁹Huna khala nichi my, “Kaichi ly nang i ARENG Tameuh i nang parai nai satang thai nai deaungkho y, khri pa-rei palo parai nai pri dengdairei kang jeu u nai ne. Aikupta pri y sa nai ngiereichi py,

¹⁰Jordan tavo nisi mang y peang nai samrang leaung nyhrei, Hesabon samrang Sihon hawi Asataroth mary y awm nai Bashan samrang Oka ai mana tiu mo, nanai py, kaichi thai u nai ne.

¹¹Hunai deaungkho y kaichi i miteaungkehchi hawi, cheng bawibawichi my khuleaung i vui cha nei vawn syn iy, nang hawi avum ai nai kaichi ai pato nai ne. Nang teng y tamawi aseih iy, adyh adawi ai nai molam kaichi teng y ang taviu nai ne.

¹²Kaichi i yhm dengdairei, nang teng y khuleaung amsa nai neng khala, cha nei vawnchi ly bi-um rai. Vai ly hini cha nei vawnchi khen cham; jeikha iy angtapo thau na bo.

¹³Kreip hang tleng nai thym khala ly mawipeih adymchi py kangthachi ne. Vai ly khencham! adymchi aseih piu veng bo. Khuleaung kamlo dengdairei jeu nai deaungkho y, kaichi i ateaungchi hawi phainaichi py tangym na bo,” nanai Josua teng y amti u bo.

¹⁴Israela chengchi ly ARENG teng deng y naimy, huni khumi teng i cha nei vawnchi talam u nai ne.

¹⁵Josua ly huni khumichi hawi, ka-dyh ka-dawi leu sumneang akhai iy, nichi ai lawi naira pei pi bo. Israela cheng miteaungkehchi my py, ka-dyh ka-dawi leu sumneang khaw hai ai nai adeu u bo.

¹⁶Israela chengchi ly ka-dyh ka-dawi leu sumneang akhai chum baly kani thomrei nai khala, huni khumichi ly mychi ahawi y awm nai khumichi ne, nanai pany u bo.

¹⁷Hunai deaungkho y Israela chengchi ly huni meingtym i nai theu u nai pa-thom kani y, huni khumichi i awm nai marychi, Kibeon mary, Kephirah mary, Beroth marychira y tym u.

¹⁸Na i py Israela cheng miteaungkehchi ly ARENG Tameuh i amyn y vaineng abeu u nai deaungkho y, nichi ai padei u thai y bo. Hunai deaungkho y Israela chengchi ly miteaungkehchi i tlang tleaung y josei u nai ne.

¹⁹Huna nai khala nichi my, “Achi ly Israela chengchi i ARENG Tameuh i amyn y vaineng abeu chum nai deaungkho y, nichi ai kiu pajeung kadeaungchy hawi malawn py teaung pajau y leang bo.

²⁰Achi i asa yb nai vaineng molam y, nichi ai tlamsa naira pei ai nai tla. Achi my adeu nai leu patawm y baly, Tameuh my achi ai ang pajeng ai.

²¹Nichi ai law tleaung naira pei u sina. Na i py nichi ai achi i vui tui deu, theng ei kalopchi sa hai ai nai tla,” nanai tau pei nai kamta, Israela chengchi ngai u nai ne.

²²Josua ly Kibeon mary i khumichi ai palau iy, “Nangchi ly kaichi sahawi y awm u ryp teu naimy, kamlo paraira i dengdairei jeu u nai ne, nanai ati mana nai kaichi ai li-tapawp u lawh mo?

²³Huni katamang molam y, Tameuh ly nangchi ai kamngo vang pajeng bo. Hunai deaungkho y kai i Tameuh yhm i vui nangchi ly tui deu, theng ei kalopchi sa iy, miseaung y awm u jojo ai nai tla,” napi.

²⁴Huna nai khala nichi my, “Nang i ARENG Tameuh ly hini pri verei, nangchi teng y pei ai nanai py, mipui bawibawichi ai padei pawn ai nanai py, mymy i miseaung Mosi teng y leu pei nai kaichi thai i, dei ai nai jei nai deaungkho y, huna nai kamta kasa u nai ne.

²⁵Vai, kaichi ly nang i naira theung y awm nai ne i, nangmy sa ai nai avo nai kamta so ba,” napi u.

²⁶Naibaly Josua ly Israela chengchi i kiu y, dei ai naira i nai nichi ai lawi hai bo.

²⁷Tlenrei khyhmy nichi ai miseaung palawn i, Israela chengchi hawi ARENG i vui tui deu, theng ei nai kalop sa hai bo. Vaini khrairei nichi ly ARENG my vawi patyp nai, chiu sa nai meingtymra y tui deu, theng ei kalop sa ai nai tla u jojo nai ne.