Read Khumi Chin I TIMOTHEI 1 Bible Online

I TIMOTHEI 1 - Khumi Chin bible

I TIMOTHEI 1

¹Achi ai paheng nai keung Tameuh hawi, achi i athang khai naira Krista Isu i leu pei nai kamta Krista Isu i amtaw thau nai Pawla my ly,

²ym naira y kai i chapo kypkyp Timothei teng y ly: Ampo Tameuh hawi Krista Isu achi i Areng teng i dengdairei tamen naira hawi, pahen naira hawi, awmnem naira py awm sy.

³Amichi ai mo ly patiu naira takhra ly den py patiu y ai nai hawi, leuchih rumrang hawi deung kamtawm satang temma pany y nai dawn y ai nai py (huni amjychi ly ym naira y awm nai Tameuh i patiu naira palo y naimy aei naira sa lawh veng),

⁴nang ly nichi ai parip thai ai nai, kai ly Makedonia pri y chei nai khala y ly nang ai Ephesi avang y awm jo ai nai kang takeng nai kamta, vai py kang takeng jojo rai.

⁵Na i py huni parip lawh naira ly paleung kachai hawi, hawi nai hawi y nai pany naira kahawi hawi, ym naira tatang i dengdairei theu nai tamen naira py nga hai u thai ai nai parip nai ne:

⁶phyrei khumichi ly hunichi ai amphri vui iy leu rumrang thui naira mang y tako u vui bo;

⁷nichi ly mymychi i leu thui nai hawi, mymychi i leu ho parai nai awm nai sai apany thai y i py, Reita patiu nai keung lawn ai nai ngai u lawh reng.

⁸Ami py Reita hawihai palai teaung baly Reita ly hawi, nanai achi pany;

⁹Reita ly khumi kahawi i vui y sa nai ny y leang, Reita taphra naichi hawi leu tangai y naichi i vui py, Tameuh ai dawn y naichi hawi khumi kamngochi i vui py, chai y nai khumichi hawi Tameuh ai tahm khai y naichi i vui py, amhm ampochi ai pakhau naichi i vui py, khumi ai tleh naichi i vui py,

¹⁰angai naichi i vui py, neampachochi tengtawi paleaung naichi i vui py, miseaung y hawi ai nai khumichi ai patiu naichi i vui py, ka-chawi thui naichi i vui py, vainemg abeu atyhtyh naichi i vui py,

¹¹naibaly palo ai ataing nai Tameuh i nang parai nai sai pany hai nai kai teng y kry hai nai Satang Kahawi i patiu nai kamta ny y nai atiti takhrachi i vui py sa nai ne, nanai pany thai pajau.

¹²Kai ai ham hai nai keung Krista Isu, achi i Areng teng y ly kawn nai leu kathui pi;

¹³ati mana nai mo nabaly kai ly jangni y Tameuh ai thui tamawn nai keung hawi ana hai nai keung hawi, khumi kamlai ne teu i py kai ai ka-ym awm nai khumi ang palawn iy, mymy i kalop sa ai nai keung y ang khai rym:ne mang ly kai ly ym naira by y naimy pany y nai khala y kasa nai deaungkho y pahen naira kanga;

¹⁴naibaly achi Areng i pahenra hawi, Krista Isu y ym naira hawi tamen naira py khri pa-rei lem na bo.

¹⁵Krista Isu ly khumi kamngochi ai paheng ai nai khaileaung pri y ang jeu, nanai ly ka-ym awm i, khrikhri pa-rei ym ai nai hawi; kai ly nichi theung y kamngo keh nai ne he:

¹⁶naibaly vai i dengdairei deungtasarei hengra nga ai nai mymy ai ym naichi ai khen pata naira lawn ai nai, Isu Krista ly kai kamngo keh ai ang kham pi pajau nai sai kangym amteng hai thai ai nai pahen naira kanga bo.

¹⁷Deungtasarei awm jo nai Samrang, phra pajau y nai hawi, niu pajau y nai hawi, Tameuh harei awm khyh nai teng y ly tahm pasang naira hawi, palo naira py deungrasarei awm jojo sy. Amen

¹⁸Kai i chapo Timothei awi, jangni y nang i satang thui u yb nai kamta nang ly huni deaungkho y atiu naira kahawi y ly atiu pajau ai nai, huni parip nai leu kang kry hai:nang ly ym naira hawi, hawi nai hawi y nai pany naira kahawi py patawn cheng:

¹⁹phyreichi ly huni ai aphi i paleung kawi nai kamta ly ym naira lam y ly phra bo:

²⁰hunichi theung y Humenai nini Aleksandra ne; nini ly Tameuh ai thui tamawn y ai nai amtiu hawi thai ai nai, nini ai ly Setan teng y kaau bo.