Read Khumi Chin I TIMOTHEI 2 Bible Online

I TIMOTHEI 2 - Khumi Chin bible

I TIMOTHEI 2

¹Hunaibaly achi ly Tameuh ai dawn ryhryh nai hawi ka-ym awm parai naimy aly iy, awmnem naimy awm thai ai nai,

²atiti hnei nai chiu sa nai hawi, chiu sa lyhlyh nai hawi, chiu sa pi nai hawi, kawn nai leu thui nai py khumi bawibawichi i vui hawi, samrangchi hawi peang nai keungchi i vui py sa pi ai nai kang pachei.

³Huni ly achi ai Paheng nai Keung Tameuh i mei ka-niu y hawi py hawi, kawn py kawn ai ataing nai ne;

⁴khumi bawibawichi ly paheng naira nga ai nai hawi, leu meitang angym pa-rei pany ai nai py ang ngai.

⁵Tameuh ly harei khyh, Tameuh hawi khumichi hawi sala y savai leaungrei awm khyh teang,

⁶mymy py khumi, Isu Krista ne, ni ly khumi bawibawichi i atleu naira lawn ai nai apei bo; huni ly neng khyp nai khala y pany hai nai awm bo;

⁷huni molam y ly kai ai aeu hai nai keung hawi amtaw thau nai keung, ym naira y hawi leu meitang naira y Cheng Takhrachi ai patiu nai keung y ang khai rym nai ne (kai ly leu meitang thui nai ne, ka-chawi ny y leang).

⁸Hunaibaly neampachochi ly meingtym tleirei y kado theu y nai hawi aei y naimy kiu kachai pheu iy chiu so khyly kangai.

⁹Hunai kamta teang neampachychi ly sam khui nai mo, muku mo, khawisalen lengseaung mo, vang ka-teng ny y nai ateaung mo amthyp y naimy, jei kaji nai hawi amkym nai tarawi y avo nai ateaung amthyp i khyly kangai:

¹⁰Tameuh ai kadawn ryhryh, napi nai neampachy ly hawi khyp nai ryrei ly atiti kahawi sa naira amthyp i khyly kangai

¹¹Neampachy ly leu hawihai palai patawm iy tangai amcheng naimy amtiu sy.

¹²Na i py neamopachy my patiu ai nai hawi, neampacho i tlang tleaung y aly peang ai nai py kapei y leang: ni ly katheu y naimy awm sy.

¹³Ati mana nai mo nabaly Adam ai ly sa man iy, huni bo y ly Evi ai sa nai ne;

¹⁴naibaly Adam ly tapawp naira y awm nai ny y, neampachy naini tapawp naira y awm i, taphra naira atlym bo;

¹⁵na i py nichi ly amkym nai tarawi y ym naira y hawi, tamen naira y hawi, chai naira y py awm jojo baly, chanau tapen nai deaungkho y paheng naira nga ai.