Read Khumi Chin I TIMOTHEI 5 Bible Online

I TIMOTHEI 5 - Khumi Chin bible

I TIMOTHEI 5

¹Miteaung keh nai ai ly preng moh ly, ampo kamta parawi;

²thawndeangchi ai ly amjo kamta, neampachy miteaung kyh naichi ai ly amhm kamta, anglochi ai ly chai parai pa-rei my tuicho kamta pachei.

³Neampachy lumai cheaungtichi ai palo.

⁴Na i py neampachy lumai ami py katu chanauchi awm i khyly, nichi i dengtheung y Tameuh ai dawn ryhryh naira y awm nai hawi, mymychi ai tapen nai keungchi i tlang tleaung y kahawi sa ta-vawi ai naira amtiu u sy; huni ly Tameuh i mei ka-niu y kawn ai ataing nai ne.

⁵Naibaly neampachy lumai cheaungti mymy tlairei chy awm khyh nai ly Tameuh ai khri pa-rei athang khai i, vum kanithun hnei iy, chiu py sa jojo ;

⁶na i py amo theu naira y apei nai neampachy lumai my ly heng nai thym khala y py dei nai ne.

⁷nichi ly cheh naira by y pa-rei awm thai ai nai huni leu py pei.

⁸Na i py ami py khumichi i vui dawn rym y nai, amy i yhm angtheung i khumichi i vui malawn py dawn rym y baly, mymy ly ym naira ai ly apha vui i, ym y nai khumi tleaung y kamngo keh nai ne.

⁹Neampachy lumai na naichi theung y amyn tabawi ai nai, saneng vui tariurei nai akui i khumi awm moh sy; mymy ly neampacho leaungrei i aju lawn chum nai,

¹⁰atiti kahawi sa naira y khumichi my palo nai, chanauchi ai py pacho chum nai, angvyn angvo hawi hai chum nai, khumi kachaichi i kheu py paju chum nai, patang naichi ai sabawm iy atiti kahawi cheaungkhang sa chum nai awm baly amyn tabawi.

¹¹Na i py lumai anglo kyh naichi i amyn ly tabawi moh; nichi ly Krista ai ym nai khaw y iy juvo nang ai nai ngai lawh reng;

¹²hunaibaly mymychi i ym angchei nai sai ai ly patlaw u veng nai deaungkho y sum naira nga u lawh reng nai ne.

¹³Naibaly huni ny y nai py nichi ly yhm tleirei pavai iy, atho si naira theu lawh; atho si nai khyh ny y naimy thui avo y nai leu thui lawh iy, arum rumrang nai hawi ahi ryry atyhtyh nai keung y amlawn u lawh reng.

¹⁴Hunaibaly lumai anglo kyh rai naichi ly juvo nang iy chanau sa ai nai hawi, yhm angtheung y kry iy paleung ka-e ai cheh ai naira ngo hai y ai nai py kangai;

¹⁵ati mana nai mo nabaly phyreichi ly Setan mang y tapai nai amphri vui veng bo.

¹⁶Ym nai neampachy ly neampachy lumaichi awm baly mymy ly nichi ai sabawm sy, palau takhra kamkawmchi i tlang tleaung y tlo moh sy; hunaibaly nichi ly lumai cheaungtichi ai sabawm thai.

¹⁷Kry nai sai hawi nai miteaungkehchi ly palo naira phy nyhrei nga ai ataing nai ne sy: leu thui naira y hawi patiu naira y akawm naichi ai ly palo kehkeh.

¹⁸Tameuh i cha-iu y ly, “Si katai ai cho ati hai nai thym khala y ly huni labeaung y kawm moh sy,” napi iy, “Kalop sa nai keung ly vang nga ai nai ataing,” napi bi.

¹⁹Pany nai keung leaung nyhrei mo leaung thomrei mo labeaung i nai ny y baly miteaung keh ai seu nai ly tangai moh.

²⁰kalangchi ly jei teang thai ai nai kamngo sa nai keungchi ai ly khumi bawibawichi i mo y parip.

²¹Nang ly hawihai deng y naimy cheh iy patle takhra nai tarawi y ati sai py so y naimy, Tameuh hawi Krista hawi vawi takhra nai kani pri i amtaw thau naichi i mei ka-niu y py huni leu patawm ai nai leu kang pei.

²²Ami i tlang tleaung y kiu tamam praw moh ly, khumi takhrachi i kamngo naira y py abawi moh; chai parai naimy awm thai ai nai hawihai palai atyp ly.

²³Nang ly tui harei nei khyh moh ly, nang i kajeu deaungkho y hawi, nang i no reng nai sai deaungkho y py kreip athai hang maidenrei teaung.

²⁴Khumi phyreichi i kamngochi ly amteng jojo i, tara chih naira y tym man lawh; khumi phyreichi i kamngochi ly nichi ai hui u lawh.

²⁵Hunai kamta teang, atiti kahawi sa nai ly amteng ryp nai ne, naibaly hunai kamta ny y nai py heu pajau ai ny y.