Read Khumi Chin II TIMOTHEI 1 Bible Online

II TIMOTHEI 1 - Khumi Chin bible

II TIMOTHEI 1

¹Pawla, Krista Isu y hengra awm nai adeu nai leu kamta Tameuh i kangai y Krista Isu i amtaw thau nai my ly kai i chanau ngai parai nai Timothei teng y ly:

²Tameuh achi i Ampo hawi, Krista Isu achi i Areng teng i dengdairei py tamen naira hawi, pahen naira hawi, awmnem naira py awm sy.

³Kai ly anawn y naimy kai i chiu sa naira y ly ka-dawn hai vau reng nai kha y ly Tameuh teng y kawn nai leu kathui; kai ly amsi sangumchi i sa nai kamta, hawi nai hawi y nai pany naira chai pyn nai awm iy mymy i kalop kasa reng nai ne.

⁴Kai ly nang i mei katui kang pany pi jojo nai tarawi y, kawn naimy kakawi thai ai nai nang ai kang niu ai nai vum kanithun khri pa-rei kangai;

⁵nangmy i paleung theung y awm nai ym naira tatang kapany jo: huni ly ngamsi Losi paleung theung y hawi, ngamhm Euniki i paleung theung y py awm man nai ne; naibaly vai py nang teng y awm teang, nanai kai pany khyp bo.

⁶Hunaibaly kai ly kiu tamam nai deaungkho y Tameuh teng i phailo mang i sa thai naira nang nga chum nai ai ly hm iy angveaung hai ai nai kang pany hai nai ne.

⁷ati mana nai mo nabaly Tameuh my achi jei ai nai phailo ang pei nai ny y leang, sa thai naira hawi tamen naira hawi parip naira phailo ang pei na teu.

⁸Hunaibaly achi i Areng i leu ang pany hai nai hawi, kai mymy i theaung y tla nai khumi ai py kaji hai moh; na i py Tameuh i atiti sa thai naira i saho y Satang Kahawi deaungkho y patang naira y kai kamta kham kyh ba;

⁹mymy ly achi i atiti sa nai deaungkho y ny y naimy, mymy i khai rym nai hawi pahen nai kamta achi ai ang paheng iy, palau nai sai chai parai nai mang y ang palau; huni pahenra ly kani khaileaung palum y rai khala y my Krista Isu y ang pei nai bo:

¹⁰na i py vai ly achi ai Paheng Keung Krista Isu i amteng nai deaungkho y amteng hai bo: ni ly deira ai tama hai iy Satang Kahawi y hengra hawi veaung thai y naira ly amteng hai bo;

¹¹huni Satang Kahawi leu pany hai ai nai ly kai ai aeu hai nai keung hawi, amtaw thau nai hawi, patiu nai keung y ang khai rym.

¹²Hunai deaungkho y kai ly hini atitichi kapatang : na i py kai ly kaji y leang; kai i ym nai keung ai ly kapany i, ni teng y kaau nai ly huni kani i vui y mymy ly hawihai kry thai, nanai kapany khyp bo.

¹³Krista Isu y awm nai ym naira y hawi, tamen naira y ly, kai i labeaung i nai leu kateng nang thai nai kamta ly hawihai patawm.

¹⁴Nang teng y atiti kahawi ang kry hai nai ly achi i paleung theung y awm nai Phailo kachai i saho y hawihai kry ba.

¹⁵Asia pri i awm nai bawibawichi ly kai ai hi vui veng bo, nanai nang ly pany: nichi theung y ly Phukela hawi Hermokena py abawi nai ne.

¹⁶Areng my ly Onesiphora i dengtheungchi teng y pahen naira tym hai sy; ni my ly kai ai amcheng hai reng i, kai i sengkry amchu nai py kaji hai y leang;

¹⁷huni ny y naimy ni ly Rom avang y awm nai thym khala y kai ai hawihai palai ang hau i niu lawh;

¹⁸(huni kani y ly Areng teng y pahen naira nga ai nai Areng ly ni ai khai rym sy;) naibaly mymy ly Ephesi avang y khri pa-rei sabawm, nanai ly nang ly hawihai palai pany.