Read Khumi Chin II TIMOTHEI 3 Bible Online

II TIMOTHEI 3 - Khumi Chin bible

II TIMOTHEI 3

¹Hini ly dawn ba. Kani kangkhym khala y ly neng rai parai nai tym takengkei ai.

²Khumichi my amymy ai atamen naichi, tangka khri pa-rei ngai naichi, am-e naichi, amlyh naichi, thui preaung naichi, amhm ampo i leu tangai y naichi, kawn ai nai pany y naichi,

³chai y naichi, tapen ahawi nai tamen naira by y naichi, pahen nai paleung by y naichi, seu rumrang naichi, amkym pajau y naichi, khri pa-rei kado theu naichi, hawi naira pipi ngai y naichi, vaineng takan naichi, sa ngangau naichi, tahm apasang naichi,

⁴Tameuh ai tamen nai tleaung y ly amymy i amo theu naira ai tamen lawh naichi ne lawh;

⁵nichi ly Tameuh ai dawn ryhryh naira awm nai kamta ne teu i py, huni i sa thai naira ai ly apha u vui bo; hunai kamtachi ai ly hi vui.

⁶Nichi theung i nai phyreichi ly yhm takhra takhra y kun iy, kamngo kaji pho nai neampachy pathu awp naichi ai patiu u reng;

⁷huni neampachychi amymychi i ngai naira my pahawi i, amtiu jojo nai ne i py, tlen py leu meitang pany ai nai pa-rei amtiu pajau y leang.

⁸Naibaly Janni nini Jambri my Mosi ai paka nai kamta ly, huni khumichi py leu meitang ai paka; nichi i paleung phra i, ym naira mang y ati sai py chawn y leang;

⁹na i py nichi ly huni tleaung y katlen y ai, ati mana nai mo nabaly nini i pathu nai sai amteng nai kamta, nichi i pathu nai sai ly khumi bawibawichi teng y amteng lawh makho ai.

¹⁰Na i py nang ly kai i patiu nai, amhi amtlau nai sai, sa tau nai sai, ym nai sai, amnym nai sai, tamen nai sai, kham pajau nai sai, kai ai ana nai sai, patang nai sai,

¹¹Antiokei avang y hawi Ikonion avang y hawi Lustra avang y py kai i tlang tleaung y atiti tym nai sai hawi, ana nai kai i patang naichi py nang ly hawihai palai pany; huni bawibawi y ly Areng my kai ai ang palawi nai bo.

¹²Ne, ami py Krista Isu y Tameuh ai dawn ryhryh ai tau nai ngiereichi ly ana naira patang teang ai.

¹³Na i py khumi kamngo hawi tapawp nai keungchi ly tapawp nai hawi tapawp naira y awm nai ly kamngo naira y ty ra ty ra ai.

¹⁴Na i py nang ly ami teng y amtiu, nanai apany iy, nang i atiti amtiu nai hawi pany khyp nai ryrei y awm jojo:

¹⁵Krista Isu y ym naira awm nai deaungkho y, heng naira nga ai nai ka-lawh pa-rei ang cheng hai thai nai cha-iu kachaichi ly nang deaungdichy khala i dengdairei pany nai bo.

¹⁶Tameuh i cha-iu leu bawibawi ly Tameuh i taho hai nai kamhui ne, naibaly Tameuh ai dawn nai khumi ly atiti kahawi cheaungkhang sa ai nai angym pa-rei my amthyp angym thai ai nai,

¹⁷patiu naira y hawi sum hai naira y hawi, parip naira y hawi, atiti kahawi patiu naira y ly chawn nai ne.