Read Khumi Chin TITA 2 Bible Online

TITA 2 - Khumi Chin bible

TITA 2

¹Nangmy ly patiu nai kateng mang y atlyh nai leu thui ba:

²neampacho miteaungchi ly amkym ai nai hawi, tahm awm ai nai hawi, paleung kateng awm ai nai hawi, ym naira y hawi, tamen naira y hawi, kham pajau naira y hawi kateng awm ai nai py pachei:

³neampachy miteaungchi my py mymychi i amhi amtlau nai sai y Tameuh ai tahm khai ai nai hawi, seu rumrang iy kreip athai hang ha nai miseaung lawn y naimy, atiti kahawi patiu nai keungchi lawn ai nai pachei teang;

⁴hunaibaly Tameuh i leu ai ly thui tamawn naira by y ai nai, anglochi ai ly mymychi i juvochi ai tamen ai nai hawi, mymychi i chanauchi ai tamen ai nai hawi, paleung hawi parai naimy awm ai nai hawi, chai parai naimy awm ai nai hawi,

⁵amy i yhm y kalop sa nai keung y awm ai nai hawi, neaung hawi parai naimy awm ai nai hawi, mymychi i juvochi i kangai awm ai nai py atiti kahawi patiu u sy.

⁶Hunai kamta khyp naimy, thawndeaungchi ai py paleung kateng awm ai nai pachei.

⁷Makeng mang asa naichi theung i ami my achi i tlang tleaung y leu hawi y nai thui ai by y nai deaungkho y kaji thai ai nai,

⁸nang ly ati cheaungkhangra y kahawi sa nai lam y khen pata naira kahawi ne, nanai amteng hai ba; nang i patiu naira y ly nang i leu meitang patiu nai sai hawi, nang i tahm awm nai sai hawi, nang i chih pajau y nai leu thui nai sai kateng py amteng hai ba.

⁹Miseaungchi ly achi ai Paheng nai Keung Tameuh i patiu nai leu ly ati cheaungkhangra y palo u thai ai nai, aei y naimy atiti lo mimeaung mimeuung y nai,

¹⁰ka-ym awm naira kahawi bawibawi amteng hai iy, mymychi i yhmkeungchi i kangai awm iy ati cheaungkhangra y nichi ai kawn hai ai nai pachei.

¹¹Ati mana nai mo nabaly khumi bawibawichi teng y paheng naira tym hai ai nai, Tameuh i pahenra ly amteng bo.

¹²Hunaibaly achi ly achi i athang khai naira kawn awm parai nai ajeng naimy (huni ly achi i Tameuh tahm asang keh nai hawi achi ai Paheng keung Isu Krista i nang parai naira amteng nai ly), Tameuh ai dawndan y nai sai hawi, khaileaung pri i ngai phi teng y naira py anawn vui iy,

¹³vai heng nai sala ryrei ly amkym naira y py, hawi naira y py, Tameuh ai dawn ryhryh naira y py awm ai nai tla, nanai ang patiu bo;

¹⁴mymy ly achi i taphra naira bawibawi i dengdairei achi ai atleu thai ai nai hawi, mymy i vui y atiti kahawi sa ai nai dawn kheng naichi, mymy i khumi kypkyp lawn iy amy i kavui y pachai thai ai nai py achi i vui y apei bo.

¹⁵Phom awm parai naimy huni leu ly thui py thui, pachei py pachei, parip py parip. Nang ai ami my tahm khai y ai nai so moh.