Read Khumi Chin TITA 3 Bible Online

TITA 3 - Khumi Chin bible

TITA 3

¹Pri peang naichi hawi, aly peang nai keungchi i kangai awm ai nai hawi, leu tangai ai nai hawi, atiti kahawi sa ai nai ngai nai paleung awm ai nai hawi,

²ami ai thui tamawn y ai nai hawi jo sei y ai nai hawi, neaung kahawi awm ai nai hawi, khumi bawibawichi teng y leu anui naira kangym amteng hai ai nai py nichi ai dawn hai.

³Ati mana nai mo nabaly achi py jangni y ly cheng y nai hawi, leu tangai y nai hawi, tapawp naira y awm nai hawi, tlang i ngai phi teng y naira hawi amo theu naira takhra takhra i miseaung y lawn nai hawi, thui tamawn nai hawi, paleung no naira y awm iy, amso awm nai hawi amychi tengtawi aniu ngai y naichi py ne teang.

⁴Na i py achi ai paheng nai Keung Tameuh i neaung hawi nai sai hawi, khumichi i tlang tleaung y my i tamen nai sai py amteng nai khala y ly,

⁵achi i atiti kahawi sa nai deaungkho y ny y naimy, kangtha sa palai bi naira paju nai hawi, Phailo Kachai i kangtha sa palai bi veangveang nai deaungkho y mymy i pahen nai kamta khyp naimy ang paheng nai bo.

⁶Mymy ly achi ai Paheng Keung Isu Krista i saho y huni Phailo Kachai ai ly achi i tlang tleaung y khri pa-rei ang lei nai bo;

⁷hunaibaly achi ly mymy i pahenra deaungkho y eaung naira nga iy, deungtasarei hengra nga ai nai athang khai nai kamta ly yhmtheaung amtym nai keung y lawn thai ai.

⁸Huni leu ka-ym awm nai ne. Naibaly Tameuh ai ym chum naichi ly atiti kahawi sa ai nai dawn u jojo thai ai nai, nang ly huni satang vam parai naimy thui pi ai nai kangai. Huni atitichi ly khumichi i vui y hawi py hawi, chawn py chawn:

⁹na i py deng patum pati atyhtyh nai hawi, deung kamtawm satangchi hawi, aei nai hawi, Reita leu y ajo nai py angpreng veng; hunichi ly chawn naira by y i ati sai py ny y nai ne.

¹⁰Mymy ai tlenrei tlen nyhrei parip nai bo y ly ym takhra ai ngai nai khumi hawi amkawm moh:

¹¹huna nai khumi ly tako takhra nai bo, kamngo py tla, nanai pany bei: mymy naimy apasum nai bo.

¹²Kai ly Artema ai mo, Tukika ai mo nang teng y kang pato nai khala y ly Nikopoli avang y kai teng y jeu tanga ba: kai ly kaseih khala y hu y awm ai nai tau bo.

¹³Reita pany nai keung Zina nini Apolo ly ati sai py avaw y ai nai, khuleaung chei ai naira y ly hawihai palai sabawm ba.

¹⁴Naibaly achi i khumichi ly athai y naimy awm y ai nai, avaw iy aeang nai ka-vo takhra takhra i vui y atiti kahawi sa jojo ai nai amtiu u sy.

¹⁵Kai teng y awm nai ngiereichi ly nang teng y kawn nai leu ang thui pi. Ym naira y kaichi ai tamen nai ngiereichi teng y kawn nai leu thui pi kyh. Nangchi bawibawi teng y pahenra awm sy.