Read Khumi Chin HEBRAI 11 Bible Online

HEBRAI 11 - Khumi Chin bible

HEBRAI 11

¹Naibaly ym naira ly atiti athang khai naira awm khypkhyp, nanai pany khyp naira ne i, atiti niu thai y naichi i pany hai naira ne.

²Hunira y ly miteaung kehchi my ly palo naira nga lawh veng.

³Tameuh my leu pei nai deaungkho y kani khaileaung sa pyn nai bo, nanai achi ly ym naira deaungkho y pany: hunaibaly atiti niu naichi ai ly atiti awm naichi ai teaung nai deaungkho y sa nai ny y.

⁴Ym naira deaungkho y Abela ly Kaina tleaung y apathyp naira hawi keh nai Tameuh teng y talam bo, huni deaungkho y mymy ly khumi kahawi ne, nanai pany hai naira nga bo; ati mana nia mo nabaly Tameuh my ni i atiti talam nai pany pi bo; naibaly huni deaungkho y mymy ly dei nai bo y py leu thui asai rai nai ne.

⁵Ym naira deaungkho y Enoka ai ly dei naira pany y ai nai la vui bo; naibaly ni ai ly Tameuh my la vui nai deaungkho y mymy ai niu pajau y bo; naibaly lo vui y rai khala y my ni ly Tameuh i mei kangai awm nai khumi ne, nanai pany hai angchi yb nai bo.

⁶Na i py ym naira ny y baly mymy ai kawn pajau ai nai ly aveng. Ati mana nai mo nabaly Tameuh teng y ahihawi nai khumi ly Tameuh ly awm, nanai hawi, mymy ai hau nai keungchi teng y kawn nai vang pei nai keung ne, nanai py ym ai nai tla.

⁷Ym naira deaungkho y Nova ly atiti amteng y rai naira y Tameuh my tau pei i, Tameuh ai tahm khai iy dengtheungchi ai paheng ai nai paleaung sa bo; huni deaungkho y mymy ly khaileaung pri ai pasum iy, ym naira i saho y nga nai hawi naira ai amtym nai keung lawn bo.

⁸Ym naira deaungkho y Abraham ly, ni ai palau nai khala y ly amtym ai nai meingtym y chei ai nai leu tangai bo; naibaly mymy i chei ai naira pany y naimy theu bo.

⁹Ym naira deaungkho y mymy ly adeu nai pri y awm veangveang, pri takhra y awm nai kamta teu iy py. Mymy py, leu adeu naira vanrei khypkhyp amtym nai keung Isaka nini Jakob py kanih yhm y awm bo;

¹⁰mymy ly lengseaung leng chum nai avang ajeng dudu nai ne; huni sa nai sai dawn yb nai hawi sa nai keung ly Tameuh ne.

¹¹Ym naira deaungkho y Sarai kypkyp py adeu nai keung ai ly ka-ym awm nai palawn nai deaungkho y miteaung nai bo y ti ampreng thai ai nai nga bo.

¹²Hunaibaly khumi kadei kamta awm nai neampacho leaungrei teng i nai kani mang i ka-sichi nawi nai sai kamta hawi, pangli peang i spryh kamta kati pajau y nai pa-rei py peung u bo.

¹³Hunichi bawibawi ly ym nai tarawi y dei u bo:nichi ly adeu nairachi ngo y naimy palo parai naira i dengdairei niu py niu, kawn py kawn, naibaly nichi ly hini khaileaung pri y angvyn hawi pri takhra khumi ne, nanai apany hai bo.

¹⁴Ati mana nai mo nabaly hunai kamta leu thui naichi ly mymychi i pri hau u nai ne, nanai amteng hai veng.

¹⁵Naibaly nichi i theu nai pri ai ly dawn jojo nai ne iy khyly nichi ly vawi ai nai ka-vo nga u takengkei ai bo.

¹⁶Na i py vai ly nichi ly kani pri mang y awm nai, hawi tleaung hawi ra nai pri dawn nai ne; hunaibaly Tameuh my nichi i Tameuh angam ai nai kaji y leang; mymy ly nichi i vui avang khai pi rym veng bo.

¹⁷Ym naira deaungkho y Abraham ly cham naira avum khala y Isaka ai talam bo.

¹⁸Ne, leu adeu nairachi kawn parai naimy nga nai keung kypkyp teng y, “Isaka y ly nang i kangpreangchi ai amyn pathi ai,” napi nai, huni khumi ly mymy i chapo harei kalei khyh nai ai talam bo;

¹⁹Tameuh my ni ai ly kadeichi theung i dengdairei py pathau teang pajau, nanai adawn cheng bo; naibaly pata nai leu thui baly, mymy ly ni ai hu i nai nga ali teang bo.

²⁰Ym naira deaungkho y Isaka ly atiti tym ai naichi molam y py Jakob nini Esawi ai amtheaung hai mei bo.

²¹Ym naira deaungkho y Jakob ly dei ai nai thym khala y ly Josepha i chapo nini ai amtheaung hai mei i, ni i cheaungvawi meaung y nip nai tarawi y Tameuh ai chiu bo.

²²Ym naira deaungkho y Josepha ly dei ai nai kasa nai thym khala y ly Israela kangpreangchi theu ai nai leu thui iy, mymy i hiu molam y leu pei bo.

²³Mosi ai ly tapen nai thym khala y ly deaungdi chymplei nai, mo hawi parai nai ne, nanai niu nai y, ym naira deaungkho y amhm ampo ly lo thomrei sala y ni ai heu vui bo: nini ly samrang i leu pei nai py jei hawi y leang.

²⁴Ym naira deaungkho y Mosi ly cheang nai bo y Pharao chaniu i chapo, nanai amyn palau nai ly pipi ngai y leang bo;

²⁵mymy ly kamngo i kra y nai sala chy i vui awm nai amo theu naira ai kawn nai tleaung y ly Tameuh i khumichi hawi ana hai nai patang naira y kham tanga ai nai vawi lawh veng;

²⁶naibaly ni ly kawn nai vang nga ai nai angdeang lawh veng nai deaungkho y Krista ai tahm khai y naira ai ly Aikupta pri i yhmtheaung tleaung y ly yhmtheaung nang keh nai palawn lawh.

²⁷Ym naira deaungkho y mymy ly samrang i kado theu nai ly jei y naimy Aikupta pri khai su i, niu thai y nai ai ly niu thai nai kamta kham tanga bo.

²⁸Chanau chalu tama hai nai keung my ly nichi ai nam y ai nai, ym naira deaungkho y mymy ly katlen vui nai pawi hawi thi hei nai ly pateaung angchei bo.

²⁹Ym naira deaungkho y nichi ly mawi tleaung y tako nai kamta Pangli Kamsen y tako prei: Aikuptachi ly huna nai kamta sa teang ai nai tau u i, anum u be bo.

³⁰Ym naira deaungkho y Jeriko avang i apai ly kani saryhrei taki u nai bo y ly anawi veng bo.

³¹Ym naira deaungkho y bima Rahabi ly khen paviu naichi ai hawihai palai kawn nai deaungkho y, leu tangai y naichi theung y ly tamo teang y leang bo.

³²Naibaly atiti kathui veangveang ai rai mo? Kideon hawi, Barak hawi, Samsona hawi, Jeptha hawi, Davida hawi, Samuela hawi, amochi hawi, nichi i satang thui pi ai nai katau iy py neng aleu y leang bo;

³³ym naira deaungkho y nichi ly peang naira takhra takhra ai py pajau iy nga u, atiti kahawi py sa, leu adeu nairachi py nga, khrangsi takai i labeaung py pakhym hai,

³⁴mai i sa thai naira ai py padei, haisau bo kachiu y py tleaung vui, ham y naira i dengdairei ham naira py nga, atiu naira y py sorai thau, cheng takhrachi i atiu nai kamkawmchi ai py ahei hai.

³⁵Neampachychi my nichi i kadeichi ai angthau bi naira y nga teang; khumi takhrachi my khri pa-rei ana patheng paang nai, angthau bi naira hawi tleaung hawi ra nga u thai ai nai lawi naira ly ngai y leang bo;

³⁶khumi takhrachi my py panui hai naira hawi chip naira patang:ne, huni ny y nai py kawm nai hawi theaung y paeung nai py avum u teang;

³⁷naibaly lengseaung y aphi nai py awm, raw y hihyh baw nai py awm, parawi naira py avum, haisau y ateng ka nai py awm; nichi ly beram peih hawi mi-i peih akhiu nai aleaung u ryry iy, avaw py avaw, patang py patang, ana hai nai py awm;

³⁸nichi ly daichi ka-vym y hawi, mawi y hawi, angawm y hawi, tapiu y py aleaung ryry lawh; khaileaung pri ly nichi ai ataing y leang.

³⁹Naibaly hinichi bawibawi ly ym u nai deaungkho y palo naira nga chum iy leu adeu nai ly ngo y leang;

⁴⁰ati mana nai mo nabaly achi ai tabawi y nai ly nichi ai angym hai y ai nai, Tameuh my achi i molam y atiti hawi tleaung hawi ra nai ang sa pi chum veng bo.