Read Khumi Chin HEBRAI 12 Bible Online

HEBRAI 12 - Khumi Chin bible

HEBRAI 12

¹Hunaibaly angdeang nai keungchi my huna tanrei achi ai khupanym sau ana pa-rei ang taki nai deaungkho y, achi ai ateu hai yh nai ngierei hawi, amychi y abi cheng nai kamngo ly khai u veng teang sina;

²naibaly achi i ym naira sa nai hawi angym hai nai keung Isu mang y khen iy, achi i mo y awm nai angpreng acham naira y ly kham tanga pa-rei angpreng u veangveang sina; ni ly my i mo y amo theu naira awm nai deaungkho y amthang leaung naira sai py tahm khai y naimy kraws tleaung y patang i, Tameuh i areng atehra lamtang mang y ateh bo.

³Nangchi ly phailo mang y paha u y naimy akawm y ai nai ly, mymy i tlang tleaung y khumi kamngochi i huna tanrei aei akhikan naira patang nai keung ai ly dawn u cham.

⁴Nangchi ly vai khrairei kamngo ai tiu naira y thi theu nai pa-rei ate u y rai;

⁵naibaly chapochi ai tengtum nai kamta pachei nai leu ly tami u veng bo; huni ly, “Deang awi, Areng my ang parip nai ly tahm panem moh ly, Ni my ang preng nai khala y ly tangai si moh;

⁶Areng ly mymy i tamen nai ai ly parip reng, Chanau lawn ai nai kawn nai ngierei ai ly ang chip reng chy bo,” nanai ne.

⁷Ang parip nai deauungkho y nangchi ly kham tanga ai nai tla bo; chapochi i tlang tleaung y sa nai kamta Tameuh my nangchi i tlang tleaung y ang sa nai ne he; ampo my chapo ai parip y nai ly ami awm vai mo?

⁸Na i py bawibawichi i tlang tleaung y tym nai parip naira ly nangchi i tlang tleaung y tym y baly, nangchi ly chapo tatang ny y i, pajang cho tla lawh veng.

⁹Huni harei khyh ny y i, achi ai ang parip ai nai achi i tlang mang i ampochi awm chy bo; achi ly nichi ai malawn py tahm khai y baly, heng naira nga ai nai mana tanrei phailochi i Ampo i ngai nai awm ai nai tla mo?

¹⁰Nichi ly avo, nanai dawn nai kamta kani kra y nai sala chy y achi ai ang parip mang ly ang parip; na i py achi ly mymy i chai naira phy nga thai ai nai, ni my ly achi hawi ai nai ang parip nai ne.

¹¹Parip naira ngierei ly kawn hai nai kamta ny y naimy, paleung mawn hai nai kamta ne; patang nai bo y naini huni parip naira paleung theung y tla naichi i vui ly hawi naira i awmnem naira athai ai patheu pi lawh veng.

¹²Hunai deaungkho y kiu thlawithli thlawithlai nai pataw u, kheukhu thla thla thla na ahyn nai py amtaw u vui;

¹³naibaly kheu kangbai ly awi hai du y naimy hawihai thai ai nai nangchi i kheu i vui lam ka-dyh so u.

¹⁴Khumi bawibawichi hawi aly naira ai hawi chai naira ai py hui u; huni chai naira ny y baly ami py Areng ai niu y ai;

¹⁵hawihai palai amkym u, ti y baly ami mo Tameuh i pahenra ai kai y nai awm lawh na i, kho naira tangjyn ampho iy ang khrukhra hai lawh na; hunira y ly khumi neangneangchi ai chai hai y nai awm lawh iy,

¹⁶angai nai keung mo, Esaw kamta ly Tameuh ai tahm khai y nai khumi mo awm lawh na: mymy ly tapen angchei nai i nga avo nai ai ly tlenrei cha ai naira y jo vui bo.

¹⁷Huni bo y mymy ly huni amtheaung hai naira amtym ai nai ngai iy py, mei katui tla nai tarawi y hawihai palai hau teu iy py, paleung adawn ali naira ka-vo ngo y nai deaungkho y mymy ai ly ngai y leang bo, nanai pany u bo.

¹⁸Nangchi ly nam pajau nai mawi, mai y kang thai nai, khupanym kamnumchi, kavengchi, ali khuchi,

¹⁹baw tyn naichi, leu thui nai raawi katynchi teng y tym u y leang bo; huni raawi thai nai keungchi ly nichi teng y leu takhra pipi thui y ai nai takeng u bo.

²⁰Ati mana nai mo nabaly tawnbawi khrairei py mawi y chiu kip baly, lengseaung aphi ka ai nai tla, nanai leu pei nai ly kham u pajau y lawh veng;

²¹naibaly nichi i atiti niu nai py khri pa-rei ka-jei awm na i, Mosi my ly, “Kai ly jei nai khri pa-rei kaso theu na,” nanai thui chy bo;

²²Na i py nangchi ly Zion mawi teng y hawi, Tameuuh kangheng i avang kani mang i Jerusalem teng y hawi, tep rep ma pany y nai kani pri i amtaw thau nai kamkawmchi teng y hawi,

²³chanau chalau kani mang y amyn atheung nai palau takhra kamkawm teng y hawi, khumi bawibawichi ai tara chih nai keung Tameuh teng y hawi, angym hai chum nai khumi kahawichi i phailo teng y hawi,

²⁴Isu, leu maikawm kangtha i savai teng y hawi, Abela i thi tleaung y satang hawi keh nai thui nai ahei nai thi teng y py tym u nai ne.

²⁵Nangchi ly leu thui pi nai keung ai ngai y lawh na, nanai amkym u. Khaileaung pri y mymychi ai tau pei nai keung ai ngai y naira y malawn py pajeng naira tleaung u pajau y baly, achi, kani mang i dengdairei tau ang pei nai keung ai hi vui nai khumichi ly tleaung pajau y nai tleaung y tleaung pajau y ra ai.

²⁶Huni neng khala y mymy i raawi ly khaileaung ai tahyn bo; na i py vai mymy ly, “Vai tlenrei baly khaileaung khyh ny y i, kani ai py katahyn ai,” nanai leu adeu lawh veng.

²⁷Naibaly “Vai tlenrei baly,” nanai ly atiti tahyn pajau y naichi ly awm jo thai ai nai, atiti sa nai tahyn pajau naichi ai la vui ai, nanai pany hai nai ne.

²⁸Hunaibaly achi ly tahyn pajau y nai pri nga nai deaungkho y kawn u sina; huni i saho y achi ly kaji nai hawi tahm khai nai tarawi y Tameuh i kawn nai kalop sa thai:

²⁹ati mana nai mo nabaly achi i Tameuh ly kang hai nai mai ne.