Read Khumi Chin HEBRAI 3 Bible Online

HEBRAI 3 - Khumi Chin bible

HEBRAI 3

¹Hunaibaly amjo amnau kachai, kani pri mang i palau nai phy nga naichi awi, achi i ym nai leu Amtaw Thau nai Keung hawi, Pathyp pi nai Keung kalen keh Isu ai ly dawn u.

²Tameuh i dengtheung bawibawichi theung y Mosi my ka-ym awm nai kamta ly, ni ly mymy ai sa nai keung teng y ka-ym awm nai ne.

³Naibaly dengtheung lu ai ly dengtheungchi tleaung y palo keh lawh nai kamta ly, ni ly Mosi tleaung y nang parai naira nga ra nga ra ai ataing nai khai rym nai bo.

⁴Dengtheung tleirei y amimi mo ly lu y awm bawibawi veng; cheaungkhang i lu naini Tameuh ne.

⁵Naibaly huni bo y leu thui nai pany hai ai nai ly, Mosi my ly Tameuh i dengtheung bawibawichi theung y kalop sa nai keung ka-ym awm khypkhyp nai bo;

⁶na i py Krista ly Tameuh i dengtheungchi i tlang tleaung y Chapo y ka-ym awm nai ne, naibaly achi ly tem khala y khrairei vam naira hawi athang khai naira i amlyh naira khaw parai pa-rei my patawm cheng baly, achi ly mymy i dengtheungchi ne.

⁷Hunaibaly Phailo Kachai i thui nai kamta khyp ly, “Vaini ly mymy i raawi tangai u baly,

⁸Daichi ka-ym y parawi nai kani y pangaw hai nai thym khala i kamta ly, Nangchi i paleung tang hai u moh.

⁹Hu y ly nangchi i amsi sangumchi my kai ai parawi i kai ai cham, Naibaly nichi ly saneng vui palyhrei sala y kai i atiti sa naichi niu.

¹⁰Hunaibaly kai ly huni kangpreangchi i tlang tleaung y paleung angai y, ‘Nichi i paleung y dawn nai tamang jojo, Kai i lam py pany u y,’ kanapi.

¹¹Kai i kado theu nai vaineng abeu nai kamta ly, Nichi ly kaimy i anawn naira y kun y ai,” napi.

¹²Amjo amnauchi awi, amkym u, ti y baly Tameuh kangheng ai ly hi vui ai nai nangchi theung y ami py ym y nai paleung kamngo awm lawh na:

¹³“Vaini” nanai sala y kani tleirei phai apachei u leungtang, ti y baly nangchi theung y ami py kamngo tapawp naira y paleung tang hai nai awm lawh na;

¹⁴achi my achi i ym amteaung angchei nai ly tem nai khala y khrairei khaw parai pa-rei my patawm cheng baly,

¹⁵achi ly Krista y phy nga nai keungchi ne; Naibaly hini leu ly, “vaini ly mymy i raawi thai u baly pangaw hai nai thym khala i kamta ly, nangchi i paleung tang hai u moh,” nanai thui reng nai ne.

¹⁶Naibaly thai se iy pangaw hai naichi ly amichi mo? Aikipta pri i dengdairei Mosi my hawi nai bawibawichi ny y lawh a?

¹⁷Naibaly saneng vui palyhrei sala y paleung angai y nai ly amichi i tlang tleaung y mo? Kamngo sa nai keung daichi ka-vym y dei naichi i tlang tleaung y ny y lawh a?

¹⁸Naibaly leu tangai y naichi harei ny y baly, ni i anawn naira y kun y ai nai vaineng abeu nai ly amichi teng y mo?

¹⁹Hunaibaly nichi ly ym naira by y nai deaungkho y kun thai y bo, nanai achi ly pany bo.