Read Khumi Chin JAKOB 1 Bible Online

JAKOB 1 - Khumi Chin bible

JAKOB 1

¹Jakob, Tameuh hawi Areng Isu Krista i miseaung ly, Ahei nai cheng holai nyhreichi teng y ly kang kawn ba.

²Kai i amjo amnauchi awi, nangchi i ym naira cham nai ly kham pajau naira sa, nanai pany iy

³cham naira takhra takhra avum khala y ly kawn naira sasa y palawn u.

⁴Naibaly ati sai py avaw y nai, nangchi bomrei angym thai ai nai, kham pajau naira my ly so angym sy.

⁵Na i py nangchi theung y ami py cheng naira avaw baly, khumi bawibawi teng y jo y nai hawi pasai y naimy pei reng nai keung Tameuh teng y hnei sy, naibaly ang pei takengkei ai.

⁶Na i py ym thai y nai den py by y naimy, ym naimy hnei sy: ym thai y nai keung ly pangli tui sampyh, ali my hm pacho pachaw nai kamta atawm.

⁷Huna nai khumi paleung khaw y nai hawi, atiti sa nai bawibawira y so tangeichei y nai khumi ly,

⁸Areng teng y ati sai py nga ai nai athang khai moh sy.

⁹Amjo amnau tahm anem parai nai ly tahm pasang nai deaungkho y kawn sy:

¹⁰naibaly khumi kanang ly tahm panem nai deaungkho y kawn sy, ati mana nai mo nabaly mymy ly acha pau kamta rawm iy tama ai.

¹¹Kani si iy ali bi ho nai aho i, acha ai ly jei hai; naibaly pau ly tla i, awm nai sai apu nai ly tama; hunai kamta teang, khumi kanang ly ni i tako naira y rawm ai.

¹²Cham naira kham pajau tanga nai keung ly taham hawi, cham pajau nai bo y ni ly Areng my mymy ai tamen naichi teng y adeu nai hengra lukym nga ai.

¹³Ami py parawi naira avum khala y, “Kai ai Tameuh my parawi nai,” ti moh sy: ami py Tameuh ai ly kamngora y parawi pajau y: mymy py ami ai py parawi ai nai aveng.

¹⁴Khumi leaung leaungrei amy i ngai phi teng y naira my ly ryh iy tapawp baly parawi naira avum nai bo.

¹⁵Naibaly ngai phi teng y naira ly pawm i kamngo tapen: naibaly kamngo ly cheang iy dei naira tapen bi.

¹⁶Amjo amnau ngai parai naichi awi, tamang u moh.

¹⁷Atiti pei nai kahawi hawi, atiti pei angym nai bawibawi ly salo mang i dengdairei, kangvangchi i Ampo teng i nai ang kathiu nai ne; mymy y ly takhra naira hawi ami nai pa-pui den py awm thai y.

¹⁸Achi ly mymy i atiti sa naichi theung y athai man nai kamta lawn thai ai nai, mymy i ngaingai leu meitang i saho y achi ai ang tapen.

¹⁹Amjo amnau ngai parai naichi awi, huna nai nangchi pany. Na i py khumi leaung leaungrei tangai akaneu sy, leu thui ai nai awn moh sy, kado theu ryp moh sy;

²⁰ati mana nai mo nabaly khumi i kado theu naira ly Tameuh i vui kahawi so y leang.

²¹Hunai deaungkho y chai y nai bawibawi hawi, kamngo kawi palai nai ly patlaw u veng, phailo ai paheng thai nai tiu pi nai leu ly am-e y naimy kawn u.

²²Na i py amychi ai atapawp iy leu tangai u jo khyh nai ny y i leu patawm nai keung lawn u.

²³Ami py leu tangai jo iy patawm y pui baly, dengkhang apui y amy i meimai hawihai palai akhen nai khumi kamta atawm:

²⁴mymy ly hawihai palai akhen iy leh veng baly, mymy i meimai awm nai sai vaimy tami veng ryp.

²⁵Na i py ami py angym nai reita, miseaung alaw nai reita y khen nai awm jo baly, thai nai ly tami ryp y nai, patawm iy sa jo nai keung lawn nai ly, huni khumi ai ly ni i atiti sa naira y amtheaung hai ai.

²⁶Ami py, “Kai ly Tameuh i reita patawm,” nanai adawn iy amy i palai ai hawihai atyp y pasi lawh baly, amy i paleung ai atapawp nai teu, huni khumi i reita ly ati sai py ny y leang.

²⁷Achi i Tameuh hawi Ampo i mei ka-niu y reita kachai hawi kamngo abawi y nai ly hini he: nurochi hawi neampachy lumaichi ngari patang khala y ly de ai nai hawi, khaileaung pri y kamngo akau y pa-rei akry ai nai py ne.