Read Khumi Chin JAKOB 2 Bible Online

JAKOB 2 - Khumi Chin bible

JAKOB 2

¹Amjo amnauchi awi, achi i Areng Isu Krista, nang parai nai Areng ai ym nai tarawi y khumi ai patle u takhra reng moh.

²Nangchi i achura yhm y muku kiu sabyh pachu iy, kanih hawi parai nai akhiu nai khumi kun sy: naibaly khumi kamawn, kanih mawn teichy akhiu nai py kun teang sy.

³Naibaly kanih hawi parai akhiu nai ai ly dawn hai iy ni teng y, “Nang ly hini meingtym kahawi ra y ateh ba,” napi iy, khumi kamawn teng y ly, “Nang ly hu mang angdo,” ti y baly “Kai i kheu khaira ahawi y ateh,” napi baly,

⁴nangchi i paleung y patle takhra nai hawi kamngo dawn nai cheh nai keung ne y lawh a?

⁵Amjo amnau ngai parai naichi awi, khen u cham; Tameuh my hini khaileaung pri i khumi kamawnchi ai ly ym naira y nang ai nai hawi, mymy ai tamen nai keungchi teng y pri adeu nai ly amtym ai nai py vawi nai ny y a?

⁶Na i py nangchi ly khumi kamawn ai tapheaung lawh. Khumi kanangchi ly nangchi ai ana, naibaly tara chih naira yhm y ang ryh reng nai ny y a?

⁷Nichi ly nangchi ai pathi nai amyn kahawi ai ly thui tamawn y a?

⁸Na i py Tameuh i cha-iu leu, “Nangmy ai atamen na kamta, saleaungchi ai tamen ai nai tla,” nanai len keh nai reita patawm u baly, nangchi i sa nai hawi mang:

⁹na i py khumi ai patle takhra nai awm baly nangchi kamngo sa, naibaly Reita my ly Reita taphra nai keung ai ang palawn bo.

¹⁰Ami py Reita pataw angym i py lam harei y hawi y sa lawh baly, bawibawi ai taphra nai bo.

¹¹“Pajang so moh,” napi nai keung my ly, “Khumi ai padei moh,” napi bi. Hunaibaly nang ly pajang so y i py khumi ai padei lawh baly, Reita taphra nai keung tla bo.

¹²Miseaung alaw nai reita my tara ang chih ai nai deaungkho y leu thui u ly, atiti py so u teang.

¹³Ami i tlang tleaung y pahen naira by y nai khumi ai ly, pahen naira abawi y nai tara chih pi ai:pahen naira my tara chih naira ai pajau ai.

¹⁴Amjo amnauchi awi, ami mo, “Kai ly ym naira awm,” nanai thui i py, atiti sa nai by y pui baly ati amran ai mo?

¹⁵Huni ym naira my ly mymy ai paheng thai na a? Amjo amnau neampacho mo neampachy mo tlang ka-keu awm iy kani tleirei biu avaw sy:

¹⁶naibaly nangchi theung y ami my mo nichi teng y, “Awm nem naimy tako u ly, bi um nai hawi kajeu kawi pa-rei awm u ba,” napi i py, tlang i vui atiti aly ngai nai pei y pui baly ati amran ai mo?

¹⁷Hunai kamta teang ym naira ly atiti sa nai abawi y baly, mymy tlanrei awm khyh nai ly dei nai khyh bo.

¹⁸Ne, naibaly ami my mo, “Nang ly ym naira awm, kai ly atiti sa naira awm: nang i ym naira ly atiti sa naira abawi y naimy kai ai patei ba, naibaly kai i atiti sa naira y ym naira kang patei ai,” napi ai ngaw khyh.

¹⁹Tameuh ly harei khyh, nanai nang ym; hawi mang: vawinamchi py ym i kaso theu.

²⁰Ati sai py ny y nai khumi awi, atiti sa naira abawi y naimy ym naira ly ati sai py ny y leang, nanai pany ai nai ngai a?

²¹Achi i amsi sangum Abraham ly mymy i chapo Isaka ai maicham tleaung y talam nai khala y ly, atiti sa naira awm nai deaungkho y eaung nai ny y a?

²²Ym naira ly atiti sa naira hawi sa abom, nanai nang pany bo, naibaly atiti sa naira awm nai deaungkho y ni i ym naira ly hawi angym bo:

²³naibaly Abraham ly Tameuh ai ym i, huni ym naira my ly hawi naira y palawn, nanai Tameuh i leu tym bo; naibaly mymy ai Tameuh i ahawi pathi bo.

²⁴Ym naira harei khyh ny y leang, atiti sa naira awm nai deaungkho y khumi my eaung naira nga, nanai nangchi pany bo.

²⁵Hunai kamta bima Rahabi ly pato naichi ai kawn i lam takhra mang y vawi hai nai ly, atiti sa naira awm nai deaungkho y eaung naira nga nai ny y a?

²⁶Phailo abawi y baly tlang ly dei nai ne, hunai kamta teang atiti sa naira abawi y baly ym naira py dei nai ne.