Read Khumi Chin JAKOB 4 Bible Online

JAKOB 4 - Khumi Chin bible

JAKOB 4

¹Nangchi theung y atiu naira hawi aei naira ly ma mang i dengdairei theu nai mo? Nangchi i tlang kangprei y atiu nai nangmychi i ngai phi teng y naira i dengdairei theu nai ny y a?

²Nangchi ly ngai phi i ngo y, nangchi ly khumi ai py padei, paleung py ano, na i py ngo thai y:nangchi ajo py ajo, atiu py atiu; nangchi ly hnei y nai deaungkho y ngo y.

³Nangchi hnei, na i py nangchi i hnei nai teng y nai deaungkho y ngo y, nangmychi i ngai phi teng y naira y teaung ai nai tau lawh nai y.

⁴Nangchi pajang sa nai nuchi awi, khaileaung pri hawi amrawi nai sai ly Tameuh ai paleung ka-e sa nai ne, nanai ly pany u y nai sai a? Ami py khaileaung pri hawi amrawi nai ngierei ly Tameuh hawi paleung ka-e lawn bo.

⁵Tameuh i cha-iu thui nai leu ly ati sai py ny y nai athang khai u lawh a? Achi i paleung theung y ang tym hai nai Phailo ly paleung no naira ngai a?

⁶Na i py mymy ly pahenra pei panawi reng: hunai deaungkho y Tameuh i cha-iu leu y, “Tameuh ly kam-echi ai paka iy, tahm apanem naichi ai ly pahenra pei,” nanai ne.

⁷Hunaibaly Tameuh i kangai awm u; na i py diabola ai ly paka u, hunaibaly ni ly angpreng veng ai mang.

⁸Tameuh hawi kasa u, hunaibaly ni py ang kasa ai mang. Khumi kamngochi awi, nangchi i kiu ly asi u pan; atiti sa nai bawibawira y so tangei chei y naichi awi, nangchi i paleung apachai u.

⁹Paleung mawn u ly, paleung si iy vo py vo u; nangchi i panui nai ly paleung mawn naira y lawn sy, nangchi i amo theu nai ly ngam naira y lawn sy.

¹⁰Areng i mei ka-niu y ly tahm apanem u, hunaibaly ni my ang palo ai.

¹¹Amjo amnauchi awi, apreaung u reng moh. Ami py amy i amjo amnau ai preaung iy, amy i amjo amnau ai cheh baly, Reita ai preaung iy, Reita ai py cheh:naibaly nang ly Reita ai cheh baly, nang ly Reita patawm nai keung ny y, tara chih nai keung tla lawh veng.

¹²Reita pei nai keung hawi tara chih nai keung ly leaungrei awm khyh, paheng thai nai hawi, tama hai thai nai keung ly: na i py saleungchi ai cheh nai keung ly nang ly ami mo?

¹³Vai ly khen cham rai, “Vaini mo khawndam mo kaichi huni avang y chei ai i sanengrei kra ai, naibaly ka-pai sa ai i kamran nga ai,” nanai keungchi awi. Khen cham, khawndam ly mana awm ai mo, nanai nangchi pany y.

¹⁴Nangchi i heng naira ly ati mo? Kra y nai sala y amteng iy tama ali ryp veng nai tamai kamta atawm.

¹⁵Hunai deeaungkho y, “Areng my avo hai baly noso hawi iy huni py hini py sa ai,” na u ai nai tla.

¹⁶Na i py nangchi i am-e nairachi ly nangchi kawn hai keh lawh ly: hunai kamta am-e nai bawibawi ly kamngo tla.

¹⁷Naibaly ami py atiti kahawi sa ai nai pany iy so y baly, mymy i vui ly kamngo ne.