Read Khumi Chin I PETERA 2 Bible Online

I PETERA 2 - Khumi Chin bible

I PETERA 2

¹Hunaibaly kamngo bawibawi hawi, tapawp paryp naira hawi, tapawp naira hawi, paleung no naira hawi, thui tamawn naira bawibawichi anawn u veng iy,

²deaungdi chymblei nai kamta ly phailo mang i kanu hang, tapawp paryp naira ati sai py tabawi y nai ly khri pa-rei ngai u, hunira y ly hengra ka-lawn pa-rei veang u thai ai nai;

³Areng ly khri pa-rei tamen parai nai ne, nanai pateng u chum bo nabaly.

⁴Mymy ly lengseaung kangheng, khumichi i ngai y nai khypkhyp ne i py, Tameuh i dawn naira y vawi takhra nai hawi vang teng parai nai ne:

⁵mymy teng y jeu iy, nangchi ai py lengseaung kanghengchi kamta ly phailo mang i yhm sa naira y ang tabawi ai nai, Isu Krista i saho y Tameuh i ka-kawn phailo mang i apathyp naira ly talam iy, pathyp pi nai keung kachaichi lawn thai ai nai.

⁶Ati mana nai mo nabaly Tameuh i cha-iu leu y ly, “Khen cham, Zion y ly taki i lengseaung aly len keh nai, Vawi takhra nai hawi vang teng parai nai kakhai nai ne; Ami py mymy ai ym nai ngierei ly amthang leaung y ai,” nanai tajiu nai ne.

⁷Hunaibaly nangchi ym naichi i vui ly mymy ly vang teng parai nai ne; ym y naichi i vui naini, “Yhm sa nai keungchi i lengseaung ngai y nai ly, Huni kypkyp ai ly taki i lengseaung avo keh nai palawn bo,” nanai hawi,

⁸“Atlym naira lengseaung hawi paka naira lengseaung pui py lawn ai,” nanai ne. Ati mana nai mo nabaly nichi ly leu tangai y nai deaungkho y atlym u lawh reng; huna nai kamta awm ai nai nichi ai khai yb nai ne.

⁹Na i py kaveng theung i nai mymy i kangvang rengrang tlai naira y kun ai nai nangchi ai ang palau nai keung i hawi parai nai sai nangchi ly amteng hai thai ai nai, nangchi ai ly cheng vawi takhra nai, pathyp pi nai keung tahm asang parai nai, theaung kachai, Tameuh i khumichi kypkyp ne;

¹⁰nangchi ly jangni y mymy i khumichi ny y leang, vai ly Tameuh i khumichi lawn u bo; nangchi ly jangni y pahen naira ngo y leang, vai ly pahen naira nga u bo.

¹¹Ngai parai naichi awi, nangchi ly khuleaung chei naichi hawi angvynchi ne nai deaungkho y, phailo ai tiu reng nai tlang i ngai phi teng y nairachi ai ly anawn veng ai nai kang takeng;

¹²Cheng Takhrachi theung y nangchi i amhi amtlau nai sai ly apu parai nai ne sy, hunaibaly nangchi ai kamngo sa nai keungchi kamta ang thui tamawn naira y ly nangchi i atiti kahawi sa naichi niu nai deaungkho y, de nai kani y ly Tameuh ai ang palo thai ai.

¹³Areng my deaungkho y khumi i leu khai rym nai bawibawi teng y ly, samrang teng y mo (ni ly len keh nai ne),

¹⁴kamngo sa nai keungchi i tlang tleaung y vawitheung tha ai nai hawi, atiti kahawi sa nai keungchi ai palo ai nai py mymy i pato nai peang nai keungchi teng y mo aau u.

¹⁵Naibaly ly atiti kahawi sa naira y ly khumi cheng y naichi i pany y nai leu thui nai anawn hai thai ai nai Tameuh i kangai ne khyp.

¹⁶Nangchi ly alaw nai ne, na i py nangchi i alaw nai ly kamngo ai khiu naira y teaung y naimy, Tameuh i miseaung y awm nai kamta teaung u.

¹⁷Khumi bawibawichi ai tahm khai u. Amjo amnauchi ai ly tamen u. Tameuh ai ly tahm khai u. Samrang ai ly palo u.

¹⁸Miseaungchi awi, jei kaji naimy nangchi i yhmkeungchi i ngaingai awm u; khumi kahawi hawi khumi neaung kahawichi teng y harei khyh ny y naimy, khumi paleung kamtheangchi teng y py ne sy.

¹⁹Ami my Tameuh ai dawn nai deaungkho y patang ai nai avo y naira y paleung mawn nai patang tanga baly, huni ly kawn ai nai awm lawh veng.

²⁰Nangchi ly kamngo sa iy ang tabeang nai khala kham tanga baly ati palo naira awm mo? Na i py nangchi ly kahawi sa nai patang iy kham tanga baly Tameuh i ka-kawn ne.

²¹Ati mana nai mo nabaly nangchi ai ly hinai kamta sa ai nai ang palau nai ne; Krista ly ang patang pi iy mymy i lawi y abang u ai nai khen pata naira ang daw pi nai chy bo.

²²Mymy ly kamngo pipi so y leang, mymy i labeaung y py tapawp paryp naira ha py by y;

²³ami my mymy ai jo nai thym khala y py mymy ly jo teang y: mymy ly patang nai thym khala y ram y i, hawi parai naimy chih reng nai keung teng y aau lawh:

²⁴achi ly kamngo lam mang y dei veng iy hawi naira lam mang y heng thai ai nai mymy kypkyp ly achi i kamngochi ai dengkeaung tleaung y mymy i tlang y ang pho pi bo; nangchi ai ly mymy i pakhau nai satlang y hawi ang sa pi bo.

²⁵Nangchi ly beram kamta lam tamang nai ne i, vai ly nangchi i phailo ai ang typ nai hawi peang nai keung teng y vawi ali u teang veng bo he.