Read Khumi Chin II PETERA 3 Bible Online

II PETERA 3 - Khumi Chin bible

II PETERA 3

¹Ngai parai naichi awi, vai nangchi teng y katajiu nai ly kai i cha pa-nyh kang pa nai ne; nangchi ly amo kachaichi i leu thui rym nai hawi, nangchi i amtaw thau naichi i labeaung y Areng hawi Paheng Keung i leu pei nai py pany jo ai nai,

²huni nyhrei ra y ly nangchi ai adawn hai vau iy nangchi i paleung kachai amcheng hai nai ne.

³Hini ly pany u man ba; kani kangkhym y ly panui hai nai keungchi ly mymychi i ngai phi teng y nai kamta tako iy,

⁴panui hai nai tarawi y ang tym iy, “Ni ly ang jeu bi ai nai leu adeu nai ly ma mang y mo? Amsi sangumchi i, i ngym veng nai kani i dengdairei khaileaung palum kha i nai kamta ly atiti bawibawichi ly awm veangveang chy bo,” nanai thui ai. Hini satang nichi ly tami akhikan :

⁵Tameuh i leu deaungkho y jangni y kani awm iy, khaileaung py tui theung i nai hawi tui teaung nai deaungkho y sa nai py awm;

⁶hunira y ly hunai thym khala i khaileaung pri ai tui my um i phra bo:

⁷na i py vai i kani khaileaung ly huni leu deaungkho y Tameuh ai tahm khai y naichi ai tara chih ai nai hawi tama hai ai nai kani i vui y khai iy, mai i vui pateung achu nai lawn bo.

⁸Na i py ngai parai naichi awi, hini leu sairei nai ly tami u moh, Areng i dawn naira y ly kanirei nai ly saneng sangrei nai kamta lawn iy, saneng sangrei nai py kanirei nai kamta lawn teang.

⁹Phyreichi ly dawndan y nai dawn nai kamta Areng ly mymy i leu adeu naira molam y ly dawndan y nai ny y leang; ami ai py tama hai ai nai ngai y i, khumi bawibawichi uikhei ai nai ngai nai, nangmychi ai ang kham pi nai teu.

¹⁰Na i py Areng i kani ly kangviu khumi kamta ang tym takengkei ai; huni neng y ly kani ly khrikhri pa-reityn naimy tama ai i, atiti pakeungchi ly khri pa-rei angngo nai mai y kang nai tama ai, khaileaung hawi huni theung y atiti sa naichi ly mai y kang hai bebe ai.

¹¹Huni atitichi ly hunai kamta tama bebe ai nai tla, nanai nangchi pany nai deaungkho y, Tameuh i kani tym ai nai athang khai nai hawi, kasa hai ai nai py amhi amtlau nai sai kachai y hawi Tameuh ai dawn ryhryh naira y ly khumi mani ka-tawm awm u ai nai tla mo?

¹²Huni neng deaungkho y kani ai ly kang iy tama ai i, atiti pakeungchi py khri pa-rei angngo nai mai y ang kang bebe ai bo.

¹³Na i py mymy i leu adeu nai kamta hawi naira awm nai, kani khaileaung kangtha ai ly achi athang khai.

¹⁴Hunai deaungkho y ngai parai naichi awi, nangchi ly hunai kamta atitichi ai ly athang khai nai deaungkho y anyng akau y nai hawi cheh ai naira by y naimy, awmnem nai ang niu thai ai nai atho angjeng u.

¹⁵Naibaly achi i Areng i kham pajau nai sai ly paheng naira y palawn u; achi i amjo amnau ngai parai nai Pawla py ni teng y cheng naira pei nai kamta ly nangchi teng y tajiu teang bo;

¹⁶ne, ni i cha pa nai bawibawi ra y ly huni satang thui pi bo; hunira y ly leu pany thai ai nai rai parai naichi awm i, cheng y nai hawi khaw y nai khumichi ly Tameuh i cha-iu leu takhra ai tangai akawi nai kamta tangai akawi lawh iy, amymychi ai atama hai lawh reng.

¹⁷Hunaibaly ngai parai naichi awi, nangchi ly huni satang pany rym nai deaungkho y amkym u, hu ti y baly khumi kamngochi i teng y naira y ang pahawi iy khaw u nai thym khala y ly atlym u lawh na.

¹⁸Huni ny y naimy achi i Areng hawi Paheng Keung Isu Krista i pahenra y hawi pany naira y py veang u. Vai hawi deungtasa tym pa-rei py mymy teng y nang parai naira awm sy. Amen.