Read Khumi Chin I JOHAN 4 Bible Online

I JOHAN 4 - Khumi Chin bible

I JOHAN 4

¹Ngai parai naichi awi, phailo bawibawi y ym u moh, phailochi ly Tameuh teng i nai ne mo, ny y mo, nanai cham u; ati mana nai mo nabaly khaileaung pri y ly leu thui tapawp nai neangneangchi theu bo.

²Nangchi ly hinira y ly Tameuh i Phailo ai pany pajau: Isu Krista ly satla iy ngan lawn, nanai thai hai nai phailo ngierei ly Tameuh teng i nai ne;

³naibaly Isu ai thai hai y nai phailo ngierei ly Tameuh teng i nai ny y leang; huni ly Krista ai paka nai keung, ang jeu ai nai ly nangchi thai bo; vai py khaileaung pri y awm angchi yb nai ne.

⁴Bechi awi, nangchi ly Tameuh i dengdairei ne i, nangmychi y awm nai keung ly khaileaung pri y awm nai keung tleaung y len keh nai deaungkho y, nangchi ly hunichi ai pajau bo.

⁵Nichi ly khaileaung pri i nai ne, hunai deaungkho y nichi ly khaileaung pri i nai kamta katheu iy, khaileaung pri ly nichi i leu tangai lawh.

⁶Achi ly Tameuh teng i nai ne; Tameuh ai pany nai khumi ly achi i leu tangai; Tameuh teng i nai ny y nai khumi ly achi i leu tangai y leang. Hunira y ly phailo meitang nai hawi, phailo meitang ny y nai py achi pany.

⁷Ngai parai naichi awi, atamen u leungtang sina; tamen naira ly Tameuh teng i dengdairei theu nai ne; khumi ami py tamen naira awm nai ngierei ly Tameuh i tapen nai ne, Tameuh ai py pany.

⁸Tamen naira by y nai khumi ly Tameuh ai pany y; ati mana nai mo nabaly Tameuh ly tamen naira ne.

⁹Hinira y ly Tameuh i tamen naira ly achi i tlang tleaung y amteng bo; achi ly mymy deaungkho y heng thai ai nai Tameuh my mymy i Chapo leaungrei awm khyh nai ai khaileaung pri y ang pato.

¹⁰Hinira y ly tamen naira awm, achi ly Tameuh ai tamen nai ny y leang, mymy ly achi ai ang tamen iy, achi i kamngochi ahui nai langseaung syn naira lawn thai ai nai mymy i Chapo ai ang pato nai teu.

¹¹Ngai parai naichi awi, Tameuh my hina tanrei achi ai ang tamen baly, achi py atamen u leungrang ai nai tla.

¹²Ami py mana khala y py Tameuh ai niu vai y leang: achi ly atamen u leungtang baly Tameuh ly amychi y awm jojo ai i, mymy i tamen naira py amychi y angym teang ai.

¹³Mymy ly mymy i Phailo ai achi ai phyrei nga hai chum veng nai deaungkho y, achi ly mymy y awm jojo nai hawi, mymy ly amychi y awm jojo, nanai py achi pany.

¹⁴Naibaly Ampo my chapo ai ly khaileaung pri ai Paheng Keung lawn ai nai ang pato nanai ly achi pany py pany, thai py thai hai bo.

¹⁵Ami py Isu ly Tameuh i Chapo ne, nanai thai hai nai ngierei ly mymy y ly Tameuh my awm jojo i, ni y py Tameuh ly awm jojo teang.

¹⁶Tameuh my amychi i tlang tleaung y tamen naira awm nai ly achi my pany iy, ym py ym nai ne. Tameuh ly tamen naira ne; tamen naira y awm jojo nai khumi ly Tameuh y awm jojo i, Tameuh py ni y awm jojo teang.

¹⁷Achi ly tara chih nai kani y vam parai pa-rei awm thai ai nai achi i tlang tleaung y tamen naira ly angym bo; ati mana nai mo nabaly mymy i awm nai kamta achi ly hini khaileaung pri y awm teang bo.

¹⁸Tamen naira y ly jei ai naira ha py by y leang; tamen naira angym nai my ly jei naira ai patheu nai ne: jei naira y ly pajeng ai naira awm lawh veng; jei nai keung ly tamen naira y angym y leang.

¹⁹Mymy ly achi ai ang tamen man nai deaungkho y achi ly tamen nai ne.

²⁰Ami my, “Kai ly Tameuh ai tamen,” napi iy, amy i amjo amnau ai niu ngai y baly, mymy ly ka-chawi thui nai teu; amy i amjo amnau niu ryhryh nai ai malawn py tamen y pui baly, Tameuh niu vai y nai ai ipsaly mana tamen thai ai mo?

²¹Achi ly mymy teng i dengdairei hini leu pei nai ly awm he; ami py Tameuh ai tamen baly, mymy i amjo amnau ai tamen teang ai nai tla, napi nai ne.