Read Khumi Chin TARA CHIH NAI KEUNGCHI 11 Bible Online

TARA CHIH NAI KEUNGCHI 11 - Khumi Chin bible

TARA CHIH NAI KEUNGCHI 11

¹Kilead cheng sorai risa Japheth ly bimanu i chapo ne. Ni i ampo Kilead ly

²my i aju hawi nga nai chapochi py awm; nichi ly tleaungri cheang nai khala, Jephetha ai yhm i nai patheu u veng. Nichi my, “Nang ly takhra neampachy hawi nga nai chapo ne i, kaichi ampo i yhmtheaung amtym ai nai ngo y leang,” napi u.

³Japheth ly my i amjo amnauchi teng i nai preang iy Toba pri y awm vui bo. Hunira y ni ai ly yhm hlau amny y nai khumi phyreichi my tahm khai nai deaungkho y, huni khumichi ly ni i nithun abang u.

⁴Naibaly neng kra kyh nai khala, Ammon chengchi ly Israela chengchi hawi tavai atiu u nai ne.

⁵Huna nai khala Kilead pri i lu sa naichi ly Jephetha ai palau ai nai Toba pri y chei u i, ni teng y,

⁶“Ammon chengchi ai tiu ai nai kaichi ai lu so ba,” napi u.

⁷Na i py Jephetha my, “Nangchi ly kai ai niu ngai y nai deaungkho y, ngaai i yhm dengdairei patheu u praw bo; vai, patang naira avum nai khala naini, ati mana nai kai teng y jeu u lawh mo?,” napi.

⁸Nichi ly Jephetha teng y, “Vai, nang teng y kaichi kang tym nai ly Ammon chengchi ai kaichi hawi vanrei tiu ai nai hawi, Kilead pri mipuichi ai lu sa ai nai ne,” napi u.

⁹Jephetha my, “Nangchi ly Ammon chengchi ai tiu ai nai kai ai yhm mang y palau nai deaungkho y, ARENG my py kai ai eaung hai lawh baly, kai ly nangchi i samrang kalawn ai,” napi.

¹⁰Nichi my py, “Kaichi ngai mang; ARENG ly kaichi i pany hai nai keung ne,” nanai pathang u.

¹¹Hunaibaly Jephetha ly Kilead pri miteaung kehchi hawi vanrei abang bo. Khumichi my py ni ai, mymychi ai peang nai keung hawi lu sa nai keung y tahm pasang u. Jephetha ly Mizapa mary y, ARENG i mo y my i hnei naichi pany hai ali teang bo.

¹²Naibaly Jephetha ly Ammon samrang teng y savaichi pato i, “Nang hawi kaichi sala y ati ka-jo awm mo? Nang ly ati mana nai y, kaichi i pri theung y kun lawh mo?” nanai deng.

¹³Ammon samrang my Jephetha i savaichi teng y, “Israela chengchi ly Aikupta pri i dengdairei theu u nai khala, kai i khu ka-peang ai Arnon tavo dengdairei Jabbok tavo hawi, Jordan tavo khrairei peang u vui nai ne. Huna nai y nangchi ly vai, huni khu ka-peang kai teng y paleung kahawi naimy, pei teang ai nai tla,” napi.

¹⁴Jephetha ly Ammon samrang teng y savaichi pato bi i, hina nai pathang bo.

¹⁵“Israela chengchi my Moba pri hawi Ammon pri ai peang vui, nanai ly teng y leang.

¹⁶Kateng khyp thui ai nabaly, Israela chengchi ly Aikupta pri i dengdairei theu u nai khala, nichi ly daichi ka-vym tako prei iy, Akaba pangli katheaung sahawi i Kadesa mary y tym u bo.

¹⁷Huna nai khala nichi ly Edom samrang teng y savaichi pato iy, Edom pri tako prei ai nai takeng u. Na i py Edom samrang ly pei y. Nichi ly Moba samrang teng y py, huna nai kamta takeng u; huni samrang my py pei y. Hunai deaungkho y Israela chengchi ly Kadesa mary y awm u nai ne.

¹⁸Naibaly nichi ly Edom pri hawi Moba prichi ai taki iy, daichi ka-vym tako prei naimy Moba pri nisi mang, Arnon tavo vai mang y tym u nai khala, huni meingtym y tai u bo. Arnon tavo ly Moba pri i khu ka-peang ne nai deaungkho y, huni tavo ly nichi angpeang u y.

¹⁹Naibaly Israela chengchi ly Hesabon mary Amori chengchi i samrang Sihon teng y savaichi pato iy, nichi i pri y tako prei naimy mychi i pri y chei ai nai takeng u bo.

²⁰Na i py Sihon samrang my pei y. Ni ly my i tavaimi kamkawm verei pangym iy, Jaha mary y tai u i, Israela chengchi ai tiu u bo.

²¹Na i py ARENG ly Israela chengchi ai, Sihon samrang hawi tavaimichi i tlang tleaung y tiu pajau ai nai pei nai deaungkho y, Israela chengchi ly huni pri y awm nai Amori chengchi i khu ka-peang bawibawichi ai peang vui nai ne.

²²Nichi ly tokalawi mang y Arnon tavo, tosyh mang y Jabok tavo khrairei py, nisi mang y daichi ka-vym, nidym mang y Jordan tavo khrairei py, Amori khu ka-peang ngierei ai peang pi vui bo.

²³Hunai deaungkho y mymy i khumi Israela chengchi i vui, Ammon chengchi ai patheu pi vui nai keungly Israela chengchi i ARENG Tameuh ne.

²⁴Nang ly huni khu ka-peang nga teang ai nai atho sa ai a? Nangmy i tameuh Khemosa my ang pei nai ngierei nang peang pajau mang. Na i py kaichi i vui, kaichi i ARENG Tameuh my peang vui nai khu ka-peang ngiereichi ly kaichi my peang ai.

²⁵Nang ly nangmy ai Moba samrang, Zipor i chapo Balek tleaung y len keh, nanai dawn a? Ni ly Israela chengchi ai ka-jo hau iy tiu vai nai sai a?

²⁶Israela chengchi ly Hesabon mary hawi Aroe mary ai py, huni mary tengpang sahawi i marychi hawi, Arnon tavo peang y awm nai mary ngiereichi ai py, saneng chungvai thomrei peang nai thym khala, nang ly ati mana nai, huni marychi ai lo teang y lawh mo?

²⁷Kai ly nang i tlang tleaung y ati sai py hawi y nai so y; nang naini kai ai tavai tiu iy, hawi y nai sa lawh bo. ARENG ly tara chih pi nai keung ne. Mymy ly Israela chengchi hawi, Ammon chengchi sala y vaini tara chih pi ai,” napi.

²⁸Na i py Ammon samrang Japheth ly, pathang teang nai leu ai ati sai py tahm pateng pi y.

²⁹Huna nai khala ARENG i phailo ly Jephetha teng y tym. Jephetha ly Kilead pri hawi Manase pri tako prei iy, Kilead pri Mizapa mary y vawi ali teang bo. Naibaly Ammon pri mang y tavai tiu ai nai amsa.

³⁰Jephetha ly ARENG teng y, hina nai kamta vaineng adeu bo. “Nang ly kai ai Ammon chengchi i tlang tleaung y tavai eaung hai ai nabaly,

³¹kai ai lamchung ai nai yhm i theu man nai khumi ai, leng patlum nai kapathypra palawn iy, nang teng y kang talam ai,” napi.

³²Hunaibaly Jephetha ly tavo angpeang iy, Ammon chengchi ai tiu i, ARENG ly ni ai tavai eaung hai bo.

³³Ni ly paleung ka-echi ai Aroe mary dengdairei, Minith mary tengpang sahawi y awm nai mary apomreichi ai py, Abel Keramim mary khrairei py hui iy tiu i, khumi padei nai pawi pui lawm na bo. Hunai deaungkho y Ammon chengchi ly Israela chengchi hawi atiu naira y sum bo.

³⁴Jephetha ly Mizapa mary, mymy i yhm y vawi teang nai khala, my i chaniu ly atym beu iy, lam naimy lamchung ai nai theu bo. Ni ly chaniu harei awm khyh nai ne.

³⁵Jephetha ly chaniu ai niu nai khala paleung hawi y i, my i baichu sei iy, “Aw lo awi! nang ly kai i paleung ai no hai na ly! Kai ai paleung no hai nai khumi ly ati mana nai y nang ne lawh mo? Kai ly ARENG teng y ji parai nai vaineng adeu nai ly ajiu teang thai y leang bo!” napi.

³⁶Chaniu my ly “Ngaai, nang ly ARENG teng y vaineng adeu chum veng bo nabaly, vaineng adeu nai kamta kai i tlang tleaung y so ba; ARENG ly ngaai nang ai, mymy i paleung ka-echi tlang tleaung y vawitheung tha ai nai ang pei bo.

³⁷Na i py kai harei takeng ai nai ngai; “Kai ly anglo ateaung naimy tlang tem ai lawh bo i, ahawichi hawi vanrei mawi y amki iy vo tangam ai nai neng lo nyhrei, kaimy ngaingai awm ai nai pei kyh rai ba,” nanai takeng.

³⁸Jephetha ly chaniu ai lo nyhrei pei iy pato bo. Anglo ly yhmtheaung so y, cho chanau ngo y naimy dei ai nai ne i, ni hawi vanrei ni i ahawichi ly mawi y lyn kalau iy vo tangam u bo.

³⁹Lo nyhrei bo baly ni ly ampo teng y vawi ali teang. Ampo py ARENG teng y, my i adeu nai kamta sa nai deaungkho y, anglo ly anglo thym naimy deung tlum nai ne. Huni ly Israela cheng theung y reita lawm bo.

⁴⁰Hina naichi molam y Israela pri Kilead mary y awm nai Jephetha chaniu i vui saneng tleirei, kani palyhrei Israela neampachychi ly theu iy, vo tangam u nai reita lawm bo.