Read Khumi Chin TARA CHIH NAI KEUNGCHI 12 Bible Online

TARA CHIH NAI KEUNGCHI 12 - Khumi Chin bible

TARA CHIH NAI KEUNGCHI 12

¹Ephraim cheng theaungchi ly tavai atiu ai nai aeng u bo. Nichi ly Jordan tavo angpeang u iy, Zaphon mary mang y chei u i, Jephetha teng y, “Nang ly kaichi ai palau y naimy, ati mana nai Ammon chengchi ai tavai tiu lawh mo? Nang i awm nai nang i yhm ai, kaichi my mai leng vui ai,” napi.

²Na i py Jephetha my nichi teng y, “Kai hawi kai i khumichi ly Ammon chengchi hawi khrikhri pa-rei ajo u bo; kai ly nangchi ai kang palau i py, kaichi ai nichi kiu i nai nangchi my atleu y pui be.

³Huna nai nangchi my kaichi ai atleu pi ai nai athang khai y nai deaungkho y, kai ly tlang areu iy Ammon chengchi ai tiu ai nai kachei bo. ARENG my py kaichi ai nichi i tlang tleaung y eaung hai bo. Hunai deaungkho y vai, nang ly ati mana nai y kaichi ai tiu lawh mo?

⁴Naibaly Jephetha ly Kilead sorai bawibawichi ai angym hai iy, Ephraim chengchi ai tiu u bo. Ephraim chengchi my, (“Ephraim pri hawi Manase pri y awm nai Kilead pri khumichi ly vaineng takan iy, Ephraim pri i dengdairei preang nai khumichi na a tu ly!” nanai preaung u.)

⁵Ephraim i khumichi tleaung pajau y pa-rei, Kilead pri i khumichi ly Jordan tavo angpeang thai nai, meingtym ngiereichi ai peang vui nai ne. Ephraim pri i khumi leaung leaungrei ly theura nga ai nai tavo angpeang ai nai hnei nai khala, Kilead pri khumichi my, “Nang ly Ephraim pri khumi ne a?” nanai deng; “ny y leang”

⁶nanai thui baly, “Sibboleth” nanai thui hai. Na i py huni khumi ly leu chai pyn pa-rei thui thai y i, “Shibboleth” nanai thui lawh baly, ni ai patiu iy Jordan tavo angpeang naira y padei u bo. Huni tavai atiu naira y Ephraim pri khumi leaung meaungkateaung palyh pa-ngo sang nyhrei dei nai ne.

⁷Jephetha ly Israela pri khumichi ai saneng tariurei lu sa i dei bo. Ni i veu ai Kilead pri, my i saleaung mary y up bo.

⁸Jephetha dei nai bo y Israela chengchi ai lu sa nai khumi ly Bethlehem mary i Ibazan ne.

⁹Ni ly chapo leaung phairei, chaniu leaung phairei awm. Ni ly my i chaniuchi ai cheng takhrachi hawi apom hai iy, my i chapochi ai py cheng takhra neampachychi hawi apom hai. Ibazan ly Israela chengchi ai saneng saryhrei lu sa i,

¹⁰dei baly ni i veu ai ly Bethlehem mary y up bo.

¹¹Ibazan dei bo baly Zebulon mary i Elon ly Israela chengchi ai saneng horei lu sa.

¹²Naibaly ni ly dei i, ni i veu ai ly Zebulon khu ka-peang i Azalon mary y up nai ne.

¹³Elon dei nai bo y Pirathon mary Hilela i chapo Abadon ly Israela chengchi ai lu sa bo.

¹⁴Ni ly chapo leaung vui palyhrei, katu leaung phairei awm; nichi ly keaungngo kano kasau vui saryhrei atang nai khumichi ne. Abadon ly Israela chengchi ai saneng tajarei lu sa i,

¹⁵dei baly ni i veu ly Amalek mawitleaung pri Ephraim khu ka-peang Pirathon mary y up bo.